Thursday, January 31, 2013

MAKE-UP MEETING TI 4 P’s, NAANGAY DITOY MUNISIPIO

Cabugao, Ilocos Sur – Naangay ti pannakamiting dagiti saan a nakadar-ay a kameng ti Pantawid Pamilyang Pilipino Program (4 P’s) kadagiti barangay a napanan nagmitingan dagiti pannakabagi ti Municipal Social Welfare Development Office (MSWDO)-Cabugao iti kallabes a bulan. 

Naangay ti meeting a dinar-ayan dagiti 4 P’s Members iti 5 a barangay  iti Enero 31, 2013 iti Municipal Conference Hall, Cabugao, Ilocos Sur.


Naiyulit a naipalawag kadagiti nainayon a kameng ti 4 P’s  iti pakabuklan dagiti  pagannurotan a masurot  iti  pannakabenepisiar-da  iti Conditional Cash Transfer Program ti Gobierno ken kasta met kadagiti aramidenda   a kanaig a  pagrebbenganda.


Iti agdama, dagiti 4 P’s Beneficiaries ket aktiboda a makiparpartisipar kadagiti aktibidad ti barangay kas iti panagdaldalus, panaggarden ken panagmula ti kayo.


Nakitaripnong ni Mayor Edgardo “Ediboy” S. Cobangbang, Jr. kadagiti nagmimiting ket dinakamatna ti pateg ti panagmulada iti Manila Palm (Butsina) iti barangayda. Innayon ti Ama ti Ili a mangaramidda iti inisiatibada a makikoordinar iti Punong Barangay-da tapno maikkanda ti imulada a seedlings.


Nagtinnulong da Miss Aida Cueto ken Mrs. Wilma Cruz, agpada a Personnel ti MSWDO  a nangtarawidwid iti nasao a miting. # (Web In-Action) 



MINITING NI MAYOR EDIBOY DAGITI JOB ORDER PERSONNEL

Cabugao, Ilocos Sur – Naangay ti miting dagiti Job Order Personnel ti LGU-Cabugao iti Municipal Conference Hall, Cabugao, Ilocos Sur iti Enero 31, 2013. Tinarawidwidan ni Mayor Edgardo “Ediboy” S. Cobangbang, Jr. ti nasao a miting. Nakipaset met ni Mrs. Rialinda Naval Recaido iti Accounting Department iti nasao a miting.  

Paset ti  panangipatungpal iti  agtultuloy a  pannakapasayaat   pay ti serbisio iti anag ti pammalagip ti Ama ti Ili iti pannakisaritana kadagiti Job Order Personnel tapno aramidenda ti trabahoda ken pagrebbenganda maibasar iti pagannurotan nga ituyang ti LGU  para kadakuada. # (Web In-Action)




Wednesday, January 30, 2013

ORGANIC FERTILIZERS, NAITED KADAGITI ONION GROWERS

Cabugao, Ilocos Sur – Inimatangan da  Mayor Edgardo “Ediboy” S. Cobangbang, Jr. ken SB Member Benedicto M. Savellano, Committee Chair on Agriculture iti pannakaiyallawat kadagiti Onion Growers ti  dagiti  Organic Fertilizers a mausar iti panagmula ti lasona  nga impaay ti Office of the Provincial Agriculture (OPAG), Province of Ilocos Sur babaen ti panangimaton ti DA-LGU Cabugao  idi Enero 29, 2013 iti sango ti Munisipio.

Ti pannakaited ti kasapulan dagiti agmula ti lasona kas iti organiko a pataba  ket    maitantandudo  a  programa babaen iti Departamento ti Agrikultura (DA) ken ti  LGU Cabugao tapno pumintas ken kumalidad  ti apit  kadaytoy a cash crop ditoy a lokalidad.


