MDRRMC-CABUGAO, NAGALERTO ITI IMMAY A BAGYO!

Cabugao, Ilocos Sur – Nakasagana  a  nagtignay ti puersa ti Municipal Disaster Risk Reduction Management Council (MDRRMC)-LGU Cabugao, Ilocos Sur iti panangidaulo ni Mayor Josh Edward S. Cobangbang, MDRRMC Chairperson   ken iti panangimaton ni MDRRMC Officer Engr. Nestor B. Somera     apaman a namonitorda  ti yuumay ni “Bagyo Rosita”  kangrunaan idi aldaw ti Oktubre 29, 2018.

Malaksid iti panagmonitor ti MDRRMC Members  iti National Highway, napanda  kadagiti calamity prone area (inland ken coastal area)  tapno makitada dagiti arayatenda gapu iti epekto ti angin ken kabulonna a tudo.

Daytoy a panagsagana ket naibasar iti nangato a level ti koordinasion iti MDRRMC kadagiti kabinuligna nga Opisina ken Ahensia ti Gobierno a kas iti PDRRMC ken iti NDRRMC   iti idadaliasat ti didigra a mapasamak iti las-ud ti AOR (Area of Responsibilities-da).

Kabayatanna, inalerto ti MDRRMC dagiti naapektaran a pamilia kadagiti Coastal Barangay ti ili ket no addada man ket maipanda iti pasdek ti Cabugao Evacuation Center sadiay  Barangay Bonifacio, Cabugao, Ilocos Sur ta ditoy a palabsenda ti dawel ti didigra.

Determinado met dagiti mangbukel ti Cabugao Rescue  a pannakaramay ti MDRRMC iti Munisipio nga ag-monitor, ag-rescue ken ag-clearing kadagiti maapektaran iti didigra a disso  kalpasanna.

Kabayatanna, naaramid ti dialogue
ken ni  Mayor Josh Edward S. Cobangbang  maipapan iti Typhoon Rosita dagiti Opisiales ti Ili, Department Heads/Employees ken  pannakabagi ti linteg.

Natratar pay iti maisayangkat a Preemptive Evacuation kadagiti maapektaran babaen iti MDRRMC-Cabugao ket nakikoordinar kadagiti kameng ti Cabugao Rescuers ken ti  PNP Maritime a nakabase iti Barangay Salapasap.

Inaramidda ti nagtultuloy a pannaki-koordinar ken pannakitinnulongda kadagiti timmarabay nga Opisiales ti Ili kabayatan ti ilalasat ti nadakamat a bagyo ken iti  pannakikaysada kadagiti dadduma a Departamento ti LGU a kas iti MSWDO ken ti  MHO-RHU ken kasta metten iti PNP ken BFP  a kaduada a  maseknan no dumteng ti kalamidad  tapno napigpigsa ti grupoda a mangaksion kadagiti pakaseknan dagiti umili nagruna kadagiti barbarangay.

Dagitoy nga aksion ken inisiatiba ket maigapu iti napartak a panangipatungpal ti pagrebbenganda  iti MDRRMC-Cabugao  nga idauluan ni Mayor Josh Edward S. Cobangbang, MDRRMC Chairperson   nga agibagnos iti maaramid nga aksion iti panawen a  dumteng ti  didigra tapno maprotektaran wenno maalay-ayan  dagiti umili iti epekto ti kalamidad. # (Web Situational Report)