Cabugao, Ilocos Sur – Nairubuat ti “Brigada Eskwela” 2017 kadagiti pageskuelaan ti ili a Cabugao nangrugi idi Mayo 15, 2017 a mayalubog iti National Schools Maintenance Week a masasao a Brigada Eskwela a nayeskediul iti May 15, 2017 agingga iti Mayo 20, 2017 iti intero a pagilian.
Naluktan ti Kick Off Activity ti Brigada Eskwela 2017 ditoy Cabugao babaen iti naaramid a Motorcade idi Mayo 15, 2017 kadagiti processional route ti ili ken iti National Highway a nangrugi iti Cabugao North Central School ken nagsubli met laeng ditoy dagiti nagpartisipar. Iti nasao a motorcade, inyuna ti Mobile Patrol Car ti PNP-Cabugao sa sinaruno dagiti motorista iti Cabugao Elite Riders Club, Inc., NGOs kasta metten dagiti Opisiales ti PTA ken Mangisursuro iti pageskuelaan.
Iti pannaki-amad ti Web In-Action kadagiti nagpartisipar iti Brigada Eskwela kadagiti pagadalan iti Poblasion iti Mayo 15, 2017, naibagada a tunggal kuarto ti pageskuelaan ket agdadanggay dagiti mangisursuro ken nagannak nga agurnos ken agdalus agraman iti ruar ti eskuela.
Innayon pay ti dadduma a maar-aramid ita ti pannakapinta dagiti alad, tugaw, ken dadduma pay a pasilidad ti pagadalan partikular iti pannakaital-o ti hygiene and sanitasion dagiti ubbing.
Dagitoy a gannuat ket paset ti pannakaisagana ti pageskuelaan iti panagseserrek ti klase dagiti ubbing inton Hunio 2017.
Kabayatanna, napintek ti panagtitimpuyog dagiti Stakeholders: nagannak, mangisursuro, Barangay Officials ken Gobierno Lokal iti agtultuloy a pannakapasayaat ti pageskuelaanda.
Makipaspaset met ti Konseho ti Barangay agraman dagiti lumugar nga agdalus iti aglawlaw ti pagadalan, agpukan iti sanga ti kayo, agpinta iti classroom ken kanaigna a trabaho iti pannakaisagana ti eskuela.
Segun iti dadaulo ti pageskuelaan nga agyamanda iti agtultuloy a panagkikinnammayet dagiti Stakeholders, dagiti mangisursuro, PTA Officers, dagiti Opisiales ti Barangay ken iti agtultuloy a suporta ti LGU-Cabugao iti pannakapasayaat dagiti pageskuelaan iti Munisipalidad.
Ti Brigada Eskwela ket tinawen a programa ti DepED a pakikammayetan dagiti maseknan a katinnulongda iti Multi-sektoral a benneg tapno maisagana ti pageskuelaan para iti panagseserrek ti klase dagiti ubbing inton Hunio 2017.
Kabayatanna, naaramid ti Kick Off Activity ti Brigada Eskwela 2017 iti Division of Ilocos Sur idi Mayo 12, 2017.
Ti Caravan ket nangrugi iti Tagudin National High School ket nagpatingga iti Sinait National High School, Sinait, Ilocos Sur ket naangay ditoy ti kick-off program ti nasao nga aktibidad.
Nagatendar ditoy dagiti Opisiales ti DepED Ilocos Sur nga indauluan ni Mr. Jorge M. Reinante, Schools Division Superintendent; the initiator of Brigada Eskwela- Mrs. Soledad Dumbrique, Chief Education Supervisor, SGOD; from Regional Office-Dr. Cecilia P. Rosido, Chief of Policy, Planning and Research Division (PPRD); District Supervisors; School Heads; Teachers; LGU Officials; Federated PTA Officers ken amin a Secondary Students ti Sinait NHS. # (Web In-Action)
No comments:
Post a Comment