Agtultuloy ti pannakapadur-as ti serbisio ti Gabriela Silang General Hospital – Ilocos Sur General Hospital ken dagiti amin a district hospitals a manmaneharen ti Provincial Government tapno maserbian dagiti pasiente nangruna kadagiti napanglaw nga agkasapulan iti pannakataripato ti salun-at.
Dayta ti nagkaykaysa nga inrakurak ni Dr. Trina Tabboga Talaga, Provincial Health Officer ken Chief of Hospitals, ken dagiti district hospital a manmaneharen ti Provincial Government kabayatan ti pannakiuman dagiti kameng ti Ilocos Sur Integrated Press iti naangay a Kapihan iti Amianan Media Forum.
Nakikaysa iti media forum dagiti head dagiti district hospitals a da Dr. Susan Seguban ti Sinait; Dr. Leticia de Vera ti Magsingal; Dr. Ronald Tobias ti Narvacan; Dr. Federico Anaen Jr. ti Salcedo; Dr. Bienvenido de Gracia III ti Santa Lucia; ken Dr. Oseas Diasen. Saan met a nakaatender ti officer in charge ti district hospital sadiay Cervantes.
Impakaammo ni Dr. Talaga nga idi 2018 ket naisayangkat ti reshuffle dagiti mangidaulo kadagiti district hospitals babaen ti order ni Governor Ryan Singson tapno maikkan ti gundaway dagiti amin a mangidaulo kadagiti district hospitals nga agsisinnukat iti padas ti panangimaton para ti pannakapadur-as ti serbisio kadagiti pasiente. Inlawlawagna nga agtultuloy ti pannakapasayaat dagiti amin a pasilidad, kangrunaanna ti pannakanayon dagiti laboratory, health instruments and equipments ken bed capacities dagiti district hospitals tapno ad-adu dagiti maakomodarda a pasiente kangrunaanna dagiti napanglaw.
Impakaammo dagiti district hospital heads a kaaduan a pasienteda iti naglabas ket dagiti kadawyan a sakit. Impakaammoda a manipud idi nangrugin ti nainget nga implementasion ti panagaramat iti helmet dagiti agmotmotorsiklo ket bimmassiten dagiti fatal a pasienteda a maak-aksidente.
Impakaammo met ti head ti Santa Lucia District Hospital ti panagadu dagiti binakunaanda a kaso ti anti-rabbies. Nailawlawag nga adda panagkurang ti supply ti anti-rabbies vaccines gapu ti kontrobersial a Dengvaxia vaccines, ngem naipaganetget a saan a problema ti pondo a maigatang iti bakuna. Naipaganetget a tapno masaluadan ti biktima dagiti rabbies ket nasken a mabakunaan dagiti amin a taraken nga aso ken pusa. Nailawlawag a dagiti naan-anay a nakapetanen iti rabbies ket awanen ti namnama a masalbarda pay, ket naipalagip iti kanayon a panagannad iti pannakakagat kadagiti ayup.
Impakaammo met ti mangidaulo ti Salcedo District Hospital ti agtultuloy a pannakapadur-as ti ospitalda a nanayonanen dagiti pasdek ken pasilidadna. Impaganetgetna ti kinapateg ti mapadur-as a serbisio ti ospital iti Salcedo nga agserserbi iti inaldaw kadagiti nagadu a pasiente manipud kadagiti asidegna nga upland municipalities kas ti Sigay, Del Pilar, San Emilio ken Quirino.
Nailawlawag iti media forum nga awanen daydi panawen a dagiti doctor kadagiti public hospitals iti Ilocos Sur ket isuda met laeng ti akinkukua kadagiti botika kadagiti asideg dagiti balay-pagagasan. Naipaganetget a dagiti pharmacy kadagiti public hospitals ti mangikagumaan a mangipaay kadagiti kasapulan a medisina dagiti pasiente. Naipasingked pay a mortal a basol kadakuada a government doctors ti agireseta kadagiti branded medicines, ket dagiti iresetada ket dagiti generic medicines nga addaan iti nasayaat a reputasion ken napaneknekanen ti kinaepektiboda a pagagas. Nagballaagda met ti panagannad kadagiti fake medicines ken fly by night generics medicines. Nailawlawag pay a nasken a dagiti agas nga ireseta dagiti doctor ket ilawlawagda met dagiti kasinginna a side effects ta amangan no dakdakes ti epekto a parnuayenna.
Impasingked dagiti mangidaulo kadagiti government hospitals iti Ilocos Sur nga amin dagiti doctor, nurses ken medical personnel ket addaan iti naan-anay nga adal ken panagsanay nga agserbi kadagiti pasiente nga addaan iti nagduduma a sakit ken problema iti salun-at, ket kiniddawda ti panagtalek dagiti umili iti kabaelanda.
Inrakurakda a dagiti government doctors kadagiti padada nga agpapaay kadagiti public hospitals a nasken nga addaanda iti ayat, compassion ken tarigagay nga agserbi kadagiti pasienteda a kaaduanna ket dagiti napanglaw. Impaganetgetda a kas doctor iti gobierno, ket awan kadakuada dagiti adu a masapulan ken luxury benefits a sagsagrapen dagiti padada a doctor nga agpa-private practice, ngem mariknada ti awan-kaparisna a ragsak iti panagserbida kadagiti tattao nangruna kadagiti napanglaw. # Source - Eden Alviar/TAWIDNEWS
No comments:
Post a Comment