Kasapulan iti nayon nga oras iti pannakaisuro dagiti academics and technical classes ti K to 12 (Kindergarten to Grade 12) Program ti Department of Education tapno mapasingkedan ti panagballigi ti programa a mangipaay iti basic education kadagiti ubbing ken agtutubo.
Dayta ti inrakurak ni DepEd Vigan City Division Office Superintendent Anselmo Aludino kadagiti kameng ti Ilocos Sur Integrated Press iti naangay a Kapihan iti Amianan Media Forum.
Inlawlawag ni Supt. Aludino a gapu ta nabiit pay a narugian ti K to 12 Program ken nagturpos ti umuna a batch ti Senior High School ket narigat pay a makedngan ti bunga ti programa. Impaganetgetna a nasken ti nainget a pannakaipatungpal ti K to 12 Program tapno mapadur-as ti kalidad ti basic education iti Pilipinas kas mayataday iti international standard ken iti probision ti 1987 Constitution a responsibilidad ti gobierno ti mangipaay iti dekalidad a basic education kadagiti Pilipino.
Impaganetgetna a kasapulan ti pannakanayon iti oras ti pannakaisuro dagiti academic and technical classes iti K to 12 Program tapno mapasingkedan a dagiti agturpos iti Senior High School ket naan-anay a maaddaandanda iti tumutop nga adal ken panagsanay a mangisagana kadakuada a sumrek iti kolehio ken trabaho wenno pagsapulan. Sinalaysayna ti personal a padasna nga immuna a nagturpos iti kolehio sakbay a nagadal iti kurso a teknikal-bokasional tapno manayonan dagiti ammona.
Impakaammona pay nga agsagsaganan ti DepEd iti Vigan City Division para ti pannakipaset dagiti atleta iti masungad a Region 1 Athletic Association (R1AA) a maangay iti Ilocos Norte. Impasingkedna ti suporta ti City Government iti panangidaulo ni Mayor Juan Carlo Medina, ken panagalada kadagiti baro a coaches ken trainors, ken naan-anay a panagsanay dagiti atleta tapno mapangato pay ti standing ti Vigan City iti R1AA. Inlawlawagna a nababa ti standing ti Vigan City iti naglabas nga R1AA gapu iti kabassit dagiti atletada ken limitado laeng nga sport events dagiti nakisalisalanda.
Impanakkelna met ti nangato nga individual standing dagiti delegado ti Vigan City iti naangay a pasalip a Regional School Press Conference sadiay Lingayen, Pangasinan gapu iti suporta ti City Government ken tulong ti Ilocos Sur Integrated Press ken Gunglo dagiti Mannurat nga Ilokano iti Ilocos Sur. Impeksana ti tarigagayna a maangay ti pasalip iti Ilokano school journalism iti Division level iti Ilocos Sur tapno maparegta dagiti ubbing ken agtutubo nga agessem iti panagsurat iti nakayanakanda a pagsasao.
Impakaammona pay nga iti agdama ket ar-aramaten pay laeng dagiti mangisursuro iti Vigan City Division Office iti panagisuro iti Mother tongue kadagiti ubbing ti Ilokano Ortography nga inaprobaran ti Komisyon ng Wikang Pilipino wenno Tarabay nga insagana dagiti mabigbig nga Ilokano a mannurat, imbes a ti kontrobersial a baro nga ortograpia nga inyetnag ti KWF itay 2018. Inlawlawagna a nasayaat nga agtataripnong koma dagiti stakeholders iti Ilokano ortography tapno mapagpapatanganda dagiti aramidenda tapno mapabaknang pay ti lenguahe nga Ilokano.
Impakaammona pay ti suportana iti gakat iti Kongreso a panagbalin a 56 ti tawen ti panagretiro dagiti agpapaay iti DepEd tapno maikkanda iti gundaway a nasapsapa a manglak-am ti nagrigatanda iti panagtrabahoda iti gobierno, ken mabalinda pay iti bumirok iti sabali wenno mas produktibo a trabaho. Kiniddawna pay kadagiti kameng ti Kongreso a pannakaingato koma ti sueldo dagiti agpapaay iti DepEd ken dadduma nga agserserbi iti gobierno, kas iti sueldo dagiti polis, military ken unipormado nga agpapaay iti gobierno tapno ad-adda pay a maparegtada nga agserbi iti publiko.
Impalagipna met ti naindaklan nga akem dagiti mangisursuro ken nagannak dagiti adalanda nga estudiante iti panagtimpuyogda iti nasayaat a pannakatubay dagiti ubbing ken agtutubo tapno dumakkel ken tumanorda a responsible a kameng ti kagimongan. # Source - Eden A. Alviar/TAWIDNEWS
No comments:
Post a Comment