Friday, May 30, 2014

OFF-SEASON DAGITI VEGETABLE GROWERS, MAISAGANA

Cabugao, Ilocos Sur – Cabugao, Ilocos Sur – Naaramid ti panagmiting dagiti kameng ti Cabugao Vegetable Growers and Producers Association nga idauluan ni Mr. Armando Azcueta, Presidente, iti Mayo 30, 2014 iti 2nd Floor, Municipal Building, Cabugao, Ilocos Sur.

Kangrunaan a natratar ket iti pannakakolekta dagiti naipabulod a Principal ti Soft Loan ket maipabulod manen para iti panagmumula ita a Tawen 2014  maigapu ta Oktubre 2014 inton maisubli iti Munisipio ti pakabuklan ti nasao a nabulodda a puonan.

Segun ken ni Mrs. Ester P. Aguimbag, AT, Municipal HVCDP Coordinator, kasapulan a makapagmulada iti nateng kas iti tarong, karabasa, utong ken kanaigna a pangkonsumo a nateng a para iti merkado tapno saan a maatiw ti suplay ket mabalanse ti presio a para iti pagsayaatan met la ti kaaduan.
Imbatad ti kaaduan nga agmulmula ti nateng iti panagyamyamanda iti tulong-pinansial ti Gobierno Munisipal iti panagmulada ta makasublatda iti pangrugianda nga agmula ti nateng a naipangruna a ramen ti taraon dagiti umili. # (Web In-Action) 

SCHOOL SUPPLIES, KAADUAN ITA A GATANGEN DAGITI NAGANNAK

Cabugao, Ilocos Sur – Agsagsagana ita   dagiti nagannak, guardian  ken ubbing a napan/mapan  aggatang ti kasapulanda a bag, kuaderno, ballpen, lapis,  papel ken kanaigna pay a kasapulan dagiti  agbasa ken adda pay a  naisamira a naggatang ti aruaten, uniporme, sapatos ken kanaigna a kawes iti panagadal iti sakbay ti Hunio 2, 2014 a panagseserrek ti klase.

Iti kaadu ti aggatang iti NISTC-Public Market ken iti 2 Brothers Grocery, pumardas ti panagwerret ti ligay ti negosio maigapu iti panagsagana dagiti kasapulan dagiti agad-adal. Imbatad pay dagiti dadduma  a nagannak ken agad-adal nga adu met latta ti bilangda a nakagatangen sakbayna iti school suppliesda. Nupay kasta, ti napateg ket nabuslon ti magatang, nakagatang iti amin a maseknan  kadagiti kasapulanda.

Mangnamnama ti kaaduan a nagannak a naballigi daytoy a tawen a  panagrubuat ti panagbabasa dagiti ubbing ken mangawat  kadagiti panagbalbaliw iti benneg  ti Edukasion nangruna iti implementasion ti K to 12 Basic Education. # (Web Situational Report)

KARBENGAN TI BABBAI KEN UBBING, ITANDUDO TI CABUGAO MPS

Cabugao, Ilocos Sur – Segun ken ni SPO1 Bernadette R. Aquino, pannakabagi ti Women and Children Protection Desk,  PNCO, Municipal Police Station, Cabugao, Ilocos Sur, maysa a paset ti programa ti kapolisan iti agdama ket iti agtultuloy a  pannakairakurak dagiti karbengan a maammuan dagiti bababi ken ubbing tapno maliklikan ti pannakaabusoda iti imatang ti kagimongan.

Innayon ni SPO1 Aquino a nairut ti pannakikoordinarda iti DSWD agraman iti DOH ken iti LGU tapno maipasagepsep kadagiti asosasion ken umili nangruna kadagiti agnanaed iti barangay iti pateg ti kalintegan ken karbengan dagitoy a benneg tapno masursuruanda a mangilaban iti kalinteganda iti naintaknengan a a wagas.

Insupusop pay  ni SPO1 Aquino nga iti papanda panag-evaluate kadagiti insidente ken kaso iti pakaseknan ti babbai ken ub-ubbing ket bimmassit iti bilang ti pagteng ket mangnamnamada a dakkel ti “impact” iti information drive nga ar-aramiden ti sanga ti Opisina nga ibagianda.

Dagiti kangruaan a linteg a nairakrakurakda ket iti maipapan iti pakabuklan ti RA 9710, RA 9208 ken RA 7192 ken iti amin a linlinteg a kaarngina a mangprotehir iti kalintegan dagiti babbai tapno masalaknibanda iti aniaman a pannakaabuso. # (Web In-Action)

Thursday, May 29, 2014

PANAGDADALUS TI KALSADA, PAKASEKNAN TI KAADUAN

Cabugao, Ilocos Sur – Idadauluan ti Grupo ti Clean and Green Program ti Munisipio  nga imatonan ni MENRO-Designate  Edgar S. Balangatan iti pannakadalus dagiti kalsada iti Processional Route iti Poblasion kasta met iti Kalsada Nasional ken Provincial Road a mangkamang kadagiti barbarangay ti ili a Cabugao.

Kabayatanna, iti pannakaitandudo ti Clean and Green Program kadagiti barangay ken eskuela, ingunamgunam ni Mr. Balangatan kadagiti Opisiales ti Barangay nga agpapirma ti Clearance kenkuana   a kitaenda koma dagiti maitamtambak a basura kadagiti igid ti kalsada ken kanto iti barangay ta iremedioda nga ikkaten. Kas paset ti Cleaning Drive ti Barangay, mairaman koma  nga  aramiden  dagiti bumarangay nga agdaldalus  tapno makomplementaran ti ar-aramiden ti LGU ken dalusanda met dagiti mabatoganda a paset ti  Provincial/National  Road  a masakupanda a masarakan    iti Brgy. Turod-Salomague   ken iti Brgy. Cuancabal-Lipit-Cacadiran-Nagsincaoan Road.

Iti Coastal barangay, imbatad ni MENRO Balangatan a babaen iti pannakikoordinar-na ken regular a panagmonitor-da ket maar-aramid latta  ti bayanihan dagiti  bumarangay iti regular coastal clean-up malaksid iti panagtaripatoda   kadagiti mulada a  mangrove nga isayangkat  dagiti dadduma a sektor ti barangay.

Dagitoy nga inisiatiba ket mailungalong koma  a kanayon kadagiti barangay ken iti Poblasion tapno mamantener ti kinadalus a pakairanudan met laeng iti amin nga umili, segun pay ken ni MENRO Balangatan. # (Web In-Action)

MUNICIPAL FISHPOND, MAPUPOKAN URAY SUMMER

Cabugao, Ilocos Sur – Iti pannaki-amad ti Web In-Action iti Mayo 29, 2014,  imbatad ni Municipal Fisheries Program Coordinator Milagros  R.  Paz, AT  a napupokanen  ti lames ti Municipal Fishpond a naisaad iti lote ti Munisipio iti Brgy. Baclig, Cabugao, Ilocos Sur  gapu iti pannakaapit dagiti  dati a naipupok a Tilapia iti kallabes.

