Cabugao, Ilocos Sur – Naangay ti dua nga aldaw a Cabugao Athletic Association Meet iti Cabugao Athletic Oval, Cabugao South Central School, Brgy. Bonifacio, Cabugao, Ilocos Sur itay nabiit (Setiembre 5-6, 2019).
Dagiti agsasalip ket dagiti napili nga atleta iti uppat a Zona iti naangay a Zone Meet iti kallabes iti 26 a pageskuelaan a nakabuklan dagiti sumaganad: Zone 1- dagiti pageskuelaan ti Pug-os, Reppa-ac, Nagsantaan, Salapasap, Bungro, Margaay ken ti Cabugao North CS; Zone 2- dagiti pageskuelaan ti Turod, Namruangan, Daclapan, Salomague, Dardarat ken Sabang; Zone 3- Cabugao South CS, Sagayaden, Pila, Nagsincaoan ken Lipit; Zone 4 – dagiti pageskuelaan ti Maradodon, Catucdaan, Sisim, Cael-layan, Cuantacla, Aragan, Arnap ken Carusipan.
Mairaman met ditoy nga agsasalip dagiti Players dagiti sekundaria a pageskuelaan a kas iti Cabugao National High School; Pug-os NHS; Sisim NHS; Lipit NHS ken iti Cabugao Institute.
Sakbay ti rugi ti Kompetision ket naangay ti Parada iti aglikmut ti Poblasion a nagpartisiparan dagiti Atleta, Officiating Officials, Coaches, FPTA Officials, ken Guests.
Nagtungpal ti Parada iti sango ti napapintas nga Stage ti likud ti Cabugao South Central School ket ditoy a nairugi ti Programa.
Indauluan da Public Schools District Supervisor Dr. Consesa T. Rumias ken ni Mrs. Estrellita M. Siruno, Principal III ti delegasion dagiti pageskuelaan iti Cabugao kadagiti aktibidad ti sports a napasamak iti eskuela ti Cabugao South Central School.
Nangipaay ti Mensahe ni Mayor Edgardo “Ediboy” S. Cobangbang, Jr. ket kimmablaaw ken nagyaman iti pagsayaatan a maaramidan ti sports kadagiti ubbing ken agtutubo ken iti kinaregta dagiti mangisursuro a katulongan latta a manghulma iti panagtan-ay dagiti ubbing nga agbalin a naresponsable nga umili.
Nangipaay met ti Mensahe ni SBM Marc Russel Morales, SK Federated President, Committee Chair on Sports ket dinayawna ti napintas a panangkomplementar ti pageskuelaan kadagiti ilungalong ti LGU-Cabugao a pagsayaatan ti sports.
Naisaruno a naaramid ti Presentation of Athletic Delegation iti uppat a sona babaen kadagiti Presidente-da ken dagiti pageskuelaan-sekundaria a mairaman iti Kompetision.
Naisaganad ti pannakaisa ti District Athletic Flag ken iti Raising of the Zone Delegation Flags babaen kadagiti Zone Presidents.
Nagatendar met ni SBM Josh Edward S. Cobangbang iti nadakamat a programa sakbay ti game proper.
Kaangrunaan a timmarabay ni Mr. Ronel M. Ubaldo, District MAPEH Coordinator iti naballigi a pannakaigannuat ti tinawen a paay-ayam iti Distrito ti DepED ti Cabugao. # (Web In-Action)
No comments:
Post a Comment