Thursday, April 30, 2015

ORIENTATION WORKSHOP ON ECC TI DAY CARE, NAARAMID

Cabugao, Ilocos Sur – Naaramid ti Day Care Orientation Workshop on Early Childhood Care Development (ECCD)- Information System kadagiti Day Care Workers ti ili a Cabugao, Ilocos Sur  iti Abril 30, 2015  iti Municipal Conference Building, Cabugao, Ilocos Sur.


Ti panggep ti nasao a workshop ket iti pannakaisagana ti “database” babaen iti panang-fill up-da kadagiti naisagana a pormas a nakailanadan ti datos dagiti ubbing nga agtawen ti 3-4 ket mapasamak ti tinawen a pannakapabaro dagitoy nga impormasion ket maidepositoda iti computer machines.

Kangrunaan a nangiwanwan kadagiti nag-workshop ket ni Mrs. Lydia S. Gazmen, Municipal Social Welfare Officer ti MSWDO-Cabugao ken ni Mrs. Jenelyn Castillo, MSWDO Staff ken nag-training maipapan kadaytoy a programa ti DSWD. Segun ken ni Mrs. Gazmen, kasapulan ti yearly updating babaen iti koordinasionda iti DOH ken dagiti Barangay Nutrition Scholars (BNS)  a pakaalaan pay kadagiti dadduma  a napapateg a datos ken impormasion tapno nalaklakada a maadal dagiti maigannuat a programa a mayataday iti kasapulan dagiti ubbing.
Nagleppas ti maysa nga aldaw daytoy nga orientasion a nabunga para iti naannayas a trabaho dagiti Day Care Workers (DCW’s). # (Web In-Action) 


Dagitoy a gannuat ket resulta ti napintas a panagkammayet dagiti Opisiales ti LGU-Cabugao nga idauluan ni Mayor Edgardo  “Ediboy” S. Cobangbang, Jr., iti DSWD, DOH,  Day Care Workers (DCW’s) ken dagiti nagannak tapno maited  iti agtultuloy a napintas a serbisio kadagiti agtan-ay nga ubbing ket mahulma-da nga agbalin a mapangnamnamaan ken naresponsable nga umili. # (Web In-Action)

2ND DAY TI SEMINAR TI MDRRMC, KAADUAN ITI AKTUAL A MAISURO

Cabugao, Ilocos Sur – Narugian ti 2nd Day iti dua nga aldaw a seminar (Abril 29-30, 2015)  nga inesponsoran ti MDRRMC-Cabugao ken maang-angay iti Cabugao Cultural and Sports Complex, Brgy. Rizal, Cabugao, Ilocos Sur iti Abril 30, 2015.

Dagiti mainayon a maiyadal ket dagiti sumaganad:

1. Mass Casualty Incident System.
2. Triage.
3. Bandaging.
4. Splinting.
5. Emergency Rescue 
Transfer.
6. Vehicle Extrication.
7. Trauma Management (spine board management).
8. Skills Stations.
9. Drill.

Kangrunaan a naglektiur ken nagdemonstrar ket dagiti Faculty/Students ti University of Northern Philippines (UNP), Vigan City,  College of Health Sciences nga idauluan da Mr. Arnold Q. Alcayaga; Mr. Jose C. Unciano; Mr. Gerard Gabriel P. Reotutar ken ni Mrs. Evelyn A. Rafanan.

Buklen pay dagiti nagpartisipar dagiti kameng ti Cabugao Elite Riders Club, Inc.,  MDRRMC/WASAR Team, RHU Personnel ken iti UNP Faculty and Staff & Students.

Daytoy a panagsanay ket mangnayon iti kaammuan dagiti partisipantes  a kasapulan unay no panawen ti aksidente wenno aniaman a  didigra. # (Web In-Action)

SPES, MAIPATUNGPAL MANEN ITI ILI A CABUGAO

Cabugao, Ilocos Sur – Maipatungpal manen ti Special Program for the Employment of Students (SPES) a nagbuligan nga igannuat ti Department of Labor and Employment (DOLE)-Vigan City ken ti LGU-Cabugao nga idauluan ni Mayor Edgardo “Ediboy” S. Cobangbang, Jr. para kadagiti agkasapulan ti trabaho nga agad-adal ita a bakasion ti panagbasa ti Tawen 2015.