Innayon ni Mrs. Paz  nga umabot ti 300  a Tilapia Fingerlings ti baro a  naipupok iti Municipal Fishpond uray ti panawen ti kapudotna.

Nupay kasta, adu a fishpond owners ti Cabugao  iti nabenepisiaran kadagiti  fingerlings ti tilapia a napataud   iti kallabes a tawen babaen iti produksion  ti Municipal Fishpond iti panangilungalong  ti LGU-Cabugao ken panangipaay met  ti  Bureau of Fisheries and Aquatic Resources (BFAR)-RFO 1.

Dagitoy a serbisio a  pannakaidur-as ti panagtaraken ti lames ket kalikagum   ti LGU-Cabugao  a mangipakita ti pagtuladan ken tapno maidur-as ti panagsaknap ti  pagikanan iti tamnay ket  manayonan ti masapulan dagiti mannalon. # (Web Situational Report)

SPES, AGLEPPAS ITI AGTAPOS TI MAYO 2014

Cabugao, Ilocos Sur – Naipatungpal ti Special Program for the Employment of Students (SPES) a nagbuligan nga inggannuat ti Department of Labor and Employment (DOLE)-Vigan City ti LGU-Cabugao para kadagiti agkasapulan ti trabaho nga agad-adal ita a bakasion ti 2014.

Segun iti rekord ti Human Resource Management Office (HRMO ti LGU-Cabugao, umabot ti 50 nga estudiante ti naikkan  iti trabaho ita a Summer Vacation 2014  babaen iti panagtrabahoda  kadagiti Opisina ti  nadumaduma a Departamento ti LGU a pakaidesignaranda. Pagrebbengan ti DOLE nga ipaay ti 40 % ti gunggonada  nga agtrabaho idinto ta 60 % met ti aggapu iti LGU-Cabugao. Tallo a Batch ti naituyang a panagtrabaho dagitoy a nagaplikar nga estudiante a naggapu iti nadumaduma a barangay ti ili.  

Iti pannakiuman ti Web In-Action kadagiti estudiante iti Mayo 29, 2014, imbatad ti kaaduan nga iti agleppas ti SPES iti Mayo 30, 2014 ket manamnama a dakkel ti maitulongna ti 30 nga aldaw a panagtrabahoda  a pakateggedanda  iti gastosenda iti panagadalda iti daytoy nga School Year 2014 - 2015. # (Web In-Action)

Wednesday, May 28, 2014

TURNOVER TI MEDICAL EQUIPMENT, NAARAMID

Cabugao, Ilocos Sur – Naaramid ti pannakai-turnover dagiti Medical Equipment ( Stethoscope, BP Apparatus ken Weighing Scale) kadagiti kameng ti Barangay Health Workers (BHW’s) iti 33 a barangay ti Munisipalidad ti Cabugao.

Naaramid ti pannakaited dagitoy a ramit iti Municipal Conference Building iti Mayo 28, 2014 a nagatendaran dagiti Opisiales ti Gobierno Munisipal nga idauluan ni Mayor Edgardo “Ediboy” S. Cobangbang, Jr.; Medical Personnel iti RHU-MHO nga idauluan ni Dr. Bernardino M. De Gracia III, OIC, Municipal Health Officer ti LGU-Cabugao kasta metten dagiti kameng ti BHW’s iti ili a Cabugao.


Nangipaay ti Mensahe ni Mayor Ediboy ket binigbigna ti akem ken kinaregta dagiti BHW’s a katinnulong ti LGU-Cabugao a mangipatungpal kadagiti programa a mangpasayaat ken mangmantener ti serbisio para iti agtultuloy a kinasalun-at dagiti umili ti Cabugao.

Pinagyamananna  met iti napintas a tunos dagiti maseknan a Departamento ti Opisina ken dagiti maseknan nga Ahensia ti Gobierno Nasional a mangipapaay iti agtultuloy a  suporta kadagiti gannuat a mangpasayaat pay iti salun-at ti sapasap.
Nangipaay met ti mensahe da SB Member Dr. Jemaima S. Tan-Yee ken ni  SBM Benedicto M. Savellano ket kangrunaan nga anag ti panagsaritada iti panangilala koma  dagiti BHW’s kadagitoy a napateg a ramit a kasapulanda iti panagserbisioda iti barangay.

Bininsa met ni Dr. Bernardino M. De Gracia, OIC Municipal Health Officer iti pateg dagitoy nga alikamen a makatulong unay kadagiti kaduada iti Sektor ti Salun-at a mangasikaso kadagiti  umili nangruna kadagiti agnanaed iti  away ken barangay.


Inlawlawag met ni MSWD Officer Mrs. Lydia S. Gazmen ti agdama ita a kasasaad  ti  benepisiario iti Philhealth iti ili ti Cabugao a kanaig iti pannakaited ti napintas a  serbisio para  iti salun-at dagiti umili.

Binigbig met ni Vice Mayor Deogracias  Jose Victorino H. Savellano iti  dakkel a tulong nga ipapaay ita ti Gobierno Munisipal iti pannakaipadur-as ti salun-at dagiti umili. Dinakamatna a babaen iti naan-anay a panagkaykaysa dagiti sektor ket adda maited a mainayon a kasapulan dagiti agserserbi iti para iti salun-at.


Naaramid ti Ceremonial Awarding kadagiti nadakamat a ramit ket naipangruna a bimmayabay dagiti Opisiales ti LGU-Cabugao agraman iti Municipal Health Office a nangkadua kadagiti Opisiales ti BHW’s iti tunggal barangay babaen iti panangidaulo ni Mrs. Fortunata Castillo, Federated President.

Kalpasanna, naaramid ti Orientation ken aktual a pannakaisuro iti panagusar kadagitoy a ramit dagiti BHW’s.
Nagatendar met ni SBM Atty. Bryan Jett S. Pano, baro a kameng ti Sangguniang Bayan ti ili a Cabugao. # (Web In-Action) 

SEMINAR ITI CHILD POLICY, NASANGAILI NI MAYOR EDIBOY

Cabugao, Ilocos Sur – Naangay ti 2-Day Re-echo on Child Protection and Policy Seminar kadagiti amin a mangisursuro iti intero a pagadalan iti Cabugao DepED District iti Cabugao South Central School Social Hall a nangrugi iti Mayo 28, 2014.

Kangrunaan a panggep ti seminar ket iti pannakaiyadal dagiti pagannurotan iti pannakaprotektar dagiti ubbing iti saan a nainkalintegan a pannakaabuso ken kasta met a maipasagepsep ti  Anti-Bullying Policy tapno maisagana a nasayaat ti kasasaad ti ubing nga agadal ken maipamaysana ti agadal ita a Tawen 2014 ken iti masanguanan.


