Cabugao, Ilocos Sur – Iti pannakiuman ti Web In-Action iti Mayo 3, 2017, impakaammo ti Opisina ti Municipal Operation’s Office (MOO) ti 4 Ps Program, Municipal Link-Cabugao nga itultuloyda nga isaksaknap ti pakabuklan ti programa iti Salun-at ken Nutrision iti pagnaedan dagiti kameng ti 4 Ps kadagiti barangay ti Munisipalidad ti Cabugao iti bulan ti Mayo 2017.
Innayonda a makiko-koordinarda latta kadagiti Opisiales ti Barangay/Parent Leaders a katinnulongda a mangorganisar iti Family Development Session (FDS) para iti Topiko nga imitingda kadagiti 4 P’s para iti dayta a bulan nga agpokus iti Tema: “Caring of Children with Diarrhea”.
Iti manon a bulan a pannakaangay ti Family Development Session (FDS) kadagiti barangay ket masursuro metten dagiti Parent-Leaders ti tumakder iti bukodda a panangtarawidwid iti miting ken seminar iti masakupanda.
Ita a bulan ti Mayo 2017, dagiti kameng ti RN-Heals Nurses a tarabayen dagiti Social Worker iti aglektiur kadagiti FDS Session-da ket napagkaykaysaanda a maysa a Topiko latta ti binsaenda kadagiti Family Development Session-da tapno epektibo ti evaluation a maisayangkat kalpasanna. Nalaklaka pay a maawatan dagiti adalanda a 4 Ps no dagitay kabisadoda/naipanawen a Topiko/Situasion iti maiyad-adal kas parte iti Values Formation ti Programa.
Dagitoy nga aksion ken inisiatiba ket maigapu iti agtultuloy a panangilungalong ti Gobierno Munisipal iti panangidaulo ni Mayor Josh Edward S. Cobangbang iti pannakikammayetna iti Ahensia ti DSWD iti napintas a maaramidan dagiti programa a maisaksaknap kadagiti barangay tapno maragpat iti sapasap a panagrang-ay iti Pamilia ken umili. # (Web In-Action)
No comments:
Post a Comment