WHEELCHAIR FITTING, NAISURO KADAGITI BHW’s ITI MEDICAL MISSION

Cabugao, Ilocos Sur – Naisayangkat ti Medical Mission ti ROPHEH (Reaching out to Peoples Health Through Entrusted Hands) Mission Foundation, Inc. ken iti De la Salle Health Science Institute-College of Rehabilitation Sciences, De La Salle University iti ili ti Cab ugao ket maysa a kangrunaan a paset ti medical mission ket iti pannakaisuro ti “Wheelchair Fitting” kadagiti Barangay Health Workers (BHW’s) iti Munisipalidad ti Cabugao a kas pakabuklan ti programa ti nasao nga institusion maipapan iti pannakaipaay  ti wheelchair kadagiti agkasapulan nga umili ken indibidual.

Naaramid ti pannakaisuro dagiti BHW’s idiay Cabugao Cultural and Sports Complex, Brgy. Rizal, Cab ugao, Ilocos Sur idi Mayo 3, 2015.

Ti Medical Mission ket naigannuat babaen iti  panangesponsor ti Pamilia ni Ex-SBM Dr. Carlito S. Pano ken iti  pannakikammayetna iti  Local Government Unit (LGU)-Cabugao nga idaluan ni Mayor Edgardo “Ediboy” S. Cobangbang, Jr. iti pannakaipatungpal daytoy a panagagas.

Impeksa  ni SBM Atty. Bryann Jett S. Pano, anak daydi SB Member Dr. Carlito S. Pano a  nakaidatonan pay ti medical mission iti Anibersariona/lagipna iti panagyamanda iti LGU-Cabugao iti panagballigi daytoy dua nga aldaw a pannakatulong kadagiti umili.

Iti pannaki-amad ti Web In-Action kadagiti Medical Staff and Personnel a nangtarawidwid iti panagagas, nairehistro  dagiti nagpaagas iti benneg ti  Medical, Urinalysis, Blood Typing   ken kaaduan iti bilang ti ubbing  a nagpa-Circumcise  iti umuna nga aldaw.

Ti pannakaitandudo ti sapasap a salun-at kadagiti umili ket prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken pakaseknan pay dagiti naayat a gunglo-sibiko  a mangipapaay ti libre a  serbisio iti salinong ti LGU tapno agtultuloy a naragsak dagiti umili a mangsagrap iti gin-awa  nga itden ti agtultuloy a panagdur-as ti ili. # (Web In-Action)