Segun iti rekord ti Human Resource Management Office (HRMO) nga idauluan ni Ms. Teresita “Mimi”  Sison, HRM Officer ti LGU-Cabugao, adda ti  10  nga estudiante ti maikkan  iti trabaho ita a Summer Vacation 2015 babaen iti panagtrabahoda  kadagiti Opisina ti  nadumaduma a Departamento/Section  ti LGU a pakaidesignaranda. Pagrebbengan ti DOLE nga ipaay ti 40 % ti gunggonada nga agtrabaho idinto ta 60 % met ti aggapu iti LGU-Cabugao. Mangrugi ti panagtrabahoda iti Abril 30, 2015 ket manamnama nga 30 nga aldaw ti naituyang a kapautda nga agtrabaho dagitoy a nagaplikar nga estudiante a naggapu iti nadumaduma a barangay ti ili. # (Web In-Action)

CABUGAO ONION AND GARLIC GROWERS ASSOCIATION, NAGMITING

Cabugao,, Ilocos Sur -  Naangay ti panagtataripnong dagiti Opisiales/Kameng ti New Cabugao Onion and Garlic Growers Association nga idauluan ni Mr. Henry B. Saliganan, Presidente, iti 2nd Floor, Municipal Building, Cabugao, Ilocos Sur.

Segun ken ni Mrs. Ester P. Aguimbag, Municipal HVCDP Coordinator nga umabot  ti 40 dagiti Miembros iti nasao nga Asosasion.

Kangrunaan a napagnunumuanda kadaytoy a panagtitiponda  ket  iti panagplanoda iti pangalaanda iti pagpuonanda iti umay a bulan a  panagmulada ken trinatarda pay iti napintas a pannakaipakat ti Recording System-da.

Nainayon pay a trinatarda iti panagkontribusionda  iti sag-P500 ti tunggal kameng a mainayon iti revolving fund ti nasao nga asosasion. 

Dagitoy nga aksion ken inisiatiba ket maigapu iti panangparegta ti LGU Cabugao nga idauluan ni Mayor Edgardo “Ediboy” S. Cobangbang, Jr. iti pannakaparegget ti industria ti nateng partikular ti bawang ken lasona ditoy Munisipalidad ti Cabugao tapno manayonan ti matgedan dagiti mannalon ken agtultuloy a maital-o ti kasasaad ti panagbiagda. # (Web In-Action)

2-DAY SEMINAR TI MDRRMC, NAPATEG DAGITI MAADALDA

Cabugao, Ilocos Sur – Idauluan ni MDRRMC Officer Engr. Nestor B. Somera dagiti Lecturer/Facilitator  iti dua nga aldaw a seminar nga esponsoran ti MDRRMC-Cabugao iti Cabugao Cultural and Sports Complex, Brgy. Rizal, Cabugao, Ilocos Sur iti Abril 29-30, 2015.

Dagiti maiyadal ket babaen iti Teoria ken Aktual kas kadagiti sumaganad:

1. Basic Life Support.
2. Basic First Aid.
3. Basic Life Saving Techniques.
Kangrunaan nga aglektiur ken agdemonstrar ket dagiti Faculty/Students ti University of Northern Philippines (UNP), Vigan City,  College of Health Sciences nga idauluan da Mr. Arnold Q. Alcayaga; Mr. Jose C. Unciano; Mr. Gerard Gabriel P. Reotutar ken ni Mrs. Evelyn A. Rafanan.

Buklen pay dagiti nagpartisipar dagiti kameng ti Cabugao Elite Riders Club, MDRRMC/WASAR Team, RHU Personnel ken iti UNP Faculty and Staff & Students.

Daytoy a panagsanay ket mangnayon iti kaammuan dagiti partisipantes a kaduanto  iti Gobierno Munisipal ken iti Barangay tapno ad-adda a mapatibker iti panagtutunosda a mangmantener iti linak ken talna/tumulong no panawen ti didigra   a mangtaginayon iti progreso ken talingenngen iti lokalidad. # (Web In-Action)

ENROLMENT TI SENIOR CITIZENS ITI PHILHEALTH, NAILEPPAS

Cabugao, Ilocos Sur – Ti Cabugao Federated of Senior Citizens ket idauluan ni Mr. Bonifacio Somera, Presidente iti agdama   ken agopisinada iti Senior Citizen’s Center Building, Brgy. Rizal, Cabugao, Ilocos Sur.

Baybayabayen ida da  Mrs. Lydia S. Gazmen, MSWD Officer-LGU Cabugao kasta metten ni Mr. Remigio S. Sunico,  OSCA  (Office of the Senior Citizen’s Affairs) Head. 

Babaen iti  RA  10645,  "An Act Providing for the Mandatory PhilHealth Coverage for All Senior Citizens,” nakalanad dagiti annuroten iti pakaseknan ti benepisio a maited iti Senior Citizen kas iti daytoy a paset ti linteg... “ all citizens who are 60 years old and above will receive the benefits and discounts extended to ordinary PhilHealth members by just presenting a valid ID that proves their real age.