 Nakikaysa met iti pannakaiyallawat  dagiti Organic Fertilizers  kadagiti mannalon da  Municipal Agriculturist Zenaida S. Andrada ken HVCDP Municipal Coordinator Ester P. Aguimbag agraman dagiti  kakaduada  iti DA-LGU.   # (Web In-Action)


ROAD OPENING, AGKAMANGTON TI SITIO LUSONG SUYO KEN CALLAGUIP

Cabugao, Ilocos Sur – Iti pannaki-amad ti Web In-Action iti Enero 30, 2013,  impadamag  ni Brgy. Secretary Antonio N. Sabio  ti Barangay Baclig nga agkamangton ti Sitio Lusong-Suyo ken Sitio Callaguip apaman a maileppas ti pagsabtan ti naaramid a kalsada ditoy a disso babaen ti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken proyekto daytoy   a naipasdek babaen  kada Congressman Ryan Luis V.  Singson ken  ni Vice Governor Deogracias Victor B. Savellano para iti umili ti Cabugao.

Insupusop dagiti agindeg iti agsumbangir a Sitios nga iti pannakalukat ti kalsada ken agtultuloy a  pannakapasayaat daytoy ket manam-ayanda iti pagnaanda, panglinteganda  ken pagiruaranda  kadagiti maapitda. Pinagyamananda pay  dagiti Opisiales ti Gobierno-Lokal a nangilungalong iti pannakapaadda daytoy a pagdalananda. # (Web In-Action)

 

MAIS TI MAYSA A KAADUAN ITA A NAIMULA

Cabugao,Ilocos Sur – Iti pannaki-amad ti Web In-Action iti Enero 30, 2013, imbatad ni Municipal Agriculturist Zenaida S. Andrada a  mais ita ti maysa a  kaaduan  a naimula iti Dry Season  Crop  2012-2013 (Nobiembre-Mayo). Innayon ni Mr. Nereo S. Daproza, AT/DA-LGU a gapu ta bimmassit ti nagmula ti sandia, mapattapatta  iti 500  ektarias ti namulaan ti mais (yellow/white) kadagiti dati a mamulmulaan ti pagay ken tabako iti kallabes a panagmumula.

Nupay kasta, namantener ti pannakamula ti dati a mamulmulaan ti nadumaduma a nateng ket nupay umad-adu ti produksion, saan a mapasamak ti “oversupply”  ta kaaduan ti nateng a maibiahe idiay Balintawak, Quezon City;  Urdaneta, Pangasinan ken Cagayan Valley.


Innayon ni MA Andrada a dandani maapiten dagiti yellow corn a naimula ket monmonitorenda no kasano a makatulong ti LGU  kadagiti mannalon iti marketing ti produktoda. Nupay kasta, saan a problema ti glutinous white corn ta nalaka a lakuen iti merkado-publiko gapu ta inaldaw a masaramsam ken adu ti agkompra nga ilakoda pay iti sabali a lugar/tiendaan (malingta ken matuno).


Dagitoy nga inisiatiba ket paset ti panangiwardas ti Gobierno Munisipal iti panangidaulo ni Mayor Edgardo “Ediboy” S. Cobangbang, Jr.   babaen iti panangimaton  ti DA-LGU  tapno mapapigsa ti sektor-agrikultura a kadakkelan a benneg a  pakatulongan dagiti  umili iti Cabugao, Ilocos Sur. # (Web Situational Report)

SEMENTADON TI AGPA-KARAYAN A KALSADA ITI BRGY. ARNAP

Cabugao, Ilocos Sur – Maus-usaren ti kaaduan  ti nasemento a kalsada iti Arnap-Carusipan Road iti  Brgy.  Arnap, Cabugao, Ilocos Sur.

Iti pannaki-amad ti Web In-Action iti Enero 30, 2013,  imbatad ni Brgy. Captain Teodoro Tabula a maragsakan dagiti idauluanna a makausar kadaytoy a kalsada ta napintasen a pagnaan. 


Malaksid a mausarda pay  a pagbilagan ti one-lane iti mais ken pagay, maragsakan met dagiti agnaed iti surong ken ballasiw ti karayan ta nasaysayuden a panglinteganda ti nasao a kalsada no mapanda iti Poblasion.


Pinagyamanan ni Brgy. Captain Tabula iti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti  agtultuloy  a pannakapasayaat dagiti kalsadada  iti Barangay Arnap. # (Web In-Action)



Tuesday, January 29, 2013

BARANGAY SABANG, TOURIST DESTINATION TI ILI A CABUGAO

Cabugao, Ilocos Sur – Iti pannaki-amad ti Web In-Action iti Enero 29, 2013, imbatad ni Brgy. Captain Edgardo S. Cobangbang, Sr. a nainayon a pagsayaatan  ti barangay-da  iti panagmula dagiti 4 P’s Beneficiaries iti Manila Palm (Butsina) ken adda Tree Guard-na iti  agsumbangir ti kalsada ti Barangay.

