Cabugao, Ilocos Sur – Naangay ti maikadua nga aldaw a panagtitipon dagiti kameng ti Proponent Group para iti 2-Day Project Briefing dagiti kameng ti Cabugao Mango Farmers Multipurpose Association nga idauluan ni Mrs. Faith Sabio, President. Nagatendar met dagiti pannakabagi ti Provincial Agriculture Office (OPAG-Ilocos Sur) nga idauluan ni Provincial Agriculturist Constante B. Botacion, Jr. babaen iti Provincial Project Monitoring and Implementation Unit (PPMIU); dagiti pannakabagi ti Regional Project Coordination Office (RPCO) ken Project Support Office (PSO) iti San Fernando City, Pampanga.
Iti Day 2, naangay ti programa iti Cabugao Cultural and Sports Complex, Barangay Rizal, Cabugao, Ilocos Sur. Kalpasan ti Opening Prayer ken ti pannakakanta ti National Anthem, naiyam-ammo dagiti kameng ti Proponent Group a buklen ti 7 a barangay ken dagiti amin a nagatendar.
Nangipaay ti Mensahena ni Pasado Mayor Edgardo “Ediboy” S. Cobangbang, Jr. ket bininsana ti pannakairugi ti proyekto ket gapu iti naan-anay a panagtungpal dagiti proponent group a nangpaadda kadagiti kasapulan ken panangsurotda iti proseso ket naaprobaran ken nagbunga iti ad-adu a maited a pagsayaatan dagiti panagan-anus dagiti nagkiddaw kadaytoy a proyekto a mangpasayaat ti kabibiag dagiti agpatpatanor ti mangga ken pakairamanan metten nga agnam-ay dagiti umili ti Cabugao, Ilocos Sur.
Nagsarita met ni Mayor Josh Edward S. Cobangbang ket kimmablaaw ken nagyaman iti amin a nagatendar ta nagbanagen daytoy a proyekto. Kinunana a babaen iti agtultuloy a pammati ken kinatunos dagiti kameng ti proponent group ket manaynayonan pay dagitoy a maited a proyekto ditoy Cabugao babaen iti World Bank a pagsayaatan dagiti umili.
Simmaruno a naipresentar ti Business Plan ti Asosasion ket imlawlawag ni Mrs. Faith Sabio ti pakabuklan ti produksion ken marketing ti mangga a kangrunaan a major component ti proyekto.
Kabayatanna, maar-aramid ti Mango Packaging Center Building nga aggatad ti 4.8 Million iti Barangay Baclig, Cabugao, Ilocos Sur; pannakaaramid ti Farm-to-Market Road nga agatiddog ti 16 a Kilometro nga agbalor iti 206 Million a sakupenna ti pito a barangay iti Cabugao ken mairaman iti Sinait.
Imbatad ni Mrs. Sabio a malaksid a mangparnuay ti trabaho ti produksion ken merkado ti mangga ket adda pay dagiti project intervention nga ited ti Philippine Rural Development Project (PRDP).
Ti Cabugao Mango Farmers Multipurpose Association (CMFMA) ket nangrugi iti 25 a Miembros ken nairehistro iti Department of Labor and Employment (DOLE) idi Tawen 2010.
Nakagun-odda ti proyekto iti World Bank babaen iti panangtarabay ti LGU-Cabugao ken iti PRDP a programa ti Department of Agriculture (DA). # (Web In-Action)
No comments:
Post a Comment