Kabayatanna, napadamaganen  ti Office of the Senior Citizens Office, Cabugao, Iloocos Sur babaen ken ni Ms. Marife G. Banlaoi, Head, PHILHEALTH-Local Health Insurance Office - Ilocos Sur iti pakaseknan daytoy a benepisio dagiti nataengan ken dagiti aramiden ti Opisina ti MSWDO-Cabugao iti implementasion iti nadakamat a linteg.

Imbatad ni Mrs Lucille S. Somera, katulongan a mangtaming kadagiti pakaseknan a papeles dagiti nataengan nga adda 786  a bilang ti nagenrol ken nayendorso iti Philhealth-Vigan City  a nataengan.

Impeksa ni Mr. Bonifacio Somera iti panagyamanda iti  agtultuloy  a tulong ken suporta  ti LGU-Cabugao nga idauluan ni Mayor Edgardo “Ediboy” S. Cobangbang, Jr.   kadagiti Senior Citizens.

Nakabuklan ti Action Planning Workshop for Senior Citizens  iti Tawen 2015 ket dagiti sumaganad:

1.Sagot-Ayat kada Lolo ken Lola.
2.Donations/Grants
3.Skills Training
4.Elderly Week Celebration
5.Information Education Campaign

Kalikaguman pay dagiti Opisiales ti pannakapasayaat ti Financial Record-da ta daytoy ti maysa a tulbek ti naballigi nga Asosasion, segun iti Presidente ti Senior Citizen. # (Web In-Action)

Wednesday, April 29, 2015

FAMILY DEVELOPMENT SESSION TI 4 P’s TI ABRIL 2015, NABALLIGI

Cabugao, Ilocos Sur – Iti pannakiuman ti Web In-Action iti Abril 29, 2015, impakaammo  ti  Opisina ti Municipal Operation’s  Office (MOO) ti 4 P’s Program, Municipal Link-Cabugao  a nawanasdan a nairakurak iti 33 a barangay ti pakabuklan ti programa iti Salun-at iti bulan ti Abril 2015. Agleppas ita nga aldaw, Abril  29, 2015 iti panaglektiur nga ipangruna nga aramiden dagiti kameng ti RHU-RN-Heals Nurses a kaduada.

Sakbayna, innayonda a makiko-koordinarda  latta kadagiti Opisiales ti Barangay/Parent Leaders  a katinnulongda  a mangorganisar iti Family Development Session (FDS) para iti Topiko nga imitingda kadagiti 4 P’s para iti daytoy a bulan  babaen  iti Tema: “Mga Karaniwan at Nakakahawang Sakit ng Tag-araw”.

Iti pannakaangay ti Family Development Session (FDS) kadagiti barangay ket naisamira met a nasursuruan dagiti Parent-Leaders a tumulong a mangtarawidwid iti miting ken seminar iti masakupanda.

Iti  bulan ti Abril 2015, dagiti kameng ti RN-Heals Nurses iti RHU-Cabugao ti kangrunaan a naglektiur kadagiti FDS Session-da ket napagkaykaysaanda a maysa a Topiko ti binsaenda kadagiti Family Development Session-da tapno epektibo iti evaluation ken assessment a maisayangkat kalpasanna. Nalaklaka pay a maawatan dagiti adalanda a 4 P’s no dagitay kabisadoda/naipanawen  a Topiko/Situasion  iti maiyad-adal kas parte  iti Values  Formation ti Programa.

Dagitoy nga aksion ket maigapu iti agtultuloy a panangilungalong ti Gobierno Munisipal iti pannakikammayetna iti Ahensia ti DSWD iti napintas a maaramidan dagiti programa a maisaksaknap kadagiti barangay tapno maragpat iti sapasap a panagrang-ay ti Pamilia ken umili. # (Web In-Action)

Tuesday, April 28, 2015

“BOODLE FIGHT”, NAARAMID DITOY MUNISIPIO!

Cabugao, Ilocos Sur – Naaramid ti “Boodle Fight” a daytoy ti atiddog a pannakaidasar kadagiti nagduduma a naluto a  taraon iti napagsasaip a naapinan a  lamisaan iti uneg  ti Cabugao Cultural and Sports Complex, Brgy. Rizal, Cabugao, Ilocos Sur a no sadino a ditoy ket nakilanglang dagiti kameng ti nadumaduma a Departamento/Section ti LGU-Cabugao, sibubukel a kameng ti Sangguniang Bayan ti ili a Cabugao, PNP-Cabugao, BFP-Cabugao, Judiciary: Regional Trial Court (RTC) ken ti Municipal Trial Court (MTC) ken dadduma pay nga Ahensia a nakasalinong iti Gobierno Lokal ti ili a Cabugao iti lunchtime ti Abril 28, 2015.