 Nadanonmi ni Kapitan Edgardo, Sr.  a tumartarabay kadagiti bisita ken   adda latta naka-duty nga Opisiales  ti Barangay  ken BPATS iti Barangay Hall/Multipurpose Building nangruna ita  ta agsangpet dagiti Surfers  a makipartisipar iti  maiwayat nga  Ilocos Surfing Crown 2013 iti  Kido’s Point, Barangay Sabang, Cabugao, Ilocos Sur  inton  Enero 31-Pebrero 1, 2013.


Iti pannaki-amad ti Web In-Action kadagiti pumurok   iti Barangay Sabang, pinagyamananda dagiti Opisiales ti Barangay  iti panangidaulo ni Brgy. Captain Edgardo S. Cobangbang, Sr. iti agtultuloy a  pannakapasayaat ti dalanda, natunos a panagdaldalus ken panagmulada ti kayo  a lumugar, kinatalna ti lugarda, ken napintas a panangpasangbayda kadagiti dumayo iti barangayda.


“Agduduma ti Nationalities ti tao a maisar-ong ditoy nangruna iti Holidays idi napan a tawen ken itatta  ket adda ragsak a magun-odmi iti pannakilangenmi kadakuada,” insupusop ni Kagawad Gina Bulseco, On-duty a Kagawad iti Barangay Hall.


“Pagyamananmi iti panagdanggay da Mayor Edgardo Cobangbang, Jr. ken Barangay Captain Edgardo Cobangbang, Sr. ta agtultuloy a mapasayaat dagiti kalsadami nangruna ditoy asideg ti baybay. Mairamankami met lumugar  a maidayaw iti napintas a  panagkitada ken agprogreso  a barangay-mi,” kinuna  ni Mr. Melchor Somera, taga-Brgy. Sabang.


Nainayon a buya a mangpangayed ti sango ti Multipurpose Building ket ti naipasdek a Catwalk babaen ti panangipaay ni Congressman Ryan Luis V. Singson. Imbatad dagiti Surfers  a manam-ayanda ita ta addan  panglakaanda   a mapan  tumapog iti asideg ti pagsanayanda a pagdalluyonan ti danum ti baybay. # (Web In-Action)


BARANGAY ROAD CLEAN-DRIVE TI BRGY. TUROD, NAILUNSAD

Cabugao, Ilocos Sur – Naaramid ti panagdalus ti agsumbangir a paset ti kalsada ti Barangay Turod, Cabugao, Ilocos Sur iti Enero 29, 2013 babaen kadagiti bumarangay, 4 P’s Beneficiaries ken Opisiales ti Barangay  a nangiwardas ti panagdalus.

Iti pannaki-amad ti Web In-Action iti Enero 29, 2013, imbatad ni Mr. Edgar S. Balangatan, MENRO-Designate ti LGU-Cabugao a paset daytoy a gannuat ti Barangay iti agtultuloy a pannakalinis ti agsumbangir a paset ti  kalsada ti Barangay Turod agsipud ta daytoy ti pagdaliasatan/sumrekan  dagiti Turista, Bakasionista, ken VIP’s a mapan agbisita  kadagiti Tourist Destinations ti Brgys. Dardarat, Salomague ken Sabang.


Innayon pay ni MENRO Balangatan a kasapulan nga assideg ti pannakadalus daytoy a Main Road nangruna ita a summer months a panagadu ti turista, balikbayans ken dadakkel nga aktibidades a maisayangkat  ken kasta pay a  panangannurot daytoy iti implementasion ti  Environmental Management Program ti LGU nga idauluan ni Mayor Edgardo “Ediboy” S. Cobangbang, Jr. Ti Barangay Turod ket idauluan ni Brgy. Captain Inocencio S. Sadac.


