UMUNA NGA ALDAW TI BRIGADA ESKWELA, NAILUNSAD

Cabugao, Ilocos Sur – Maisayangkat ti “Brigada Eskwela”  iti  26 a bilang ti pageskuelaan iti Cabugao DepED District mangrugi iti Mayo 18, 2015 agingga iti Mayo 23, 2015.

Iti pannaki-amad ti Web In-Action kadagiti nagpartisipar iti Brigada Eskwela  kadagiti pagadalan iti Poblasion  iti Mayo 18, 2015, naibagada a tunggal kuarto ti pageskuelaan ket agdadanggay dagiti mangisursuro ken nagannak nga agurnos ken agdalus agraman iti ruar ti eskuela.

Innayon pay ti dadduma  a maar-aramid ita ti pannakapinta  dagiti alad, tugaw, ken dadduma pay a pasilidad ti pagadalan partikular iti pannakaital-o ti  hygiene and sanitasion dagiti ubbing.

Dagitoy a gannuat ket paset ti pannakaisagana ti pageskuelaan iti panagseserrek ti klase dagiti ubbing inton  Hunio  2015.  

Kabayatanna, adda met dagiti napili a pakaangayan ti “kicks off” ti nasao a programa ti DepED a  pageskuelaan gapu iti napintek a panagtitimpuyog dagiti Stakeholders: nagannak, mangisursuro, Barangay Officials   ken Gobierno Lokal iti agtultuloy a pannakapasayat ti pageskuelaanda.

Iti dayta a taripnong, agatendar dagiti pannakabagi  ti DepED District a mangsangaili kadagiti Bisita nga aggapu iti DepEd Division Office.

Sibubukel a puersa ti Konseho  ti Barangay agraman dagiti lumugar  nga idauluan ni Brgy. Captain a makipartisipar nga agdalus iti  aglawlaw ti pagadalan, agpukan iti natay a pinuon ti kayo, agpinta iti classroom ken kanaigna a trabaho iti pannakaisagana ti eskuela.

Idauluan met  dagiti mangisursuro ti dadduma a nagannak a makipaset iti nasao nga aktibidad.

Segun iti dadaulo ti pageskuelaan nga agyamanda iti  agtultuloy a panagkikinnammayet dagiti  Stakeholders, dagiti mangisursuro, PTA Officers, dagiti Opisiales ti Barangay ken iti agtultuloy a suporta ti LGU iti pannakapasayaat dagiti pageskuelaan iti Munisipalidad.

Ti Brigada Eskwela ket tinawen a programa ti DepED a pakikammayetan dagiti maseknan a katinnulongda iti benneg ti Multisektoral tapno maisagana ti pageskuelaan para iti panagseserrek ti klase dagiti ubbing iti bulan ti Hunio 2015. # (Web In-Action)