Nakikaysa iti nasao a “boodle fight” ni Mrs. Jerlie Seguban-Cobangbang a kapisi ti puso ti Ama ti Ili  kasta metten  dagiti sangaili a naggapu iti Davao City.

Indauluan da Mayor Edgardo “Ediboy” S. Cobangbang, Jr. ken ni Vice Mayor DJ Savellano iti Pamilia-LGU ken iti Sangguniang Bayan; PCI William N. Nerona iti PNP-Cabugao; Fire Marshal Elmer C. Acapuyan iti Bureau of Fire Protection ken dagiti Hues iti dua a sanga ti Hudisiaria.

Indauluan ni Mrs. Lucille S. Somera ti ababa a kararag sakbay a nairugi ti panaglak-amda  kadagiti taraon. 

Nagsarita ni Mayor Ediboy ket pinagyamananna iti natunos a panagtitipon iti amin a mangitantandudo iti serbisio a kameng ti Opisina ken Ahensia. Ti Boodle fight ket kaibatogan iti balligi a naragpat  ti amin iti naaramid nga LGUlympics iti kallabes ken napnuan kaipapanan babaen iti panagkaykaysa ti salinong ti Gobierno Lokal ti ili a Cabugao, Ilocos Sur a mangipatungpal babaen iti kastoy nga aktibidad.

Kas nakuna ti maysa a Mannurat:

“Boodle fight can signify the importance of brotherhood, trust, and camaraderie. This is the reason why boodle fights perfectly sum up the Filipino identity. We give importance to closeness, to friendships, and to the value of community!” #  (Web In-Action).

CLICK HERE TO VIEW MORE PHOTOS

HOMI NOODLES, ITED TI DSWD KADAGITI NAKURAPAY

Cabugao, Ilocos Sur – Iti pannakiuman ti Web In-Action iti Abril 28, 2015, impakaammo  ni MSWD Officer Mrs. Lydia S. Gazmen a katinnulongda ti  Opisina ti Municipal Operation’s Office (MOO) ti 4 P’s Program, Municipal Link-Cabugao ken agdama nga iwarwarasda  ti  pakabuklan iti programa ti  DSWD Region - 1  iti pannakaibunong  ti Homi Noodles (15 Packs per Recipient) kadagiti kameng ken non-members  ti 4 P’s a kualipikado a matulongan  kadagiti Barangay iti Munisipalidad ti Cabugao iti bulan ti Abril 2015.

Segun ken ni Miss Jessie Ann Tabut, Staff ti MOO-MSWDO, makiko-koordinarda  latta kadagiti Opisiales ti Barangay/Parent Leaders  a katinnulongda  a mangdeterminar kadagiti matulongan nga indibidual/pamilia  babaen kadaytoy a programa ti DSWD-Region 1 ken iti LGU-Cabugao.

Dagitoy nga aksion ket maigapu iti agtultuloy a panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti pannakikammayetna iti Ahensia ti DSWD ken kas paset  iti napintas a maaramidan dagiti programa a maisaksaknap kadagiti barangay tapno maragpat iti sapasap a panagrang-ay iti Pamilia ken umili. # (Web In-Action)

CLEARING ACTIVITIES KALPASAN TI FIESTA 2015, NAIGANNUAT

Cabugao, Ilocos Sur – Iti pannaki-amad ti Web In-Action idi Abril 27, 2015, impakaammo  ni Mr. Edgar S. Balangatan, AT/, MENRO Designate/ Clean and Green  Coordinator  a nakadeploy  dagiti agob-obra iti babaenda a nagikkat kadagiti Tarpaulin ken nagidalimanek kadagiti dadduma pay a nausar a   maigapu iti kalepleppas  a selebrasion ti  panagpiesta ti ili:  Abril 21 -Abril 26, 2015.

Nupay kasta, insupusop ni Mr. Balangatan a madagdagus ti clearing ken   pannakadalus ti agsumbangir a paset ti Kalsada Nasional manipud Brgy. Sagayaden agingga iti Brgy. Pug-os agraman  dagiti Kalsada (Salomague  Bound ken  Cuancabal to Nagsincaoan Road) kasta metten  kadagiti lugar-pampubliko iti Poblasion (Parke, Plaza, Processional Route ken NISTC Public Market) tapno agtultuloy a nadalus ken napintas ti buya iti aglawlaw ti ili. 

Ti madagdagus nga aksion dagiti maseknan nga LGU Personnel para iti “Clean and Clearing Activities” apaman a  malpas dagiti dadakkel nga aktibidad ket paset ti panangipatungpalda  iti agtultuloy a direktiba ni Mayor Edgardo “Ediboy” S. Cobangbang, Jr.  iti  pannakamantener ti kinadalus ti aglawlaw iti Munisipalidad ken sanitasion para iti umili ken agbisbisita latta a Balikbayan iti ili ti Cabugao. # (Web Situational Report)

Monday, April 27, 2015

NARAGSAK TI ADMINISTRATION/ BALIK-CABUGAO NIGHT 2015!