 Maysa ita a maisagsaganaan  iti maaramid  nga Ilocos Surfing Crown 2013 inton Enero 31-Pebrero 1, 2013 idiay Kido’s Point, Brgy. Sabang, Cabugao, Ilocos Sur  a pakasangailian kadagiti Surfers nga aggapu iti nadumaduma a Probinsia ti Pilipinas. # (Web In-Action) 




TRICHOGRAMMA EVANESCENS, PROTEKSION TI MULA A MAIS

Cabugao, Ilocos Sur – Ingannuat ti DA-LGU Cabugao babaen ti panangidaulo ni Municipal Agriculturist Zenaida S. Andrada ti pannakaiwaras ti Trichogramma Evanescens, maysa a kita ti babassit nga insekto a naipakete ken maipan iti kamaisan tapno  agpessa a mangdadael ti itlog ti corn borer, kangrunaan a kabusor ti mula a mais iti panagdakkelna.

Ti 50   a Trichocard ket kabaelanna a protektaran ti maysa-ektaria a kalawa ti kamaisan.
Iti pannaki-amad ti Web In-Action iti Enero 29, 2013, imbatad ni  Mr. Nereo S. Daproza ti DA-LGU nga umabot ti 20 a katao nga adda minaisanna iti 9 a barangay nga aglawa ti 17 ektarias ti namulaan  ti mais ti  pakayaplikaranna.


Dagiti nadakamat a Trichogramma Recipients ket isuda dagiti naikkan ti bukel ti mais nga Open Pollinated Variety (OPV) Yellow Corn, Dry Season 2012-2013 manipud iti DA-RFU 1 a nangited pay ti Trichogramma Evanescens.


Innayon ni Mr. Daproza a maisaknap daytoy a kabaruanan a wagas ti panagpatanor ti bin-i a mais a para lako ken bin-i  tapno maipabassit ti gastos iti panagusaran ti  insektisidio ket maingato ti matgedan ti mannalon ti mais. Iti Dry Season (Nobiembre-Mayo), mapatta-patta nga umabot ti 500-600 nga ektarias  ti mamulmulaan ti mais gapu ta katiempuanna iti lokalidad.
Ti OPV Yellow Corn a bin-i  ket naited babaen iti “Plant Now Pay Later” Program  kadagiti recipients  ken  naimula ita a panagmamais  isut’ gapuna a maidagadag ti pannakaited ti trichogramma tapno manamnama nga agballigi daytoy a programa ti DA-RFU 1 kadagiti Corn Planters. 


Dagitoy nga inisiatiba ket gubuay ti agtultuloy  a programa ti Gobierno Munisipal nga idauluan ni Mayor Edgardo “Ebiboy” S. Cobangbang, Jr. ken imatonan ti DA-LGU  a mangitandudo  kadagiti cash crop a mangital-o ti pagbiagan dagiti mannalon iti Munisipalidad kas iti panagmula ti mais. # (Web In-Action)

Sunday, January 27, 2013

PANNAKAIPALAWA TI RANGTAY-QUEZON, MAPAGNUMARANEN

Cabugao, Ilocos Sur – Sagsagrapenen ti publiko iti nawaya  a panaglasat iti Widening ti Barangay Bridge ti Brgy. Quezon iti  maibilang a “busy street” ti Lopez-Jaena  a  kumamang iti Poblacion Proper  no aggapuka iti away  ken kumamang  kadagiti barangay iti dayaen ti ili no mapanka iti ruar ti Poblasion.

Iti pannaki-amad ti Web In-Action iti Enero 27, 2013, imbatad ni Muncipal Engineer Crescencio C. Formoso  a  nagastosan  ti Widening of Barangay Bridge Phase 2 ti Barangay Quezon  manipud iti Gobierno Munisipal nga idauluan ni Mayor Edgardo “Ediboy” S. Cobangbang, Jr.