Kalpasan ti Opening Prayer, pannakakanta ti Philippine National Anthem, Cabugao Hymn ket nalukatan ti seminar babaen ti panagsarita ni Mrs. Estrellita M. Siruno, Principal II, Cabugao North Central School ken OIC Public Schools District Supervisor ti ili a Cabugao, Ilocos Sur.

Nasangaili ni Mayor Edgardo “Ediboy” S. Cobangbang, Jr. a nangited ti Inspirational Message ket kinablaawanna ti amin a nagatendar. Inyam-ammo ni Mayor Ediboy ti kabarbaro a kameng ti Sangguniang Bayan kadagiti mangisursuro nga isu ni SB Member Atty. Bryan Jett S. Pano. Nagyaman ti Alkalde Munisipal  iti maipakpakita a kinaregta dagiti mangisursuro a mangadal iti pateg ti karbengan dagiti ubbing kas mainayon a pannakaisaganada iti panagbasa dagiti ubbing.


Innayon ni Mayor Ediboy nga ited koma dagiti mangisursuro ti idea-da no tiempo ti miting ti Local School Board tapno mainayon a matratar ken  mangpasayaat pay iti buklenda a direksion iti panakapasayaat ti pageskuelaan ti ubbing iti Munisipalidad. Kalikaguman ti Ama ti Ili iti agtultuloy a napintas a panagdanggay ti DepED ken LGU a mangipatungpal kadagiti pagimbagan daytoy a Sektor tapno agtultuloy a mapatanor dagiti ubbing a responsable nga umili iti masanguanan.

Nagsarita met ni SBM Dr. Jemaima S. Tan-Yee, Committee Chair on Education ket bininsana ti pateg ti pannakaitag-ay ti karbengan dagiti ubbing tapno matubayda nga agbalin a mapangnamnamaan nga umili.

Naisaruno ti pannakagrupo dagiti mangisursuro babaen iti tunggal School Zone (1-4). Nailawlawag dagiti adalenda. Agpaut ti nasao a seminar iti dua nga aldaw (Mayo 28-29, 2014).

Nasangaili met da SB Member Benedicto  M. Savellano, Vice Committee Chair on Education ken ni SBM Atty. Bryan Jett S. Pano iti nasao a seminar. # (Web In-Action)

OPLAN BALIK-ESKWELA: ENROLLMENT KEN JUNE 2 OPENING

Cabugao, Ilocos Sur – Iti pannaki-uman ti Web In-Action iti Mayo 27, 2014, imbatad ni Brigada Eskwela Cabugao  DepED Coordinator Donato P. Sajor a kalpasan a maisagana ti pagadalan iti nairut a panagtitinnulong dagiti nagannak ken  mangisursuro  ket agsagsagana metten dagiti ubbing iti panangrugi  ti klase.

Kabayatan ti Enrollment Days  (Mayo 26-30, 2014)  iti Elementary Level  ket manamnama  nga umadu ti bilang ti agad-adal gapu ta  mainayon  dagiti Kindergarten Pupils, nag-transfer nga agad-adal  ken manayonan met dagiti mangisursuro nangruna iti Kindergarten Class.

Kanaig daytoy, adun ti nagannak/guardian  ti napan naggatang ti kasapulanda a bag, kuaderno, ballpen, lapis,  papel a kasapulanda nga agbasa  kasta met ti panaggatangda  ti baro nga aruaten, uniporme, sapatos ken kanaigna a kawes iti panagadal a mangrugi  iti aldaw ti Hunio 2, 2014.

Iti kaadu ti naggatang ti school supplies, pimmardas met ti panagwerret ti ligay ti negosio. Imbatad pay dagiti dadduma  a nagannak ken agad-adal nga adu met latta ti bilangda a nakagatangen iti school supplies-da sakbay ti panaglukat ti klase iti Hunio 2, 2014. 

Mangnamnama ti kaaduan a nagannak a naballigi daytoy a tawen a  panagrubuat ti panagbabasa dagiti ubbing ken mangawat kadagiti panagbalbaliw iti benneg  ti Edukasion iti implementasion ti K to 12 Basic Education. # (Web Situational Report)

Tuesday, May 27, 2014

ACTION COMMITTEE TI 4’PS, 2ND PLACE TI CABUGAO

Cabugao, Ilocos Sur –Nawanasen ti 33 a barangay a nakaaramidan ti Family Development Session (FDS) iti programa ti Pantawid Pamilyang Pilipino Program (4 P’s) nga ar-aramiden ti 4 P’s Municipal Link-Cabugao a pagkadkaduaanda  iti MSWDO ken ti DSWD nga ipatungpal.
Naiyadalen ti pateg ti aspeto ti Edukasion ken Salun-at a kangrunaan a ramen ti programa  kadagiti kameng ti 4 P’s. Segun ken ni Ms. Juliet Madriaga, 4 P’s Municipal Link Staff, ket mairugi ita a bulan ti  Hunio 2014 iti papanda panangyadal maipapan iti Values Education kadagiti Beneficiaries ti 4 P’s.

Innayon ni Ms. Madriaga a nagun-od ti Municipal Action Committee ti 4 P’s- Cabugao iti maikadua a puesto iti “Compliance”  kadagiti maipakpakat  a pagannurotan kadagiti 4 P’s Recipients iti 34 nga ili ti Probinsia ti Ilocos Sur. Nagun-od pay ti 4 P’s- Cabugao ti maikapito a puesto iti  benneg ti Health ken maika-10 iti benneg ti Edukasion.
Nagun-od ti Vigan City iti umuna a puesto iti kinalaing ti Municipal Action Committee (MAC). Maikadua ti ili a Cabugao maigapu pay  iti suporta ti  LGU.

Kanaig daytoy, dagiti mangbukel iti MAC ket dagiti Opisina ken Ahensia a makatulong a mangsolbar kadagiti problema, isyu ken pakaseknan dagiti 4 P’s Members agraman kadagiti Implementors. Agmiting dagitoy a grupo iti kada bulan ket dagiti mapagtutulagan a mangpasayaat ti serbisio iti 4 P’s ket maaprobaran babaen iti Hepe Ehekutibo ti LGU a maseknan sakbay a maiyimplimentar. # (Web In-Action)

ARTIFICIAL REEF ITI 2 A COASTAL BARANGAY, DUMURDUR-AS

Cabugao, Ilocos Sur – Ti agtultuloy a programa ti BFAR Region 1 ken LGU-Cabugao a panangtulong kadagiti asosasion  dagiti mangngalap iti coastal barangays ket agresresulta ita iti napintas ken positibo nga aksion  a maipaay kadakuada a pakaseknan iti pagbiaganda. 