Cabugao, Ilocos Sur – Napunno ti ragragsak ti  Cabugao Central Park  (CCP) Auditorium iti pannakaselebrar ti Administration and Balik-Cabugao Night idi Abril 25, 2015 a nagpartisiparan dagiti Municipal Officials nga idauluan da  Mayor Edgardo “Ediboy” S. Cobangbang, Jr. ken ni Vice Mayor DJ Savellano, Pamilia-LGU, Kakapitanes ti Barangay ken Opisiales ti Brgy-based Organizations, umili ti Cabugao ken kangrunaanna dagiti kailian a naggapu iti ballasiw-taaw manipud iti nadumaduma a nasion ken lugar iti lubong.
 
CLICK HERE TO VIEW MORE PHOTOS
Nasangaili iti dayta a gundaway ni Mayor Benjamin Sarmiento ti San Juan, Ilocos Sur.  

Kangrunaan a nangparagsak ti rabii ti LGU ken dagiti Balikbayans ket ti panangray-awma iti kaaduan iti panagkanta/pannakidanggay  ni Mr. Gino Padilla, Singer-Actor.

Pinarungbo dagiti makapikapik a samiweng a pinaruk-atan ti Baysa Band dagiti darikmat ket saan a kinabaelan a pinarukma dagiti di agmawmaw  a sonata iti alibtak ken regta  dagiti sumasala a nangipamatmat iti laingda a nangkumpas kadagiti nagduduma a piesa a naipatayab iti Banda a nangpadaeg iti salonan.

Nag-mega walk dagit dancers  iti lawlaw ti  salonan. Naibaet dagiti sonata   ket nainaganan dagiti nangidaulo kadagitoy nga Opisial wenno Balikbayan a napan nagsala.

CLICK HERE TO VIEW MORE PHOTOS
Naaramid ti Awarding ti tallo a dadakkel a Pasalip ti LGU-Cabugao  a napasamak sakbay ti Administration Night: Lantern Contest idi Paskua 2014; Cabugao Basketball Tournament 2015 ken ti Grand Float Parade 2015.

Dagiti sumaganad ti Barangay a nagabak ti Premio: Lantern Contest 2014 – 3rd Place, Brgy. Salapasap; 2nd Place, Brgy. Pila; ken 1st Place – Brgy. Marga-ay.

Float Competition 2015 – 3rd Place, P100,000, Cluster 5; 2nd Place, 120,000 – Cluster 2; Best Float, P150,000, Cluster 4; Consolation Prizes  a sag-P50,000 dagiti Cluster 1, 3 ken 6. 

CLICK HERE TO VIEW MORE PHOTOS
Basketball Tournament 2015 -  3rd Runner-up – Brgy. Bonifacio Team, P5,000 & Trophy; 2nd Runner-up, Brgy. Salapasap Team, P10,000; 1st runner-up, Rizal Team, P15,000; ken Champion – Brgy. Namruangan Team, P20,000. Napadayawan a Most Valuable Player  (MVP) ni Mr. Gerald Saniatan.

Indauluan da Mayor Ediboy ken ni Vice Mayor DJ Savellano agraman dagiti kameng ti sibubukel a Konseho ti ili  iti pannakaited dagiti premio dagiti nangabak.

CLICK HERE TO VIEW MORE PHOTOS
Nangipaay ti Mensahe-na ni Mayor Ediboy ket nabara ti kablaaw ken panagyamanna  iti panangipateg dagiti Balikbayans ti awis ti Gobierno Munisipal  a makipagrambakda ita a Piesta 2015. Impeksana iti panagraemna iti ayat ken  kabaelan dagiti Balikbayans a mangipapaay iti adu a proyekto a pagsayaatan dagiti umili  ti Cabugao ket  insupusopna a sapay koma ta agtultuloy dagitoy a mapasamak ita ken iti masanguanan a panawen. Pinagyamanan  pay ti Ama ti Ili dagiti kailianna, bisita, sektor ken adda iti akemna a nakipagtaming iti panagballigi iti unos dagiti aldaw ti panagpiesta ti ili.

Nakitaripnong met dagiti Barangay Captains ken dadduma pay a bisita a nakidanggay kadagiti Balikbayans ken LGU Officials   a nakipagrambak iti dayta a rabii ti Piesta.  # (Web In-Action)

CLICK HERE TO VIEW MORE PHOTOS

BINIBINING CABUGAO 2015 PAGEANT NIGHT, NADAEG A NABUYA!

