FERTILIZER DISTRIBUTION PARA ITI MULA A TABAKO, NAIGANNUAT

Cabugao, Ilocos Sur – Naaramid ti Ceremonial Distribution   ti  libre a ganagan (ULPI Basal 10-18-24) a maited para kadagiti mannalon ti birhinia a tabako kadagiti barangay iti ili a Cabugao, Ilocos  Sur iti Enero 21, 2019 ket naangay ti programa iti Cabugao Cultural and Sports Complex, Barangay Rizal, Cabugao, Ilocos Sur sakbay ti distribusion. Daytoy a maited a tulong ket naggapu iti Gobierno Probinsial nga idauluan ni Governor Ryan Luis V. Singson.

Indauluan ni   Mayor Josh Edward S. Cobangbang dagiti naggapu iti Munisipio kasta metten dagiti Staff ti Municipal Agriculture Office a nangimatang iti pannakaited ti stub kadagiti naka-masterlist a mannalon ti tabako.

Indauluan ni Mr. Marcelino Alibin ken ni Mr. Oscar Tobia iti Office of the Provincial Agriculture Office  (OPAG) dagiti Personnel ti Opisinada a nagited iti stub kadagiti mannalon a naglilinia iti tunggal barangay.

Nasangaili ni SPM Efren “EJ” Rafanan, Committee Chairman  of Agriculture iti Hunta Probinsial ket impadanonna ti Mensahe ni Governor Ryan Luis V. Singson kadagiti mannalon iti panangawatda ti tulong para kadagiti agmulmula ti tabako ditoy nga ili.

Iti biang ni Mayor Josh Edward, nagyaman ken ni Governor Ryan Luis V. Singson  iti naipaay manen a tulong kadagiti kailianna ket agtultuloy latta dagiti pagsayaatan dagiti mannalon babaen iti kinatunosda  babaen iti  talek ken pammatida  iti Gobierno Munisipal ken Probinsial  ken iti agtultuloy a programa a para iti pagsayaatan a maited kadakuada. 

Nangipaay met ti Mensahe da Vice Mayor DJ Savellano ken ni Federated Farmers President Modesto P. Ronque.

Daytoy a gannuat ket  mayataday iti programa iti pannakaidur-as ti  panagmula ti tabako babaen iti LGU-Cabugao   nga idauluan ni Mayor Josh Edward S. Cobangbang tapno mamantener iti kaadu ti maimulmula a tabako ditoy nga ili ket matulongan met iti  sapasap iti pagimbagan a masagrapda babaen iti pagsayaatan nga itden ti bingay ti ili iti  RA 7171. 

Nakikaysa met iti nadakamat a Ceremonial Distribution da SBM Danny Q. Gazmen; SBM Vicky S. Serna; SBM Dr. Jemaima S. Tan-Yee; SBM Josefina S. Vallejo; SBM Dodgie Santella; SBM Jayhan Alcid-Tan; SBM Atty. Bryan Jett S. Pano; ABC President Thaddeus U. Soller ken ni Mr. Edgar S. Balangatan, Coordinator. # (Web In-Action)