Sakbayna, naitapog dagiti 10 nga artificial reef a nagbuligan nga impaay ti Bureau of Fisheries and Aquatic Resources (BFAR) Regional Office 1 nga idauluan ni Regional Director Nestor Domenden kasta met iti LGU-Cabugao nga idauluan ni Mayor Edgardo “Ediboy” S. Cobangbang, Jr.  iti paset ti kabaybayan ti Brgy. Daclapan ken Brgy. Namruangan idi Hulio 4, 2013.

Iti agdama, segun ken ni Municipal Fisheries Coordinator Milagros R. Paz, AT, a dumurdur-as ti kasasaad dagitoy nga artificial reef a pagaponan dagiti agtan-ay a lames-baybay babaen iti panangmonitor dagiti maseknan a mangngalap iti pannakaasikaso  dagitoy a naited a tulong kadakuada. 

Panggep pay daytoy a proyekto a punnuan ti nakirang a pagaponan ti ikan kadagitoy a deppaar babaen iti pannakaipasdek ti artificial reef a santuario dagiti lames-baybay iti kabaybayan iti  nagbedngan dagitoy a barangay. # (Web In-Action)

Monday, May 26, 2014

BRIGADA ESKWELA, NAGLEPPAS ITI MAYO 24

Cabugao, Ilocos Sur – Nagleppas ti Brigada Eskwela 2014 iti Mayo 24, 2014 babaen iti naruay  a gapuanan dagiti nagannak ken mangisursuro a nagurnos, nagdalus iti uneg ken arubayan ti eskuela ken nangpasimpa kadagiti pagpaknian (Comfort Rooms) para iti Hygiene ken sanitasion, alad ti eskuela ken kanaigna a banag  a natarimaan iti uneg ti pageskuelaan.

Iti pannaki-amad ti Web In-Action iti Mayo 24, 2014, imbatad dagiti dadaulo dagiti pageskuelaan nga uray nagleppas ti Brigada Eskwela ket agtultuloy latta   iti panangmantenerda iti uneg ti kuarto. Agtultuloy latta met ti panagisimpada iti arubayan  kabayatan iti pannakaaramid ti Enrollment days agingga a mangrugi ti klase iti Hunio 2, 2014.

Iti sabali a bangir, naballigi a nayimplimentar ti Brigada Eskwela 2014  kadagiti pagadalan   iti 33 a barangay ti ili, segun ken  ni Municipal Brigada Eskwela  Coordinator Donato P.  Sajor.

Innayon ti Head Teacher ti Pila E/S a napateg a bigbigen ti sakripisio dagiti nagannak ken timmulong  kadagita a pagadalan para iti interes dagiti ubbing nga agbasa.

Impeksa  pay ni Mr. Sajor ti panangbigbig ken panagyamyamanda   iti Dep-ED Cabugao  iti agtultuloy a suporta ti LGU-Cabugao nga idauluan ni Mayor Edgardo “Ediboy” S. Cobangbang, Jr. kadagiti proyekto  a pagkammayetanda nga irusat iti DepED iti pannakapasayaat  dagiti pageskuelaan iti intero a Munisipalidad. # (Web In-Action)

BARO A TRICYCLE, NAITED ITI CISTODAI

Cabugao, Ilocos Sur – Iti episiente a pannakaipatungpal dagiti programa ken aktibidades ti Cabugao Ilocos Sur Tricycle Operators Drivers Association, Inc. (CISTODAI)  ken iti agtultuloy a  panagtarabay ti LGU-Cabugao, naikkan ti libre a Tricycle ti nasao nga NGO babaen iti panangited  ti Guanzon Motors, Kompania ti aglaklako ti motor iti lokalidad. 


Inimatangan ni Mayor Edgardo “Ediboy” S. Cobangbang, Jr. agraman dagiti kameng ti Sangguniang Bayan nga isuda SBM Danny Q. Gazmen, SBM Dr. Jemaima S. Tan-Yee, SBM Benedicto M. Savellano,  SBM Jayhan Alcid-Tan, SBM Josefina S. Vallejo, ken SBM Atty. Bryan Jett. S. Pano iti pannakaipan iti naso a Tricycle iti Munisipio babaen kada Mr. Mario Roxas, Assistant Treasurer, CISTODAI/Saranay ken ni Mr. Dominador  Andres, Presidente, CISTODAI. 

Pinadayawan met ni Mayor Ediboy ti napintas a kasasaad ti asosasion ti CISTODAI ket binigbigna ti naisagut kadakuada a pagluganan gapu iti inisiatibada. Dinakamat ti Alkalde Munisipal iti pateg ti kaadda ti juridical identity ti maysa nga asosasion  (rehistrado ti CISTODAI iti SEC). 


Segun ken ni Mr. Mario Roxas, nagun-odda daytoy a sagut ti Kompania maigapu iti kinaaktibo ti asosasionda nga NGO iti Transport Sector ken iti napintas a panangannurotda kadagiti paglintegan ti lokal a transportasion.

Innayonna a mapagsasaritaanto iti asosasionda iti kasasaad ti Tricycle ken iti panangusarda itoy.

Ti CISTODAI ket akreditado nga NGO ti ili a Cabugao nga addaanen iti 1,250 a kameng manipud iti  barangay ken iti Poblasion ket isuda ti kangrunaan a mangipapaay ti serbisio ti transportasion kadagiti umili iti las-ud ti Munisipalidad. # (Web In-Action) 

NUMBER CODING DAGITI MOTORIZED BANCA, NAILEPPAS

Cabugao, Ilocos Sur – Naileppasen ti Lettering of Code Numbers of Motorized Bancas iti Pito a Coastal Barangays kas  iti Brgy. Dardarat, Salomague, Sabang, Namruangan, Daclapan, Pug-os ken Salapasap babaen iti panangipatungpal ti LGU-Cabugao.

Segun ken ni Municipal Fisheries Coordinator Milagros R. Paz, AT, kinomplementaran ti LGU-Cabugao daytoy a direktiba ti Bureau of Fisheries and Aquatic Resources (BFAR) tapno maikkan ti importansia dagitoy a pagluganan iti baybay. Mainayon a panggep daytoy a tignay ket dagiti sumaganad:

1.Maestablisar ti pakakabigbigan ti Motorized Banca no masakawan ti kalamidad iti baybay.

2.Napinpintas a buyaen no adda kabukbukodanda a kolor ken numero a  pakabigbigan ti kada barangay.

Manamnama a babaen iti daytoy a Coding System  ket makatulong pay iti episiente a pannakaipakat dagiti paglintegan iti  BFAR ken LGU-Cabugao iti kabaybayan. # (Web In-Action)

BFARMC KEN LFARMC, BARO A SANGA TI MFARMC

Cabugao, Ilocos Sur – Naangay ti Miting ti Municipal Fisheries and Aquatic Resource Management Council (MFARMC) ti ili a Cabugao, Ilocos Sur   a nagatendaran dagiti Opisiales ti Fishermen Association iti pito a Coastal Barangay ti Munisipalidad ti Cabugao nga idauluan ni Mr. Danny Garcia, Presidente.