Cabugao. Ilocos Sur -  Naaramid ti Pageant Night ti Binibining Cabugao 2015 idi rabii ti Abril 24, 2015 a naangay iti Cabugao Central Park (CCP)  Auditorium  a no sadino a ditoy ket dandani  awan iti itiitan iti kaadu  ti  umili ken sangaili a nangokupar ken  magagaran a nagbuya.

Daytoy a salip ket  naipangruna a pakontes ti LGU-Cabugao nga idauluan ni Mayor Edgardo “Ediboy” S. Cobangbang, Jr.  a mangpangpangayed iti rabii sakbay ti kaaldawan ti Panagpiesta ti ili. 

CLICK HERE TO VIEW MORE PHOTOS
Sakbayna, naiyam-ammo dagiti nangbukel iti Hurado iti pasalip  kadayta a rabii babaen kadagiti Hosts. Naipakaammo pay dagiti pagibasaran iti panagpilida kadagiti mangabak a kandidata.

Kalpasanna, indibidual a nagpresenta/inyam-ammoda  ti bagida  dagiti kandidata iti entablado. Nagsaruno ti panagsuotda iti Swimsuit ken Gown nga impamatmatda iti publiko ken kadagiti Hurado. Naiparang pay dagiti Talento a kupkupikopan ti tunggal Contestant. 

Iti Awarding, tunggal presentasion ket naipakaammo ti nagballigi a kandidata. Ditoy met a napan nagisaad dagiti natudingan a personalidad  iti pannakaikabil ti banda ken dadduma pay a maited a maisagut kadagiti nagballigi a kandidata.

CLICK HERE TO VIEW MORE PHOTOS

Kinoronaan da Mayor Edgardo “Ediboy” S. Cobangbang, Jr. ken ni Mrs. Jerlie Seguban-Cobangbang ni Miss Kristine Joy Gorgonio a Binibining Cabugao 2015. 

Nasangaili iti daytoy a gundaway ni Mayor Benjamin Sarmiento iti San Juan, Ilocos Sur ken maysa kadagiti napadayawan nga Opisial a nangbanda kadagiti nangabak.

Sakbayna, nagdalan daytoy a pasalip iti naiget a panagarisit kadagiti nalilibnos a dayag a naggapu kadagiti barangay ti Munisipalidad ti Cabugao.

Daytoy a pasalip ket angayen   ti Munisipalidad ti Cabugao iti panangesponsor dagiti Opisiales ti Gobierno, indibidual  ken establisimiento ti negosio.

Nangabak ni Miss Kristine Joy Gorgonio ti Barangay Aragan, Cabugao, Ilocos Sur a Binibining Cabugao 2015 manipud kadagiti sangapulo a Finalists iti nasao a Beauty Contest Competition. # (Web In-Action)

CLICK HERE TO VIEW MORE PHOTOS

Saturday, April 25, 2015

ESPONSOR TI LGU-CABUGAO, RAMBAK KAALDAWAN FIESTA!

Cabugao, Ilocos Sur –Rinambakan ti Parokia ni San Markos Ebanghelista, Romano Iglesia Katolika iti Cabugao, Ilocos Sur a kagiddan iti pannakarambak ti  panagpiesta ti ili (Abril 21-26).  

Narugian ti panagrambak manipud pay idi  Abril 16, 2015 agingga iti Abril 25, 2015 babaen kadagiti naangay a Nasantuan a Misa nga inesponsoran ti nadumaduma a barangay ken dagiti  Asosasion  ken idauluan ti LGU-Cabugao.

Iti biang ti Simbaan, ti panagrambak iti Piesta ita a Tawen ket naiputan iti Tema: “Ti panangibabaet ni San Markos a Patron,  Agaramid ti Nalinteg, Ipakitatayo Di agbalbaliw  a Panagayat.”

Siam nga aldaw sakbay ti “Rambak Kaaldawan Fiesta”  iti  Abril 25, 2015, naangay iti Simbaan ti Novena iti  4:00pm ken iti Nasantuan a Misa iti 4:30pm. kada malem.

Kabayatanna, iti “Rambak Kaaldawan Fiesta”, maysa ti LGU-Cabugao kadagiti adda iti  Batang/Mangidaulo/Esponsor iti naangay a  MISA CONCELABRADA iti  9:00am  idi  Abril 25, 2015. Indauluan ni Mayor Edgardo “Ediboy” S. Cobangbang, Jr. ti Pamilia-LGU Cabugao a nagatendar iti nadakamat a Misa. 

Nasangaili ditoy dagiti Papadi a nangannong iti selebrasion iti Simbaan babaen iti panangidaulo ni Most Reverend Marlo M. Peralta, D.D. iti Archdiocese of Nueva Segovia, Vigan City. 

