Cabugao, Ilocos Sur – Naangay ti Pay-out dagiti Senior Citizens kadagiti barangay ti ili a Cabugao, Ilocos Sur idi Abril 28, 2017. Naited dagiti pensionda iti pasdek ti Early Childhood Care Development Building, Brgy. Rizal, Cabugao, Ilocos Sur.
Nasapa a dimteng dagiti Senior Citizen Beneficiaries a naggapu iti nadumaduma a barangay ket naikkanda ti Social Pension/Stipend Claim Stub a pakaberipikaranda a kas kameng ti Senior Citizen ken dadduma pay a mapirmaan a papeles a naaramid sakbay nga inawatda ti dua a Quarter (Enero-Hunio 2017) a pakabuklan ti P3,000 a gatad a kaibatogan ti P500 ti kada bulan a pension iti maysa a Recipient.
Kabayatanna, immawat ti 1,123 a bilang ti Senior Citizen iti intero a Munisipalidad iti Social Pension ket umabot met iti P3,369,00.00 iti dagup ti gatad a naited kadakuada.
Nakipagtaming dagiti Staff ti MSWDO nga idauluan ni Mrs. Lydia S. Gazmen ken kasta metten dagiti pannakabagi ti DSWD; Municipal Treasurers Office Personnel agraman ni Office of Senior Citizen Association (OSCA) Head Mr. Remigio B. Sunico iti pannakaited dagiti pension/kantidad kadagiti benepisiario.
Dagitoy nga aksion ken inisiatiba ket agtultuloy a maipatungpal para kadagiti nataengan ken paset iti agtultuloy a programa ti Gobierno Munisipal nga idauluan ni Mayor Josh Edward S. Cobangbang ken iti Ahensia ti DSWD tapno matulongan dagiti sektor ti nataengan iti intero a Munisipalidad. # (Web In-Action)
No comments:
Post a Comment