Monday, October 31, 2011

HANDICRAFT MAKING, PROYEKTO TI CABULIG A MANGIPAMAYSA ITI SEKTOR TI INNA TI CABUGAO

Cabugao, Ilocos Sur (Oktubre 29-30, 2011) – Saanen a paatiw dagiti inna iti pannakinamingda kadagiti napateg nga aktibidad a mangitag-ay ti sektorda ken mangisaknap iti panagsayaat ti umili babaen iti magun-od a laing iti handicraft.

Inyusuat ti CABULIG, maysa nga NGO nga idauluan ni Mrs. Jerlie Seguban-Cobangbang, kapisi ti puso ti Ama ti Ili, Mayor Edgardo “ Ediboy” S. Cobangbang, Jr. ken katinnulongna ni Dr. Margarita Santella-Jara iti dua nga aldaw a seminar-workshop: “Handicraft Making Using Plastic Waste” babaen ti tema: “Heal  Mother Earth” idi Oktubre 29-30, 2011 iti mismo a Munisipio.

“Nayonanyo ti an-anusyo ta agsaknap koma kadagiti barbarangay tapno mairamanda met. Adda kaipapananna daytoy a gannuat: mangted ti pateg ti tiempo ti in-inna uray ti out-of-school youth  ken amin nga interesado; adda met maitedna a benepisio ken magun-od nga adal ken makatulong pay  iti aglawlaw,” kuna ni Mayor Ediboy iti panaglukat ti seminar.

Pimmili ni Mayor Ediboy ti lima a gapuanan dagiti nagsanay ken napremiuanda dagiti nagaramid kadagitoy
Malaksid iti mairugi a  training-workshop a mayallatiwto pay iti barbarangay, maisaknap/mayeksibitto pay kadagiti kangrunaan a pagtataripnongan kas iti Selebrasion ti Paskua 2011, CI Foundation Day inton Pebrero 27, 2012 ken panagpiesta ti ili iti bulan ti Abril 2012. 

Nagpaay a  Facilitator  ni Dr. Margarita S. Jara ket imbagana a napintas ti  turongen ti kakastoy nga aramid ta makatulong iti kangrunaan a pakaseknan ti amin ita: maikkan ti pagkakitaan ti tattao manipud iti plastic waste ken  tumulong a mangsalbar ti kasasaad ti aglawlaw. Innayon ti Doktora a mainayon a pagrebbenganna ita ti tumulong ken agbalin pay  a “Doctor of  Environment”  kas ipalnaad ti tema: “Heal  Mother Earth.”

Kalpasan ti Opening Prayer ken pannakakanta ti  National Anthem, nagsarita ni Mrs. Joenah G. Sevilleja, Municipal Technologist ti DA-LGU  a  makasakup kadagitoy kakastoy a panagsanay. Inyam-ammona dagiti mangtartarawidwid ti panagsanay ken ti CABULIG  nga idauluan ni Mrs. Jerlie S. Cobangbang.      Kimmablaaw ni Dr. Jara iti imatang da Ma’am Jerlie ken kakaduana iti  CABULIG  sa  naibinsabinsa  ti panggep ken plano ti CABULIG ken kasta met ni Mrs. Grace Nunez Flores, Advocator ti panagsanay kadagiti awan panggedanna ken  kangrunaan a Trainer iti Handicraft Making.


Naaramid ti Film Viewing iti imatang ti 65  a nagrehistro/nagpartisipar  pakaseknan ti pannakaranggas/pannakarugit ti aglawlaw ken epektona iti kabibiag ti tao. Kalpasanna, naglektiur ni Dr. Jara iti pateg ti panangsaluad/panangsalbar ti agdama a kasasaad ti aglawlaw babaen kadagiti aktibidad a mangtulong iti pannakaipatungpal ti sinaguday ti Solid Waste Management Act 9003.

Nagsarita met ni Mrs. Grace Nunez  Flores, Trainer sakbay a nairugi ti workshop. Nailawlawag dagiti annuroten ti agsanay agingga a malpas ken awaten dagitoy  ti  sertipiko. 

Iti umuna nga aldaw,  panaggansilio (chrocheting) ti immuna a  naisuro: umuna iti  kalkot  sa naisaruno iti nagetteng a selopin nga agduduma ti estilo, rukod ken  kolorna. Tunggal magansilio ket adda maitutop a disenio a suroten ti agsanay. Nagrupo dagiti nagpartisipar iti tunggal lamisaan iti level 2 kadagiti adda pamalpalatpatanna iti maaramid idinto ta level 1 kadagiti agsursuro. Ditoy lamisaanda ti   pakaiparabawan dagiti ramramit ken usarenda a materiales. 