Iti panagleppas ti Misa, kimmablaaw iti sapasap ken nagyaman ni Rev. Fr. Felix Costales, Parish Priest iti Gobierno Munisipal nga idauluan ni Mayor Ediboy ken dagiti pannakabagi iti nadumaduma nga Ahensia/Grupo a nangesponsor iti “Misa Concelabrada”   iti kaaldawan ti panagpiesta ni San Markos Ebanghelista, Patron ti ili a Cabugao, Ilocos Sur. # (Web In-Action)

PGIS, HALL OF FAME OF POVERTY REDUCTION PROGRAM IN REGION 1!

NOT ONCE, not twice but three times!!! The Provincial Government of Ilocos Sur did it again for the third straight year. The PGIS was awarded best LGU-Poverty Reduction Program Implementer for 2014 by the Regional Development Council Region 1.

The award is given to an LGU that had displayed exemplary performance in reducing poverty in their areas of concern. “If we work together, we can accomplish a lot. Let us inspire each other and believe in ourselves that we can eradicate poverty.” Gov. Ryan Luis V. Singson said. PGIS wowed the RDC 1 search committee again with the sustained implementation of programs such as Agricultural Poverty Enhancement, Quality-Affordable-Accessible Health Care, Adequate and High Quality Education, Assistance to Senior Citizens, Environmental Management, Tourism Development, Electrification Program, Barang-ay Demo Farm, Ilocos Sur Hotline, Search for Siglat Eskuela and Siglat Barangay, Kapitol Outreach, Livelihood Programs, Upgrading of PDRRMC Equipments, Handog-Titulo Programs, Social and Economic Infrastructure Projects. “I congratulate the whole Provincial Government of Ilocos Sur for their latest success. I told them last year to do it again, and they came back even stronger with an array of programs.” Dir. Nestor Rillon (RDC Acting Chairman) said. # Adapted News, PIO-Ilocos Sur.

Friday, April 24, 2015

GRAND PARADE, NANGAYED ITA TI PANNAKAARAMID DAGITI FLOAT!

Cabugao, Ilocos Sur - Naaramid ti Grand Float Parade ti 2015 Cabugao Ragsak Festival iti kabigatan ti Abril 24, 2015 (maikapat  nga aldaw ti Piesta)  a nagpartisiparan dagiti Kameng/Opisiales  ti  Local Government Unit (LGU)-Cabugao, 33 a barangay agraman dagiti Asosasion iti uneg ti barangay kas iti RIC, 4 P’s, BPATS, BNS, BHW’s, 4-H Club, BPATS, Day Care Worker (DCW),     kompania/organisasion iti Sektor Pribado kas iti Nuga Best, SYM Motors, Carylle’s Catering Services, Cabugao DepEd District, Private Hospitals, National Offices kas iti Judiciary, NTA  kasta metten iti Muslim Traders,   Philippine Taekwondo,  Cabugao Chapter, CISTODAI, Alpha Phi Omega Fraternity (APO) ken ti Samahang Ilokano Fraternity (SI). 

CLICK HERE TO VIEW MORE PHOTOS
Immuna iti Parada   ti  Police Mobile Patrol sa dagiti kameng ti PNP, BFP, Grand Marshal, Festival Banner  ken Colors.

Simmaruno ti Cabugao Institute Marching Band.

Naisaganad a naiparada ti Float ni St. Mark the Evangelist sa dagiti nadumadua nga Sektor-asosasion (pribado ken public)  a binaetan ti Mobile Soundtruck No. 1  ken  2.

Maika-33 a bilang ti linia nga ayan dagiti Municipal Officials a nagparada  nga indauluan da Mayor Edgardo “Ediboy” S. Cobangbang, Jr. ken  ni Vice Mayor DJ Savellano.

Simmaruno dagiti Float manipud Cluster 1 to 6 ken sinurot ti grupo dagiti asosasion ti tunggal barangay a masakupan ti cluster agraman dagiti marching band iti pagadalanda.

Nakipaset met dagiti Marching Band iti   High Schools ken Elementaria  iti nadumaduma a pageskuelan iti  ili. 

CLICK HERE TO VIEW MORE PHOTOS
Innem a barangay ti kada cluster  a nakadagupan iti 6 Cluster  Barangays ket sinaruno dagiti nakiparada  dagiti agkakangayed a Floats-da. 

Nangrugi ti Parada_iti NISTC Public Market, Cabugao, Ilocos Sur  ket nagpatingga idiay Cabugao Institute Compound, Cabugao, Ilocos Sur.

Kalpasan ti pannakaiparada dagiti Float ket napagaabayda iti uneg ti Cabugao Institute Quadrangle ken naaramid ti pannakagradoda  babaen kadagiti nadutokan  a Hurado ket maiwaragawag dagiti mangabak iti karabiyan ti Abril 25, 2015  a daytoy ti Administration/Balik Cabugao Night ti LGU-Cabugao.

