Thursday, October 19, 2017

DELEGASION NI GOV. DAVID IGE TI HAWAII, NAGBISITADA DITOY CABUGAO

Cabugao, Ilocos Sur – Naaramid ti panagbisita dagiti Delegado ti Filipino Chamber of Commerce of Hawaii (FCCH)  nga indauluan ni Hawaii Governor David Y. Ige iti Sakada Monument a masarakan  idiay Salomague Port, Barangay Salomague, Cabugao, Ilocos Sur idi malem ti Oktubre 18, 2017.

Indauluan ni Mayor Josh Edward S. Cobangbang dagiti namasangbay kadagiti Bisita ken naregget dagiti kameng ti Salomague Elementary School Marching Band a nangpasungad kadagiti sangaili.


Di mabayag, naaramid ti Opening Program iti Compound ti Puerto. Nag-Welcome Message ni  Mayor Josh Edward S. Cobangbang Kimmablaaw ken nagyaman iti amin a naitaripnong iti programa. Kinuna ni Mayor Josh Edward a nagasat ti isasangbay dagiti sangaili manipud iti Hawaii kas panangipamatmat iti agtultuloy a napintas a panaglangen, pannakapatibker iti singensinged dagiti Opisiales ken kadaraan nga Ilokano ken Filipino iti Estado ti Hawaii ken dagiti umili iti  Cabugao.

Innayon ni Mayor Josh Edward a naimbag unay a mataliaw ken mabigbig  dagiti sakripisio dagiti Sakada a nakaigapuan ti pannakagun-od ti balligi dagiti kailian iti agsumbangir a lugar. Daytoy a seremonia ti panangbigbig iti naballigi a gapuanan dagiti Sakada ket napintasto met nga ipadanon dagiti Delegado  kadagiti kadaraan a Filipino  inton agsublida idiay Hawaii.

Simmaruno a nag-mensahe ni Governor David Y. Ige. Kimmablaaw ken nagyaman ta nabara ti panangsarabo dagiti umili ti Cabugao, Ilocos Sur nga idauluan ni Mayor Josh Edward S. Cobangbang. Dinakamatna ti pateg iti nairut a panagkadua ti Estado ti Hawaii ken ti ili a Cabugao ket mapatpatibker latta babaen iti panagbisita iti agsumbangir. 


Binigbig ni Governor Ige  ti nagkaadu a kontribusion ken gapuanan  dagiti Filipino uray met dagiti Ilokano  nga agindegen iti Estado a nangrugian iti ipapan  dagiti Sakada ditoy a lugar. Innayonna a napateg met a bigbigen daytoy nga impatawid dagiti nagkauna a Filipino ket  naigameren iti identidadda iti pakasaritaa ken Kultura iti Estado ken  pakabuklan metten ti naglaok a pakakitkitaan iti napintas a panagtipon iti puli ti Filipino ken iti dadduma a Puli iti Hawaii.  Imbatad pay ti Gobernador iti pateg ti sakripisio, gapuanan ken panangpadayaw kadagiti Sakada a nakaigapuan iti adu a balligi dagiti Ilokano iti Hawaii ken iti naggapuanda nga ili. 

Simmaruno ti Floral Offering iti Monumento ti Sakada babaen iti panangidaulo da MayorJosh Edward; Governor David Y. Ige ken ti kaingungotna, ni Ms. Dawn Amano-Ige; Opisiales ti FCCH nga idauluan ni Mr. Brandon de la Cruz; ken ti Consul General    iti  Hawaii a binayabay ni Kagawad Perla de la Cruz ti Brgy. Salomague.

Kalpasan ti Floral Offering ken Group Picture, inted dagiti nagsangaili dagiti bags a naglaon iti token kadagiti amin a kameng ti Delegasion iti Estado ti Hawaii banag a nakaragsakan met unay dagiti agawid a Bisita.

Nagatendar met dagiti kameng ti  Sangguniang Barangay ken ti BPATS  iti Barangay Salomague nga idauluan ni Barangay Captain Eliseo R. Serrano.

Nakikaysa met da SBM Danny Q. Gazmen ken  ni ABC President Thaddeus “Teddy” U. Soller.

Tinokaran ti Salomague Elementary School Marching Band iti        panagrubuat/panagluas dagiti Bisita nga agturong idiay Vigan City. Paset iti itineraria-da nga immay ditoy Ilokos ti ili a Cabugao, Ilocos Sur; Laoag City; Vigan City ken mapanda pay  iti Cebu City, segun iti napagdamagan a kameng ti Delegasion.

Nagpaay nga Emcee ni Mr. Arvin Jay Manauis, Staff, Office of the Mayor. # (Web In-Action)




No comments:

Post a Comment