Cabugao, Ilocos Sur – Naited dagiti Starter Kits kadagiti tallo a Batches ti Training nga in sayangkat ti TESDA; LGU Cabugao ken BUB Program ti DILG iti Mayo 2, 2017 iti sango ti Rizal Barangay Hall, Barangay Rizal, Cabugao, Ilocos Sur.
Buklen dagiti immawat iti 19 a Welder; 15 a Carpenter ken 15 a Mason ken naikkanda iti kompleto a mausarda (Starter Kits) iti panagturposda iti Skills Training nga inwayat ti TESDA babaen kadagiti Trainors ti Igama Colleges Foundation, Inc., Badoc, Ilocos Norte ken iti LGU-Cabugao babaen iti BUB Program ti DILG.
Indauluan ni Mayor Josh Edward S. Cobangbang agraman dagiti Konsehales nga isuda SBM Danny Q. Gazmen; SBM Vicky S. Serna; SBM Dr. Jemaima S. Tan-Yee; SBM Atty. Randy B. G. Kinaud; SBM Josefina S. Vallejo ken ni ABC President Thaddeus “Teddy” U. Soller iti pannakaiyallawat kadagiti Starter Kits.
Pinadayawan ni Mayor Josh Edward S. Cobangbang dagiti Trainees a nangleppas ti adalda a mabalindan nga isapul. Innayon ni Mayor Josh Edward nga awan ti rason a di maipaayan iti LGU-Cabugao iti pannarabay dagiti aggagar a pumintas ti biagna babaen kadagiti skills training nga ited dagiti Ahensia ti Gobierno.
Innayon ti Alkalde Munisipal nga ipategda dagiti ramit a naited kadakuada tapno mabayag nga usarenda ken bigbigenda ti nasursuroda ta awan ti pangisukatanda ta manayon daytoy a katulonganda.
Pinagyamanan met dagiti Skilled Trainees iti naadalda ken naited kadakuada nga alikamen kangrunaan ti LGU-Cabugao nga idauluan ni Mayor Josh Edward S. Cobangbang. Indauluan da Mr. Rexon Sevilleja ti Barangay Carusipan ken ni Mr. Junar Sistoza ti Barangay Baclig dagiti immawat ti Starter Kits.
Nakikaysa iti nasao a Turnover da Mr. Arnel Q. Gallardo, Supervising TESD Specialist ken ni Mr. Wendell L. Botacion, TESD Specialist II iti TESDA-Vigan City; MPDC Florante S. Jara ken ni Mr. Edgar S. Balangatan, AT, BUB Coordinator. # (Web In-Action)
No comments:
Post a Comment