Iti ababa a programa, nangipaay ti Mensahena ni Mayor Ediboy iti kaaduan ket kimmablaaw ken nagyaman iti sapasap iti naipakita a kinaurnos ken kinaragsak dagiti nagparada. Inulitna a kinablaawan dagiti umili iti nabunga a panangrambakda iti panagpiesta ti ili.

Naisaruno a naipabuya ti panagtokar ti Sisim Marching Band a nangabak iti Marching Band Showdown idi Abril 21, 2015 iti CCP Ground.

Nagpaay nga Emcee ken Parade Coordinator  ni SB Secretary Maxfel S. Suboc. # (Web In-Action) 

CLICK HERE TO VIEW MORE PHOTOS

LGU-CABUGAO KEN TI DOLE, NANGIWAYAT TI JOB FAIR 2015!

Cabugao,  Ilocos Sur –Iti Abril 24, 2015 ti naituding a pannakisinnarang dagiti agbirbirok ti panggedanda  kadagiti pannakabagi ti opisina (Employment Firms)  nga inimbitaran ti Department of Labor and Employment (DOLE) ken iti Gobierno Munisipal nga idauluan ni Mayor Edgardo “Ediboy” S. Cobangbang, Jr.


Nasapa a dimteng  dagiti pannakabagi ti DOLE Vigan City a kinadua dagiti pannakabagi ti LGU-Cabugao Human Resources Management Office (HRMO) a nagturong iti Cabugao Cultural and Sports Complex iti dayta a petsa.

Dagus a nagrehistro  dagiti aplikante a naggapu iti nadumaduma a barangay ti Munisipalidad ken adda latta met agsangsangpet a kumamakam sa naipasa kadagiti maseknan a pannakabagi nga agawat ti trabaho nga opisina iti nagaabay  a  lamisaan ken tugaw  a pagyananda nga aginterbiu iti uneg ti Cabugao Cultural and Sports Complex, Brgy. Rizal, Cabugao, Ilocos Sur.


Imbatad ti DOLE Officer nga inisiatiba daytoy ti LGU tapno matulongan dagiti umili nga agsapsapul iti panggedanna nangruna dagiti agtawen ti 18-35  a maiyasideg kadagiti opisina ken kompania iti pribado a sektor.

Maysa a prospek nga oportunidad iti agdama kadagiti agtutubo  ti pannakaipatakder dagiti pasdek-negosio  ken pagtagilakuan iti lokalidad a karaman iti Job Fair.

Daytoy a proyekto ket tinawen nga ilunsad ti Gobierno Munisipal babaen iti pannakakikamayetna iti DOLE  tapno maaksionan   ti pakaseknan dagiti umili nga agbirbirok ti pagsapulanda a mangpasayaat pay  ti kasasaad ti panagbiagda. # (Web In-Action)


SABADO BOYS, LINIWLIWANA TI MASA!

Cabugao, Ilocos Sur – Naisalumina a padas ken pannakaray-aw ti nagun-od dagiti nagbuya nga umili iti impabuya ti Sabado Boys iti maikatlo a rabii ti panangpiesta ti ili iti Cabugao Central Park (CCP) Stage a no sadino a ditoy ket nasakaban ti kaadu ti umili a nagbuya iti las-ud ti nalawa nga Open Auditorium iti dayta a petsa.


Indauluan ni Mayor Edgardo “Ediboy” S. Cobangbang, Jr.  ken ni Vice Mayor DJ Savellano a kaduada dagiti kameng ti pamiliada agraman dagiti Konsehales ti ili iti panangdanggayda kadagiti impabuya da Myke Salomon, Paolo Santos, Luke Mejares ken kangrunaan ni Jimmy Bondoc a kalatakan iti agdindinamag  a “Sabado Boys!”.

Iti pannakiamad  Web In-Action kadagiti kaaduan a nagbuya ket napnekda unay iti ramen nga imparang ti grupo ket kunada a saanda a mauma a mangsurot kadagiti agbaliwbaliw a pannakigantil ken nasayud a panagduetoda iti kantada.

Maysa a paset ti pabuya iti pannakaayab dagiti uppat nga agduyos a kumanta iti stage ket ditoy a kinarit ni Jimmy Bondoc nga itandudoda ti kaipapanan ti musika iti biagda ken iti masa.

Manamnama a sumarsaruno pay dagiti rabii ti Piesta a mangited iti ray-aw ken ragsak a mamagbalin  a napnuan-kaipapanan ti panagpiesta ti ili a Cabugao iti Tawen 2015. # (Web In-Action)