Cabugao, Ilocos Sur (Marso 7, 2011) – Nayetnag babaen ti maysa nga ordinansa ti kalikagum ti Ama ti Ili, Mayor Ediboy S. Cobangbang, Jr. nga ag-community service laengen dagiti mapasingkedan nga aglabsing ti linteg-trapiko iti ili tapno maipasagepsep ti disiplina a pannakamobilisar ti luglugan uray dagiti traysikelan a mangpasayaat met laeng ti panagdaliasat ken maliklikan pay ti aksidente.
Tunggal ummong a pakitaripnongan ni Mayor Ediboy ket saan a nagliway a nangilawlawag ken nangipakdaar daytoy a pagannurotan ket katulonganna ti Sangguniang Bayan ti ili a nangipasa ti ordinansa a nangadaptar kadaytoy a linte ken sistematiko ti pannakaipatungpalna.
Kangrunaan nga aturen daytoy a pagannurotan ti kaaduan a panagparking dagiti traysikelan iti nagkurusan ti kalsada ti poblasion a puon ti dandani la pakaidungparan ti agsikko a lugan nga aggapu iti agsumbangir a direksion ti kanto.
Kayat ti Mayor nga adda masnop a pagparkingan ti lugan ket ti tao a mismo ti mapan agakay ti pasaherona ta nalaklaka nga aglisi no adda sumungad a lugan.
Mangnamnama ti Mayor a positibo ken konstruktibo ti panangawat dagiti umili kadaytoy nga addang kadagiti agig-iggem ti lugan nga umili agsipud ta pagsayaatan met ti kaaduan ti iresultana. #
No comments:
Post a Comment