Iti pannaki-amad pay ti Web In-Action kadagiti agdaldaliasat a lumugar ken aggapu iti sabali a barangay ket imbatadda a limmawa ken pimmintas ti panagdaliasatda kadaytoy a natarimaan a rangtay iti pagkurbaan ti barangay. Impeksada ti panagyamanda iti Munisipio kadaytoy a nainayon a pagnam-ayan dagiti umili ti Cabugao. # (Web In-Action)




HYBRID RICE, INAY-AYATNA URAY 2ND CROP

Cabugao, Ilocos Sur – Nangrugin a magapas dagiti Hybrid Rice a naimula iti 2nd Crop ti Dry Season (Nobiembre-Mayo)  2012-2013 kadagiti barangay ti Turod Patac, Pila, Sagayaden, Bonifacio, Margaay, Baclig ken Turod a kangrunaan a nakailunsadan ti Demo-Farm ti LGU-Cabugao itay Main Crop, Wet Season 2012 (Hunio-Nobiembre).

Iti pannaki-amad ti Web In-Action iti Enero 27, 2013, imbatad ni Mr. Edgardo Garcia,  President, Turod Farmer’s Association a no la ket adda umdas a pagpadanum agingga nga agdawa ket mayat latta ti apiten iti 2nd Crop uray  hybrid. Iti  minulaanna ti Hybrid a 6,000 square-meters, nakaapit ni Edgardo iti  120 a kaban ken namnamaenna nga ad-adu ti maapitna kadagiti sumarsaruno pay  a pagapasna.


 “Naab-abante ti maapit ti Hybrid ket no adda man pagkapuyanna iti 2nd Crop, natural ta kakisang ti danum ken uray ta adda met ti 3rd Crop a nateng a pagsubbotan,” innayon ni Mr. Garcia.


Ti pannakaedukar ken pannakaipakat kadagiti kabaruanan a teknolohia ti panagtalon ket agtultuloy a programa ti LGU-Cabugao nga idauluan ni Mayor Edgardo “Ediboy” S. Cobangbang, Jr. ken imatonan ti DA-LGU tapno agtultuloy a masustener ti kasapulan a bagas a pagtaraon  dagiti umili. # (Web In-Action) 



NAG-YCAP DAGITI BUMARANGAY TI BRGY. PILA

Cabugao, Ilocos Sur – Naangay ti panagdalus/panagipakni ti rugit  kadagiti kalsada  dagiti Opisiales ken bumarangay ti Barangay Pila, Cabugao, Ilocos Sur idi Enero 26, 2013.

Indauluan ni Brgy. Captain Romeo Galamgam ti panagdalus iti agsumbangir a paset  dagiti kalsada  ken panangakupda kadagiti wara kadagiti arubayan dagiti pasilidades ti barangay. Ingunamgunam pay ni  Brgy. Captain Galamgam iti assideg ken agtultuloy a panagdalus dagiti pamilia iti arubayanda  ken maidarirag iti pannakaadda ti water sealed  toilet ti tunggal bubongan iti intero a barangayda.


Innayon  ni Brgy. Captain Galamgam a kankanayon daytoy nga aramidenda iti barangayda  kas pangannurot pay   iti Environmental Management Program ti Munisipio nga itantandudo ni Mayor Edgardo “Ediboy” S. Cobangbang, Jr. tapno mamantener ti sanitasion ken napintas a buya iti amin a paset ti Munisipalidad.


“Mannakitinnunos dagiti kabarangayak kadagitoy a gannuat ta mapanunotda nga isuda met laeng ti maisagut kadaytoy a ragup-obra ti barangay,” insupusop pay ni Kapitan Galamgam.  # (Web In-Action)



MAYSA-DISSO TI CONCRETING TI KALSADA ITI BRGY. PILA, NALPAS

Cabugao, Ilocos Sur – Iti pannaki-amad  ti Web In-Action idi Enero 26, 2013, imbatad ni Brgy. Captain Romeo Galamgam ti Barangay Pila a saan a paudi ti barangayda iti pannakapasayaat ti kalsadada. Insupusop ni Brgy. Captain Galamgam a bunga daytoy a progreso iti napintas a panagtutunosda a bumarangay ken pannakikammayetda iti Gobierno Munisipal nga idauluan ni Mayor Edgardo “Ediboy” S. Cobangbang, Jr.

Iti pannakakongkreto  ti paset ti kalsada  (Pila-Sagayaden Norte Road) Barangay Pila,  ken  iti pannakaileppasto  ti dadduma pay a nasemento a disso  ti kalsada ket  mangitunda ti panagnam-ay dagiti lumugar ken agdaldaliasat kadagitoy a kalsada nangruna iti panagiruaran ti produkto, panglintegan ken pagnaan dagiti ubbing nga agbasa kasta met  dagiti lumugar ken mannalon  a  mawidawidan  dagitoy a kalsada.


