FIELD DAY AND GRADUATION TI MANNALON ITI BRGY. SABANG, NAARAMID

Cabugao, Ilocos Sur – Naangay ti LGU-Cabugao Field Day and Graduation ti Season-Long Farmers’ Field School  of Local Farmer Technician on Sustainable Rice Production kadagiti nagadal a mannalon a naggapu iti Barangay Sabang idi Oktubre 26, 2018 iti Covered Court, Barangay Sabang, Cabugao, Ilocos Sur.

Daytoy a panagadal ket inesponsoran ti Dapartment of Agriculture-RFO 1;  OPAG-Ilocos Sur ken iti LGU-Cabugao nga idauluan ni Mayor Josh Edward S. Cobangbang.  Impatungpal ti DA-LGU a tarawidwidan ni Mr. Obas Bill Y. Baclig, AT/Supervising Technician.

Nangipaay ti Mensahe ni Mayor Josh Edward S. Cobangbang. Kimmablaaw ken nagyaman kadagiti nagturpos, opisiales ken lumugar ti Barangay Sabang. Dinakamatna ti pateg ti panangadaptar   dagiti mannalon iti agtultuloy a panagbaliw/pannakaipakat  ti Teknolohia iti panagmula ti pagay. Insingasingna a maipakat  koma met ti kakastoy a proyekto kadagiti dadduma a barangay iti panagmulaan ti pagay tapno napardas ti panagdur-as  dagiti mannalon  iti Munisipalidad ti Cabugao.

Nangipaay met ti mensahe ni SB Member Atty. Randy Baniaga G. Kinaud, Committee Chairman  on Agriculture ket kimmablaaw kadagiti nagturpos, opisiales ken lumugar ti Barangay Sabang. 

Kalpasan ti intermission number dagiti nagturpos, naipresentar ti pakabuklan ti datos ti naaramid a panagadal (aktual ken teoria).

Kinompirmar ni  Mayor Josh Edward  dagiti naggraduar iti nasao a kurso.

Kabayatanna, mapadpadayawan ti apit iti pagay iti resulta dagitoy a nairusat a panagadal/panagtakuat iti Probinsia ti Ilocos Sur partikular iti ili a Cabugao tapno mamantener ti umdas   a pagtaraon a bagas. Nupay kasta, naaramid daytoy a panagadal tapno mapaadu pay ti apit ta dakkel ti epektona ti Climate Change iti panagbaba ti maapit.  Babaen iti   eco-friendly a sistema ken wagas  ti  teknolohia a maipakat,  basbassit  ti  magastos dagiti mannalon ket masulnitan daytoy a pagbabaan ti maapit.   

Naaramid ti Awarding of Certificates and Recognition of Oustanding Performance dagiti nagturpos.

Nakikaysa ni Mr. Marcelino Alibin ti OPAG-Ilocos Sur ken ni Ms. Larina Zabala ti DA-Region 1 kasta metten da SBM Danny Q. Gazmen ken ni SBM Vicky S. Serna. Nakikaysa pay da Mr. Henry B. Saliganan ken ni Mr. Bert Vicente, agpada a Local Farmer Technician a katulongan iti DA-LGU.

Nagsarita met  ni Mr. Robert Savella.  Nakikaysa met dagiti  lumugar ken Opisiales  ti Barangay Sabang.  # (Web In-Action)