Naangay ti nasao a miting iti 2nd Floor, Municipal Building, Cabugao, Ilocos Sur idi Mayo 23, 2014. 



Nagatendar ni Ms. Florence Soria, Provincial FARMC Coordinator ket napagsasaritaan dagiti sumaganad:

1.Update ti MFARMC ken Fishermen Association kas episiente a partner ti LGU-Cabugao  a katinnulongna iti pannakamanehar ken iti  conservation iti fishery resources iti lokalidad.

2.Pannakabukel ti Barangay FARMC ken Lakewide FARMC kas Advisory Committee ti LGU-Cabugao.

3.Nailawlawag ti trabaho ti BFARMC’s/LFARMC’s, mangidaulo nga opisiales, pannakikammayetda kadagiti Integrated FARMC’s a mangtarawidwid iti Baybay, Gulf, Lakes, ken Rivers.



Naadalan pay dagiti nagatendar iti pakabuklan ti Fisheries Administrative Order No. 196, Series of 2000 nga inyetnag ti DA-Central Office a nabukel a pagannurotan idi panawen ni Nag-Secretary ti DA Edgardo J. Angara.

Nakiragup met iti daytoy a miting da Municipal Agriculturist Zenaida S. Andrada ken ni Municipal Fisheries Coordinator Milagros R. Paz, AT. # (Web In-Action)

Friday, May 23, 2014

PROYEKTO TI 4-H CLUB, MANAYONAN

Cabugao, Ilocos Sur – Nagmimiting dagiti Opisiales ti Pederasion ken dagiti pannakabagi dagiti Asosasion ti 4-H Club iti Barangay ti ili a Cabugao, Ilocos Sur idi Mayo 22, 2014 iti 2nd Floor, Municipal Building, Cabugao, Ilocos Sur.


Nag-Preside ni Mr. Obas Bill Y. Baclig, AT, Municipal 4-H Club Coordinator ket bininsana ti pateg dagiti proyekto ken aktibidades ti 4-H Club a maipakpakat ken mangpapigsa kadagiti asosasion tapno masurotanda ti direksion ti programa ti 4-H Club a kayat a tun-oyen ti Departamento ti Agrikultura (DA) ken iti kapartner-na nga LGU a mangtulong kadagiti agtutubo (agbasbasa ken saan) tapno agbalinda a produktibo ken responsable  nga umili.


Segun ken ni Mr. Baclig, manayonan pay ti programa  ti 4-H Club ita a Tawen 2014 ket maited daytoy babaen iti panagkammayet ti DA-RFO 1 ken iti LGU-Cabugao tapno agtultuloy nga adda as-asikasuen dagiti agtutubo ket masursuroda met a probitsaren dagiti Ahensia a makatulong kadakuada babaen iti agtultuloy a panangtarabay ti LGU-Cabugao kadakuada. # (Web In-Action)

PUG-OS E/S, NABISITA ITI BRIGADA ESKWELA 2014

Cabugao, Ilocos Sur – Maysa kadagiti napili a pageskuelaan ti Ilocos Sur DepED Division Office ti Pug-os Elementary School, Brgy. Pug-os, Cabugao, Ilocos Sur nga idauluan ni Miss Mildred Naval, Head Teacher  a nabisita iti mailunlunsad a Brigada Eskwela  2014 iti intero a  Pilipinas mangrugi iti Mayo 19, 2014 agingga iti Mayo 24, 2014.

Napili ti  nadakamat a pageskuelaan gapu iti napintek a panagtitimpuyog dagiti Stakeholders: nagannak, mangisursuro, Barangay Officials   ken Gobierno Lokal iti agtultuloy a pannakapasayat ti pageskuelaan.

Iti dayta a taripnong, nagatendar dagiti pannakabagi  ti Cabugao DepED District a nangsangaili kadagiti Bisita a naggapu iti DepEd Division Office nga idauluan ni Mr. Meneleo Palma.

Sibubukel a puersa ti Konseho  ti Barangay Pug-os agraman dagiti lumugar  nga idauluan ni Brgy. Captain Arnold “Bambi” V. Yangat a nakipartisipar a nagdalus iti  aglawlaw ti pagadalan, nagpukan iti natay a pinuon ti kayo, nagpinta iti classroom ken kanaigna a trabaho iti pannakaisagana ti eskuela.

Indauluan met  dagiti mangisursuro ti dadduma a nagannak a nakipaset iti nasao nga aktibidad.

Segun ken ni Miss Mildred Naval, agyamanda iti  agtultuloy a panagkikinnammayet dagiti  Stakeholders, dagiti mangisursuro, PTA Officers, dagiti Opisiales ti Barangay ken iti agtultuloy a suporta ti LGU-Cabugao nga idauluan  ni Mayor Edgardo “Ediboy” S. Cobangbang, Jr. iti pannakapasayaat dagiti pageskuelaan iti Munisipalidad ti Cabugao.

Nagatendar met da Mr. Donato Sajor, Municipal Brigada Eskwela Coordinator ken ni Mrs. Julia Cayso, Head Teacher ti Cuantacla Elementary School a nangbayabay kadagiti sangaili a naggapu iti Ilocos Sur DepED Division Office a nagbisita iti Pug-os E/S.

Ti Brigada Eskwela ket tinawen a programa ti DepED a pakikammayetan dagiti maseknan a katinnulongda iti benneg ti Multisektoral  tapno maisagana ti pageskuelaan para iti panagseserrek ti klase dagiti ubbing iti bulan ti Hunio 2014. # (Web In-Action)

DADDUMA A PLANO TI MDRRMC-CABUGAO, MAARAMID

Cabugao, Ilocos Sur –Nakasagana ti puersa ti Municipal Disaster Risk Reduction  and Management Council (MDRRMC)  nga idauluan da Engr. Nestor B. Somera ken ni Engr. Crescencio C. Formoso  no inkaso a dumteng ti kalamidad. Dagiti sumaganad nga plano/estratehia ti nabukelda tapno agtultuloy nga epektibo ti akemda:


1.Pannakaipasdek ti Signages kadagiti Evacuation Centers no  inkaso nga adda kalamidad.
2.Pannakaup-date ti Hazard Map a pannaka-biblia dagiti Implementors tapno sumayaat ti serbisioda no tiempo ti kalamidad.
3.Pannakaaramid ti Early Warning System iti sirok ti Osmena Bridge babaen iti color coding (water scales)  tapno masaganaan ti umay a didigra.
4.Pannakapataud ti dadduma a kasapulan iti Operation Center iti Munisipio ken pannaka-update dagiti Hotline Numbers.

