Cabugao, Ilocos Sur – Napadayawan manen ni Mr. Nereo Somera Daproza, AT, ken dati a Municipal Rice Program Coordinator ti LGU-Cabugao, Ilocos Sur iti maikatlo a gundaway a kas maysa kadagiti Outstanding Agricultural Extension Workers (AEW), Rice Achievers Award 2017 iti Department of Agriculture (DA), impakaammo ti DA-RFO 1, San Fernando City, La Union itay nabiit.
Daytoy ti maikatlo a pannakapadayaw ni Daproza a maysa kadagiti kagagetan ken kalaingan a Rice Technologist iti intero a Region 1 ken iti nasional a benneg.
Immuna idi Tawen 2013 a nangyalatan ti ili ti Cabugao, Ilocos Sur iti intero a Pilipinas iti Pammadayaw iti “Search for the CY 2013 Agri-Pinoy Rice Achiever’s Award” kas maysa kadagiti “Outstanding Municipalities and LGU Agri-Extension Workers” babaen iti National Rice Program ti Department of Agriculture (DA).
Napili ken mapadpadayawan ti LGU-Cabugao maigapu iti adu a maitultulongna iti pannakaidur-as ti produksion ti pagay iti Region 1 iti Tawen 2013 ken iti agdama.
Maikadua a pammadayaw ti nagun-od ni Daproza idi Tawen 2016 iti isu met la a kategoria.
Iti agdama, nadutokan itay nabiit ni Mr. Daproza a Municipal Fisheries Coordinator ngem tumultulong latta met iti implementasion ti Rice Banner Program ken Corn Banner Program ti LGU-Cabugao nga idauluan ni Mayor Josh Edward S. Cobangbang. # (Web In-Action)
No comments:
Post a Comment