Cabugao, Ilocos Sur – Naangay ti Pay-out (over the counter) kadagiti kameng ti Pantawid Pamilyang Pilipino Program (4 P’s) kadagiti 33 a barangay ti ili a Cabugao, Ilocos Sur iti Mayo 5, 2015 iti Opisina ti MSWDO-Cabugao ken ti 4 P’s, Municipal Operations Office (MOO) - LGU Cabugao, Ilocos Sur.
Dagiti immawat a 4 P’s ket addada iti masakupan ti dua a bulan (Enero-Pebrero 2015) babaen iti panangbayad ti Rural Bank of Gattaran, Inc., Cagayan Valley a daytoy ket partner ti programa ti DSWD-Region 1 iti pannakaited ti Cash Grant kadagiti Beneficiaries.
Sakbay a naited kadakuada ti gatad, naulit ti panangited ti pammagbaga dagiti Staff a mangbukel ti Municipal Link-Cabugao kadagiti Recipients kadagiti pagrebbenganda iti panangusarda kadagitoy nga awatenda a gatad.
Inimatangan ni SBM Josefina S. Vallejo iti nadakamat a pay-out ken inatendaran met ni Mayor Edgardo “Ediboy” S. Cobangbang, Jr. ket nakisarsarita kadagiti 4 P’s Beneficiaries ken dagiti pannakabagi ti DSWD Regional Office 1 ken ti Rural Bank of Gattaran, Inc. a nangited kadagiti kantidad para iti nadakamat nga awaten dagiti 4 P’s nga umabot iti P400,000.
Paset iti panagsarita ni Mayor Ediboy iti panangipeksana iti ragsakna iti pannakasagrap manen dagiti kailianna iti kaipapanan ti nasional a programa ti DSWD. Pinagyamananna ti Ahensia ti DSWD ken dagiti mangibagbagi kadagitoy ta immayda indanon dagitoy a benepisio a saanen nga agrigat dagiti maseknan a mapan mangala iti adayo – a daytoy ket mairaman met a mapasayaat ti panagsirkular ti merkado iti pannakadesponer kadagitoy a gatad iti mayataday a pakaigastuanda.
Innayon ti Ama ti Ili nga awan ti pangisukatanna kadagitoy a pagimbagan a masagsagrap dagiti kailianna ken iti agtultuloy a napintas a pakasarsaritaanda a nalaingda nga agtungpal kadagiti mayetnag a pagannurotan a katukad ti benepisio nga aw-awatenda ket dagitoy ti awiten dagiti Opisiales ti DSWD ken banko nga ipadamag a naurnos ken naresponsable dagiti 4 P’s Beneficiaries a dandanonenda ditoy ili a Cabugao.
Dagitoy nga aksion ken inisiatiba ket maigapu iti nasaknap a pannakaipakat ti pro-poor program ken iti agtultuloy a pannakikammayet ti Gobierno Munisipal nga idauluan ni Mayor Edgardo “Ediboy” S. Cobangbang, Jr. kadagiti maseknan/tumulong nga Ahensia a kas iti DSWD a katulonganda a mangipatungpal kadaytoy a programa para kadagiti marigrigat a kaamaan ti kagimongan. # (Web In-Action)
No comments:
Post a Comment