Kas iti kiddaw  ti dadduma a barangay, kalikaguman met ni Brgy. Captain Galamgam  a makapagkakamang ti pannakapapintas ti dalan iti lugarda tapno maragsakan dagiti idauluanna.
Ti agtultuloy a pannakapasayaat ken pannakamantener dagiti kalsada ti barangay ken sitio ket prayoridad a programa ti Gobierno Munisipal nga idauluan ni Mayor Ediboy tapno maital-o ti kasasaad ti panagbiag dagiti umili. # (Web In-Action)



Friday, January 25, 2013

BHW’S KEN BNS TI CABUGAO, NAADALANDA ITI HEALTH EMPOWERMENT

Cabugao, Ilocos Sur – Naaramid ti panagadal ti umabot iti 120 a kameng ti Barangay Health Workers (BHW’s)  ken Barangay Nutrition Scholars (BNS) iti 33 a barangay ti ili a Cabugao, Ilocos Sur  iti Enero 24-25, 2013 iti Municipal Conference Hall, Cabugao, Ilocos Sur.

Iti 1st Day ti panagadal, Enero, 24, 2013,  nakitaripnong ni Mayor Edgardo “Ediboy” S. Cobangbang, Jr. ket impaayna ti Inspirational Message-na kadagiti nagpartisipar iti dua nga aldaw a Health Session. Kimmablaaw ken nagyaman ti Ama ti Ili ket mangnamnama a dagiti magun-odda nga adal dagiti nagatendar ket agpatakto iti gapuananda iti barangayda a tumulong a mangidanon ti serbisio ti salun-at  kadagiti kalugaranda tapno mamantener ti salun-at iti komunidadda.


Babaen iti Film Showing, imparang ni Dr. Ambrosio A. Brabante, Jr., M.D., FPOA  ti propesional ken praktikal a  panangisurona iti napateg nga akem  ti nutrision iti bagi ti tao kasta met iti Basic Physical Theraphy Modalities and Body Mechanics. Timmulong met a naglektiur dagiti Staff ti Northpoint Orthopedic Arthritis Center  (NOAC) a masarakan ti Main Clinic-na idiay 194, Dana-ili, Abulug, Cagayan Valley ken imatonan ni Dr. Brabante.


Iti 2nd Day, Enero 25, 2013, naisuro kadagiti nagatendar ti maipapan iti Bone Disorder and Pain, Metabolic Syndrome, Basic Skills: Rbs, Hgb, Hct Blood and Anemia Laboratory Interpretation ken Film Showing dagitoy kabayatan a diskutiren ni Dr. Brabante ken dagiti  kakaduana a naglektiur. Naserraan ti panagadal kalpasan iti naballigi nga Open Forum. 


Daytoy a panagadal ket insayangkat ti LGU-Cabugao a mangnayon iti kapabilidad dagiti BHW’s ken BNS a mangkomplementar kadagiti serbisio-medikal nga itden  ti Munisipio kadagiti umili nga agnaed iti barangay. # (Web In-Action) 



SEAWEEDS A PAMUONAN, NAITED KADAGITI FISHERFOLKS

Cabugao, Ilocos Sur – Naaramid ti   opisial a pannakaiwaras dagiti maimula a seaweeds (Eucheuma) iti baybay  kadagiti mabenepisiaran  a mangngalap ti Cabugao sadiay  Brgy. Dardarat, Cabugao, Ilocos Sur idi Enero 24, 2013.

Inimatangan dagiti Opisiales ti Munisipio kas kada Vice Mayor Danny Q. Gazmen, SB Member Benedict M. Savellano, SB Member Vicky S. Serna, SB Member Josefina S. Vallejo  ken Mrs. Lydia S. Gazmen, MSWD Officer daytoy a pannakaited ti proyekto.


Nagtinnulong met da Mrs. Milagros R. Paz ken Mr. Robert S. Savella, agpada a mangimaton ti Fishery Section ti DA-LGU a nangiwardas ti pannakaiwaras dagiti seaweeds. # (Web In-Action)