Kabayatan ti workshop, naanus ken naregget dagiti trainors a nangtarabay ken nangiwanwan  kadagiti agsursuro. Maikkan ti tunggal grupo iti   aramiden depende iti kabaelanda a mangileppas ti umun-una a naipaaramid. Naipaagsep pay ti kaipapanan ti disiplina a kabulig  ti napintas a magapuanan. 

Iti umuna  nga aldaw, immatendar  met ni Mrs. Lydia S. Gazmen, Municipal Social Welfare and Development Officer (MSWDO), dagiti agkasimpungalan: SBM Carlito S. Pano, M.D. ken Ex-SBM Luciamar S. Pano. Iti maikadua nga aldaw, nagmalem dagiti nagsanay ken  tinarabay dagiti trainors agingga a nairingpasda ti obrada. Pinasingkedan ni Mrs. Joenah G. Sevilleja nga adda 8 a nagturpos iti Level 2 ken 41 ti Level 1.


Nagsarita ni SBM Carlito S. Pano, M.D., Chairman, Committee on Social Services ket kimmablaaw ken nagyaman kada Mayor Ediboy, Ma’am Jerlie, Dr. Margarita Jara, Ma’am Milou Pano ken Ma’am Grace ken amin a nakipaset kadaytoy a panagsanay. Dinakamatna ti pateg ti panawen.  Ket mausar ti tiempo nga adda  kaibatoganna ken  mainayon a pagkakitaan dagiti inna.

Kinompirma   ni Mayor Ediboy dagiti nagturpos  ken  nagyaman kadagiti amin a nagatendar uray pay  dagiti nangigannuat ti panagsanay. Imbaga ni CABULIG  Adviser, Dr. Jara a napagkaykaysaan a ni   Mayor Ediboy  ti mangikeddeng ken agpili iti  tallo a kapintasan ti naaramid ken disenio kadagiti nalpas a proyekto a naiparabaw iti lamisaan. Pimmili ti Mayor iti lima a naikkan ti premio.

Kalpasan ti awarding ceremony, naaramid ti group picture taking sa naisaruno ti naisagana a mapagsasanguan. # (JOED SABIO SAJONIA/Picture Taken, Rey Sorinio)

Impakauna ni Mayor Ediboy ti pannakisaritana kadagiti nagatendar ta adda opisial nga eskediulna
Da Dr. Margarita S. Jara (nagiggem ti mike) ken Ma’am Joenah a nangted ti briefing kadagiti nagsanay
Ni Ma’am Jerlie a nakipaset met iti lamisaan dagiti agsanay a kaduana ni Mrs. Joenah G. Sevilleja
Agduduma ti estilo, rukod, kolor  ken pakabuklan dagiti bags a nagansilio manipud iti nakartib a selopin
Napasnek dagiti inna a mangtamtaming kadagiti aramidenda
Ti pakabuklan dagiti nalpas a ginansilio dagiti nagturpos ti panagsanay
Nagsarita met ni SBM Carlito S. Pano, M.D., Chairman, Committee on Social Services maipapan  iti panagsanay
Nangted ti positibo nga impression ni Ms. Grenalyn Amoroso iti RIC
Nagtitinnulong da Mayor Ediboy, SBM Pano ken Ms. Grace Nunez Flores, Trainer, kakannigidan,  a nagiyawat ti sertipiko kadagiti  49  a nagturpos ti Handicraft Making
Ni Dr. Margarita Santella-Jara (naka-stripes), kalpasan a maited ti premio ken pammadayaw ti maysa kadagiti nagsanay

Saturday, October 29, 2011

BANTAY DAGAT SEMINAR, NAANGAY ITI BARANGAY SABANG

Cabugao, Ilocos Sur (Oktubre 29, 2011) –     Naangay  ti tallo nga aldaw a seminar-workshop ti Bantay Dagat (Deputization of  Fish Warden) a nagpartisiparan ti 32 a mangngalap, 6 a Barangay Captains ti 7 a Coastal Barangays ken tallo a pannakabagi ti DA-LGU a naangay idi Oktubre 26-28, 2011 sadiay Multipurpose Hall, Barangay Sabang, Cabugao, Ilocos Sur.

Daytoy a gannuat ket paset ti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti agtultuloy a pannakataming iti pakaseknan ken pagsayaatan dagiti mangngalap ken pannakasaluad ti pagkalapan dagiti umili iti kabaybayan  ti ili a Cabugao.

Iti tallo nga aldaw a panagsanay, nadiskutir dagiti topiko a kas iti sumaganad: Fishing Gear and Fishing Method, Fishery Laws, Anatomy of Blasting Fish, Internal and External Manifestation of Blasted Fish, Criminal Procedures  ken Values Education.


Dagiti pannakabgi ti Regional Staff ti DA-BFAR Region 1 ket dagiti sumaganad:  Teresita Hidalgo, Mary-ann Salomon, Belmor Bugaoan, Henry Cantas, Victoria Lopez ken Melody Sienda.

