Cabugao, Ilocos Sur – Impakaammo ni Mr. Edgar S. Balangatan, AT, MENRO-Designate iti agtultuloy a panaglinisda kadagiti pampubliko a pasilidad iti LGU-Cabugao.
Iti Poblasion ken Coastal barangay ket regular a maiwaywayat ti panagdalus nga idauluan dagiti Opisiales ti Barangay iti parte a masakupanda babaen iti itutulong dagiti sektor ken asosasion iti barangayda.
Kabayatanna, maar-aramid met ti regular a panaglinis iti agsumbangir ti Kalsada Nasional manipud Barangay Sagayaden agingga iti Barangay Pug-os babaen iti panagtinnulong dagiti Personnel ti Maintenance Section ti DPWH-Bantay, Ilocos Sur ken iti Kyeryong Co.
Nupay kasta, insupusop ni MENRO Balangatan a saan nga agsina no di ket agkuykuyog nga asikasuen ti Munisipio ti pakaseknan iti Solid Waste Management ken iti Clean and Green iti intero a Munisipalidad.
Naaramid manen ti mangrove planting idiay Barangay Salapasap ken Barangay Pug-os itay nabiit.
Kabayatanna, innayon ti MENRO nga agtultuloy koma a maaramid ti panagdaldalus iti kalsada kadagiti barangay babaen iti itutulong dagiti Opisiales ti Barangay tapno kabinnuligda ti Munisipio a mangitandudo kadagitoy nga agdama a programa iti Tawen 2017.
Dagitoy nga aksion ken inisiatiba ket resulta iti napintas a koordinasion dagiti Opisina ken Ahensia a maseknan nga adda iti salinong ti LGU-Cabugao nga idauluan ni Mayor Josh Edward S. Cobangbang para iti pannakaitandudo dagiti programa/aktibidad nga agtultuloy a mangpasayaat iti aglawlaw ti Munisipalidad. # (Web Situational Report)
No comments:
Post a Comment