Dagitoy nga inisiatiba ket gubuayen ti nasapa a panagsagana iti panawen ti emerhensia tapno maprotektaran ken maalay-ayan  ti epekto dagiti dumteng a kalamidad no adda man kadagiti umili babaen iti panangtarabay  ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti MDRRMC.  # (Web In-Action)

Thursday, May 22, 2014

ORGANIC FERTILIZER, NAITED KADAGITI MANNALON

Cabugao, Ilocos Sur – Naiyallawat kadagiti mannalon nga agpatpatanor ti lasona ken bawang  dagiti kasapulanda a 200 Bags  nga Organic Fertilizer ken 8 a Bags ti  Commercial Fertilizer   a para kadakuada babaen iti panangited  ti High Value Crops Development Program (HVCDP)-DA-RFO 1, San Fernando City, La Union nga idauluan ni HVCDP Regional Coordinator Angel O. Padilla. 


Inimatangan da  Mayor Edgardo “Ediboy” S. Cobangbang, Jr. agraman dagiti kameng ti Sangguniang Bayan nga isuda SBM Benedicto  M. Savellano, SBM Dr. Jemaima S. Tan-Yee, ken ni SBM Josefina S. Vallejo iti pannakaited dagiti Bags ti Organic ken Commercial  Fertilizer.

Nakiragup met dagiti pannakabagi ti DA-LGU Cabugao, dagiti 18 nga umawat a mannalon nga idauluan  ni Cabugao Farmers Federated President Elmer Guerrero Bromeo ken ni Municipal HVCDP Coordinator Ester P. Aguimbag, AT,  iti nasao a panagtataripnong. 

Naited dagitoy a natural ken komersial  nga abuno kadagiti mannalon tapno usarenda  iti dagada iti  pannakaingato ti produksion ken kalidad ti maapitda ken tapno makessayan iti gastosenda iti panagmulada. # (Web In-Action)

ANTI-AIDS LAW (RA 8504), NAISEMINAR ITI LGU-CABUGAO

Cabugao, Ilocos Sur – Naaramid ti pannakaipaawat ken pannakaiyadal ti pakabuklan ti Republic Act 8504: The Philippine AIDS Prevention and Control Act of 1998 ken dadduma pay a kanaigna a linteg kadagiti Empleado ti LGU-Cabugao partikular kadagiti Department Head, kameng ti PNP-Cabugao, RHU-Cabugao ken kadagiti pannakabagi ti Cabugao DepED District iti Mayo 22, 2014 iti Municipal Conference Hall, Cabugao, Ilocos Sur.


Naglektiur dagiti pannakabagi ti Provincial Health Office, Ilocos Sur ket naibinsabinsa  ti pakabuklan ti Linteg a pinanday ti Kongreso kadagiti nagdengngeg. Sakbayna, naikkan met ti orientasion ken pamalpalatpatan kadagiti Opisiales ti Barangay iti ili a Cabugao  maipapan kadaytoy a pakaseknan nga irakrakurak  ti Departamento ti Salun-at (DOH)  a para iti proteksion ken  pagsayaatan iti sapasap.


Dagiti natratar a nakabuklan ti linteg ket dagiti sumaganad a Topiko:

1.Basic Facts on HIV/AIDS.
2.Republic Act 8504.
3.AO No. 0016 of 2009 –DOH.
4.AO No. 16 of 1997 – DOH.
5.Memo Circular No. 2013-29a – DILG.
6.Memo Circular No. 2013 – 29b – DILG.
7.Resolution No 1, Philippine National Aids Council.


Kalpasan ti nasao a seminar ket mailungalong iti panakabuangay ti Municipal Assistance Team a kabinnulig dagiti maseknan nga Ahensia iti DILG ken ti DOH  iti pannakaidur-as ti “advocacy”  ken iti pannakaadaptar dagitoy a linteg ken iti pannakaipatungpalna iti sapasap. # (Web In-Action)

RISIRIS ITI MAGIC 4 ITI BASKETBALL TOURNAMENT

Cabugao, Ilocos Sur – Iti pannaki-amad ti Web In-Action idi Mayo 21, 2014,  imbatad dagiti Coaches   a naballigi a nalpas ti Elimination Round babaen iti Round Roving  kadagiti nagsasalip a Team iti Inter-barangay basketball competition. Kalpasan ti Quarterfinals a nakapilian ti Magic 12 a Team ket maar-aramid met itan ti Semi-Finals a paglalabanan ti uppat a naarisit a Team a sumrek iti Best of Three.


Sakbayna, buklen ti 6  a Bracket dagiti Team.

Kas iti gagangay, innayon dagiti napagdamagan a naregget latta dagiti Basketball Cheerers ken  Sympathizers, agindeg kadayta a barangay agraman dagiti Opisiales dagiti barangayda a mangtartarabay/mangsursurot  kadagiti Players-da nga agensayo ken makidangadang iti basketball iti Cabugao Cultural and Sports Complex a pakaang-angayan dagiti naka-schedule a Games iti minalem.


Kabayatanna, mainayon met a mabuya iti ay-ayam ti kategoria ti Inter-Agency Games kas iti panagsalip dagiti Players iti Mayor’s Team, Vice Mayor’s Team, BFP-Cabugao Team, PNP-Cabugao Team, Judiciary  ken ti  LGU Team. Maar-aramid met iti Double Round Roving a panagrisiris  dagitoy a Team.

Segun iti kaaduan a mapan agbuybuya,  imbatadda nga agtultuloy a naurnos ken natalna iti mapaspasamak a sinnalip gapu iti naipakpakauna a pannakaannurot  ti sportsmanship ken disiplina iti tunggal Player  para iti daytoy a kangrunaan a summer sports.


Kabayatanna, dupudop ti nagbuya iti Sports Complex idi malem ti Mayo 21, 2014 a no sadino a ditoy ket  napigsa ti risiris dagiti Team iti Brgy. Baclig ken iti Brgy. Namruangan ket nangatiw ti Brgy. Baclig iti eskor nga 89 points  idinto ta 86 puntos  ti nagaw-at ti  Brgy. Namruangan.   # (Web Situational Report)

Wednesday, May 21, 2014

UPDATE TI SPED CENTER TI DEP-ED CABUGAO

Cabugao, Ilocos Sur – Babaen iti Dep-ED Memo No. 52, s. 2013, napili dagiti mangisursuro iti Cabugao South Central School  iti Scholarship Program for Special Education  (SPED) Teachers, Administrators and Supervisors a mangileppas ti 18 Units iti Batch of the Returning Scholars iti aspeto ti Gifted and Talented, Learning Disability, and Visual Impairment.

Inadalda pay dagiti napateg nga aspeto ti programa kas iti Hearing Impairment, Intellectual Disability, Visual Impairment, and Multiple Disability with Visual Impairment.

Daytoy a two-term scholarship program (first term-summer; second term-from August to December) ket naangay dagitoy a panagsanay kadagiti eskolar manipud iti nadumaduma a rehion ken naituding a venue, Center of Excellence (COE’s) iti masakupan ti Luzon, Visayas ken Mindanao idi Tawen 2013.