Dagiti met pannakabagi ti DA-BFAR Provincial Office ket isuda Rogelio Ragonjan, Benedicto Seraos ken Florence Soria.

Indauluan met ti DA-LGU ni MA Zenaida S. Andrada ken dagiti nakipagsanay a da Mimi Ramirez-Paz,  Robert Savella ken Ednalyn Silario.

Impeksa met ni Brgy. Captain Edgardo S. Cobangbang, Sr. ti Barangay Sabang  iti panagyamanna kadagiti nagseminar ken nangseminar ta agtultuloy latta ti pannakaipaganetget ti pannakatagiben ti kabaybayan ti ili babaen iti tulong ti Gobierno Munisipal ken iti DA-BFAR Regional Office 1 nga idauluan ni Regional Director Nestor Domenden, CESO V.


Timmalantan met ni SBM Benedict Savellano, Chairman, Committee on Agriculture iti Sangguniang Bayan iti  aldaw ti seminar. Kimmablaaw, nagyaman ti  puersa a pannakainayon ti 35 a Deputized Fish Warden a maikkan ti bileg nga agipatungpal ti pagannurotan iti pannakamantener ti umisu a panagkalap ken panangaywan iti rekursos iti kabaybayan ti ili. #  (Insurat ni JOED SABIO SAJONIA) 









 

Friday, October 28, 2011

FARMER’S FIELD DAY, NAISAYANGKAT ITI BRGY. TUROD PATAC

Cabugao, Ilocos Sur (Oktubre 28, 2011) –     Naangay ti Farmer’s Field Day dagiti mannalon iti Brgy. Turod Patac, Cabugao, Ilocos Sur idi Oktubre 27, 2011 nga inesponsoran ti SL Agritech Corporation ken tinarabay ti Konseho ti Barangay nga idauluan ni Brgy. Captain Edgardo Sonido.

Timmulong met a nangiwardas daytoy nga aktibidad ni Mr. Nerio Daproza, Municipal Rice Program  Coordinator a kas paset ti programa ti DA-LGU ken Gobierno Munisipal nga idauluan ni  Mayor Edgardo “Ediboy” S. Cobangbang, Jr.


Segun ken ni Mr. Nordito Surtido, inabrasa a dagus dagiti mannalon ditoy ti panagmula ti Hybrid Rice manipud idi 2001 a pannakaisaknap ti panagmula ti Hybrid. Karkulasionna ket agarup 20% laengen ti agmulmula ti inbred ditoy a barangay.

Iti programa, nagatendar ni Vice Mayor Danny Q. Gazmen ket kimmablaaw ken nagyaman ta adda dagiti korporasion a mangidanon ti mapabpabaro a teknolohia ken wagas ti panagpaadu ti apit a kalkalikaguman met ti Gobierno Munisipal.

Ni Vice-Mayor Danilo Q. Gazmen (L) ken ni Punong Brgy. Edgardo Sonido (R)
Naannayas ti lektiur, miting, ken diskusion a porma ti programa ket ditoy nga imbatad ni Brgy. Captain Sonido a nakapagmula met  ti 50 kilos a Hybrid kas pangdanggayna kadagiti kabarangayanna  ket inallukoyna ti Management ti SL Agritech Corporation nga iwayatna latta  ti programana ti Hybrid iti lugarda  yantangay sisasagana ti 100 ektarias a maraepan ti Hybrid iti umay a main crop ken natibker ken natudio dagiti kalugaranna a mannalon a makigamulo kadaytoy a gay-at. Kiniddaw pay ni Kapitan Sonido ti crop loan iti inputs manipud  iti korporasion.

Immatendar met da Mrs. Zenaida S. Andrada, Municipal Agriculturist ken kakaduana iti DA-LGU, MAFC Chairman Rogelio Barlolong, Federated Farmers’ President Elmer G. Bromeo, dagiti agmulmula ti Hybrid iti nadumaduma a barangay ti ili ti Cabugao tapno makipagadalda kadagiti naballigi a wagas ti panagmula ti Hybrid iti pagdindinamagan a “Barangay Top Producer” ti Hybrid Rice ti Barangay Turod-Patac kas naibaga dagiti taga-DA-LGU.


Kaaduan a naimula ita a panagtalon ti Wet Season 2011 ket SL 11, SL 8, Bigante,  ken TH 82  a nakagun-odanda ti nangato a bilang ti maapit nangruna koma no di naapektaran ti naglabas a bagyo.
Dagiti staff ti SL Agritech a kinatinnulong ti Barangay Turod Patac ken  DA-LGU a nagpa-Field Day ket isuda: Marlon Antonio, FSO Ilocos Norte;  Tomas Busay, FSO Ilocos Sur, Ruel Ganareal, TSR Region 1 ken Cathy Galura,  Senior  Vice President, SL Agritech Corporation. # (JOED SABIO-SAJONIA)