Iti pannaki-amad ti Web In-Action ken  ni Mrs. Melvi S. Sajonia, Principal II iti Cabugao South Central School itay nabiit,   imbatad ti Principal a napili a maysa kadagiti sentro ti Special Education (SPED) Center iti intero a Dep-ED Region 1 ti Cabugao, Ilocos Sur gapu iti naregta a pannakaisuro dagiti ubbing nga adda pagkuranganna ngem nasayud pay laeng nga aturen babaen iti sistema ti pannakaedukar kadakuada iti umisu a pamay-an.

Maiwaywayat iti agdama iti  panag-censusda kadagiti barangay kadagiti  ubbing a sumrek iti SPED Center para iti School Year 2014 -2015. # (Web In-Action)

COMMUNITY-BASED PROGRAM TI TESDA, NAILUNSAD

Cabugao, Ilocos Sur –Nailunsad ti pannakaipakaammo ti  Community-based  Training and Enterprise Development  Program ti  Technical Education and Skills Development Authority (TESDA)  ditoy Cabugao, Ilocos Sur ket nairugi idi Mayo 16, 2014 iti tallo a barangay kas iti Brgy. Pug-os, Brgy. Namruangan ken iti Brgy. Cuancabal a no sadino a ditoy ket dagiti bumarangay nga adda iti salinong ti 4 P’s ken Marginalized Sector iti barangay  iti nagatendar kadaytoy a panakairakurak iti pakabuklan ti baro a programa  ti Ahensia.
Iti panagsarita ti pannakabagi ti TESDA, imbatadna a para iti nakurapay  ken nakirang ti pagpuonanna nga agsapul iti pagbiag daytoy a programa. Kalpasan iti maited nga skills training ket maited a dagus ti livelihood assistance iti maseknan a Trainee.


Innayon pay  ti TESDA Representative a nadisenio pay daytoy a programa a makikammayet kadagiti LGUs a mangtingiting iti mabalin a maitulong kadagiti napanglaw a pamilia tapno agbalinda a produktibo ken responsable nga umili.

Nagatendar met ken nagsarita iti nasao a panagtitipon ni MSWD Officer Mrs. Lydia S. Gazmen ti LGU-Cabugao agraman iti MSWDO ken 4 P’s Municipal Link Staff kadaytoy a taripnong iti tallo a barangay.

Nagatendar  pay dagiti Barangay Officials a nangtarabay kadagiti kalugaranda  a nagdengngeg iti pagsayaatan nga ipaay daytoy a programa. # (Web In-Action)

MDRRMC, AGSAGSAGANA ITI YUUMAY TI KALAMIDAD

Cabugao, Ilocos Sur –Nakasagana ita  nga agtignay ti puersa ti Municipal Disaster Risk Reduction  and Management Council (MDRRMC)  nga idauluan da Engr. Nestor B. Somera ken ni Engr. Crescencio C. Formoso  no inkaso a dumteng ti kalamidad. Kasta met iti panangisaganada iti Operation Center ken kasapulanda a mausar  ditoy Munisipio no kontaken dagiti  natudingan a katinnulongda kadagiti calamity prone areas iti Barangay ken Poblasion.

Daytoy a panagsagana ket maiturong iti bigla nga  isusungad dagiti kalamidad kas iti bagyo, nakaro a tudtudo, layus, tikag,   uram ken kanaigna a didigra iti masungad a bulbulan no adda man.

Iti pannakiuman ti Web In-Action itay nabiit, imbatad ni Engr. Nestor B. Somera a malaksid iti panangalertoda kadagiti kakaduada a mangbukel ti MDRRMC iti Munisipio nga agmobilisar/agmonitor  iti aw-away agingga iti Poblasion no dumteng ti kalamidad, naaramid payen   ti pannaka-dredge  ken pannakaaramid ti slope protection iti sumagmamano a parte dagiti Creeks iti Poblasion tapno nasayud ti panaglusot ti bagi ti danum nga aggapu iti surong no katudona.

Innayon pay ni Engr. Somera nga aramidenda ti naan-anay a pannaki-koordinar kadagiti dadduma  a Departamento ti Opisina ti LGU kas iti MSWDO, PNP, BFP ken MHO a kaduada a  maseknan no dumteng ti kalamidad  tapno naur-urnos ti panagtignayda  a mangaksion kadagiti pakaseknan dagiti umili nagruna kadagiti barbarangay.

Nupay kasta, mairamraman met latta  ti MDRRMC-Cabugao  a maikkan iti pammigbig iti gapuanan ken pannakitinnulongda iti naballigi a pannakaipatungpal ti akemda kadagiti kallabes a tawen a timmaud ti kalamidad. 

Dagitoy nga inisiatiba ket gubuayen ti nasapa a panagsagana iti panawen ti emerhensia tapno maprotektaran ken maalay-ayan  ti epekto dagiti dumteng a kalamidad no adda man kadagiti umili babaen iti panangtarabay  ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti MDRRMC.  # (Web In-Action)

Tuesday, May 20, 2014

BARO A KAMENG TI KONSEHO MUNISIPAL, NAGSAPATA

Cabugao, Ilocos Sur – Naaramid ti panagsapata ni Atty. Bryan Jett S.  Pano, kabarbaro a kameng ti Konseho Munisipal iti ili a Cabugao, Ilocos Sur  iti Opisina ti Mayor  babaen iti Partido Nationalist People’s Coalition (NPC) ken naannong ti panagsapata ti Konsehal babaen ken  ni Mayor Edgardo S. Cobangbang, Jr. iti Mayo 19, 2014.


Iti nasao nga Oath-taking, inimatangan dagiti kameng ti Sangguniang Bayan nga isuda SBM Danilo Q. Gazmen, SBM Dr. Jemaima S. Tan-Yee, SBM Benedict M. Savellano , SBM Josefina S. Vallejo ken ni  ABC President, Brgy. Captain  Thaddeus U. Soller.


Iti dayta met laeng a petsa, nagsapata ni Atty. Pano  iti takemna a kabarbaro a kameng ti Sangguniang Bayan ti ili a Cabugao ken ni Governor Ryan Luis V. Singson iti Provincial Capitol, Vigan City ket binayabay ti inana, Former SB Member Luciamar Santella-Pano iti seremonia ti panagsapatana.


Kadua  ni Governor Ryan da Mayor Ediboy ken ni Vice Mayor Deogracias Jose Victorino H. Savellano agraman dagiti kameng ti Sangguniang Bayan ti ili a Cabugao  iti dayta nga Oath-taking Ceremony iti Kapitolio Probinsial.


Ni SBM Pano ket agindeg iti Brgy. Rizal, Cabugao, Ilocos Sur ken naapointaran a mangituloy ti Termino ti nabakante a puesto ti Sangguniang Bayan ti ili a Cabugao  gapu iti ipupusay  ti Amana, daydi Dios-ti- Aluadna, Former Sangguniang Bayan  Member Dr. Carlito S. Pano. # (Web In-Action)

RESULTA TI SOIL FERTILITY TEST, NAIMITING

Cabugao, Ilocos Sur – Maar-aramid ti panangipaawat  dagiti Personnel ti DA-LGU nga idauluan ni Mrs. Zenaida S. Andrada, Municipal Agriculturist kadagiti mannalon iti tunggal barangay ti resulta Soil Fertility Test ti dagada tapno naan-anay a maipasagepsep ti kaipapanan daytoy a proyekto ti LGU-Cabugao para iti panagsagana dagiti mannalon iti umay a panagtalon iti Wet Season Crop 2014 (Hunio- Nobiembre).

Segun iti impormasion manipud iti  DA-LGU Cabugao, addan 23 a barangay a namitingda ket gudua ti aldaw iti naituding a panangkasaritada kadagiti mannalon iti tunggal barangay. Sakbayna, naimpormaran ti Barangay Captain ken ti Konsehona agraman dagiti Opisiales ken kameng ti Asosasion ti mannalon iti maangay nga information dissemination ket ilawlawagda ti tunggal detalye dagiti opisial a resulta a naggapu iti Bureau of Soils and Water Management (BSWM). Maikonsidera met dagiti suhestion ken kanaigna a pakaseknan a matakuatan iti pannakaipakat dagitoy a resulta iti panagusaran iti abuno.

Manamnama nga iti pannakairingpas iti info-drive iti 33 a barangay ti ili ket masurnadanto manen dagiti mannalon no masursurot met laeng dagiti wagas a maannurot iti aplikasion iti Soil Fertility Mapping Project.

Dagitoy nga addang ket parte iti naregta a programa iti Agrikultura  iti LGU Cabugao nga idauluan ni  Mayor Edgardo “Ediboy” S. Cobangbang, Jr. tapno maital-o iti masapulan dagiti mayoridad nga umili ken mamantener iti nangato a  produksion ti pagay ita a tawen. # (Web In-Action)

NGO, NAKIPASET ITI BRIGADA ESKWELA

Cabugao, Ilocos Sur – Nakipaset ti Cabugao Badminton Club (Baddicts) iti maikadua nga aldaw ti maisaysayangkat a “Brigada Eskwela”  iti Cabugao South Central School, Brgy. Bonifacio, Cabugao, Ilocos Sur,   maysa kadagiti   26 a pageskuelaan iti Cabugao DepED District iti Mayo 20, 2014.

Iti pannaki-amad ti Web In-Action kadagiti nagpartisipar iti nasao a Brigada Eskwela, impakaammo ni  Mr. Dondon Edward Pichay, Presidente/Trainor iti nasao nga Sports Organization a maysa kadagiti Action Plans-da ket iti tumulong kadagiti pang-sibiko nga aktibidades kas iti pannakaaramid ti Brigada Eskwela tapno masursuruan dagiti kamengda a makilangen ken mangipaay iti serbisioda para iti pagsayaatan ti kaaduan. Innayon ti Presidente a babaen pay  iti pannakigamuloda kadagiti aktibidades ket mailiklikda iti madi a bisio ken agbalin a pakairanudan ti panawenda.

Sakbayna, inangayda ti Fun Games nga insayangkat ti grupoda idiay Cabugao Institute idi Mayo 18, 2014 kas paset iti aktibidadesda para iti Summer.

Ti Cabugao Badminton Club ket nabukel  idi Tawen 2005 ken nareorganisar ti Opisialesna  iti Tawen 2009. Umaboten ti 100 ti kamengna. Malaksid iti pannakigamuloda kadagiti pang-sibiko nga aktibidades ket kalikagumanda pay nga idur-as  daytoy a klase ti Sports a mangtubay iti kabaelan dagiti ubbing ken agtutubo  nga agduyos itoy tapno agbalinda a responsable ken mapangnamnamaan nga umili ti Cabugao, Ilocos Sur iti masanguanan. # (Web In-Action)

CERTIFICATE OF COMPLETION, NAITED KADAGITI RN-HEALS

Cabugao, Ilocos Sur – Naiyawat  dagiti Certificate of Completion kadagiti kameng ti RN-HEALS (Registered Nurses for Health Enhancement and Local Service Project)  babaen iti panangited  kadakuada iti LGU-Cabugao nga idauluan ni Mayor Edgardo “Ediboy” S. Cobangbang, Jr. Naaramid ti pannakaited dagiti Certificate  iti Opisina ti Mayor idi Mayo 19, 2014 kadagitoy a Nurses nga agserserbi iti Rural Health Unit (RHU) iti LGU-Cabugao nga idauluan ni Dr. Bernardino M. De Gracia, OIC Municipal Health Officer,  Cabugao, Ilocos Sur.


Ti RN-HEALS ket proyekto ti Department of Health (DOH), Regional Office No. 1 babaen ken ni Dr. Myrna C. Cabotaje, MD, MPH, CESO III, Regional Director, DOH ket maipatpatungpal kadagiti RHU a katinnulongna iti Provincial Health Office, Ilocos Sur ken ti LGU-Cabugao a mangipatungpal iti serbisio ti salun-at kadagiti umili.

Inimatangan dagiti kameng ti Sangguniang Bayan nga isuda SB Member Dr. Jemaima S. Tan-Yee, Committee Chair  on Health, SBM Benedict M. Savellano, SBM Jayhan Alcid-Tan ken ni SBM Atty. Bryan Jett S. Pano iti nasao a pannakaited dagiti nadakamat a  Sertipiko. # (Web In-Action)

Monday, May 19, 2014

BRIGADA ESKWELA “KICKS OFF” DITOY CABUGAO, NAILUNSAD

Cabugao, Ilocos Sur – Maisaysayangkat ti “Brigada Eskwela”  iti  26 a bilang ti  pageskuelaan iti Cabugao DepED Cabugao District mangrugi iti Mayo 19, 2014 agingga iti Mayo 24, 2014.

Iti pannaki-amad ti Web In-Action kadagiti nagpartisipar iti nasao a Brigada Eskwela  iti nadumaduma a pagadalan  iti Mayo 19, 2014, naibagada a tunggal kuarto ti pageskuelaan ket agdadanggay dagiti mangisursuro ken nagannak nga agurnos ken agdalus agraman iti ruar ti eskuela.

Innayon pay ti dadduma  a maar-aramid ita ti pannaka-repair  dagiti  alad, tugaw, ken dadduma pay a pasilidad ti pagadalan partikular iti pannakaital-o ti  hygiene and sanitasion dagiti ubbing.

Dagitoy a gannuat ket paset ti pannakaisagana ti pageskuelaan iti panagseserrek ti klase dagiti ubbing inton  Hunio 2, 2014. Maaramid ti enrolment dagiti agbasa iti umuna a lawas ti Hunio  2014 para iti School Year 2014-2015, segun pay kadagiti School Teachers.  #  (Web In-Action)