Cabugao, Ilocos Sur – Maangay ti tallo nga aldaw a Cabugao District Sports Competition 2017 (Agosto 25-27, 2017) iti Cabugao Athletic Oval, Cabugao South Central School, Brgy. Bonifacio, Cabugao, Ilocos Sur.
Dagiti agsasalip ket dagiti napili nga atleta iti uppat a Zona iti naangay a Zone Meet iti kallabes iti 26 a pageskuelaan a nakabuklan dagiti sumaganad: Zone 1- dagiti pageskuelaan ti Pug-os, Reppa-ac, Nagsantaan, Salapasap, Bungro, Margaay ken ti Cabugao North CS; Zone 2- dagiti pageskuelaan ti Turod, Namruangan, Daclapan, Salomague, Dardarat ken Sabang; Zone 3- Cabugao South CS, Sagayaden, Pila, Nagsincaoan ken Lipit; Zone 4 – dagiti pageskuelaan ti Maradodon, Catucdaan, Sisim, Cael-layan, Cuantacla, Aragan, Arnap ken Carusipan.
Mairaman met ditoy nga agsasalip dagiti Players dagiti sekundaria a pageskuelaan a kas iti Cabugao National High School; Pug-os NHS; Sisim NHS; Lipit NHS ken iti Cabugao Institute.
Iti rugi ti Kompetision, Agosto 25, 2017 ket naangay ti Parada iti aglikmut ti Poblasion a nagpartisiparan dagiti Atleta, Officiating Officials, Coaches, FPTA Officials, ken Guests.
Nagtungpal ti Parada iti sango ti School Stage ti Cabugao South Central School ket ditoy a nairugi ti Programa.
Opening Prayer ti binagi ni Mr. Rommel M. Santella, MT 1 Teacher, CSCS ken simmaruno iti panangtokar ti CSCS Marching Band ti Pambansang Awit.
Pakauna a sarita ti inted ni Mrs. Estrellita M. Siruno, School Principal II, Cabugao South Central School ket impeksana ti nalaus a panagyamanda ta maysa kadagiti tallo daytoy a pageskuelaan iti ili nga Athletic Ground a pakaangayanto ti Palarong Pambansa 2018 ken pakaangayan latta dagiti sumaruno a dadakkel nga Sports Events ti DepED. Pinagyamanan pay ti Principal ti Gobierno Munisipal nga idauluan ni Mayor Josh Edward S. Cobangbang iti agtultuloy a pannakamantener ken pannakaisaganana a nasayaat kadagiti pasilidad ti pagay-ayaman kasta metten iti agtultuloy a suporta ti LGU-Cabugao kadagiti aktibidad ti sports ken iti eskuela.
Naaramid ti Lighting of the Symbolic Torch babaen kadagiti 2017 Palarong Pambansa Cabugao Athletes.
Nangipaay ti Inspirational Message ni Mayor Josh Edward S. Cobangbang ket kimmablaaw ken nagyaman iti pagsayaatan a maaramidan ti sports kadagiti ubbing ken agtutubo ken iti kinaregta dagiti mangisursuro a katulongan latta a manghulma iti panagtan-ay dagiti ubbing nga agbalin a naresponsable nga umili.
Pinadayawan pay ti Ama ti Ili iti partisipasion ti Federated PTA Officials ken dagiti School Heads iti pannakikaysada a nangisagana kadaytoy a pasilidad ti pagay-ayaman tapno mausar kadaytoy a District Competition. Impeksa ti Ama ti Ili iti ragsak ken panagyamanna iti sangsangkamaysa a kinapintas ti panagbibinnadang iti pannakaisagana daytoy nga Athletic Ground. Inggunamgunamna a mapagtalinaed koma latta iti sportsmanship kadagiti maaramid a paay-ayam ken agtultuloy koma iti napakumbaba a pannakaipatungpal dagiti annuroten iti sports.
Nangipaay met ti Mensahe ni SBM Dr. Jemaima S. Tan-Yee, Committee Chairman on Education. Dinayawna ti napintas a panangkomplementar ti pageskuelaan kadagiti ilungalong ti LGU-Cabugao a pagsayaatan ti sports.
Nagsarita met ni Atty. Bryan Jett S. Pano, Committee Chair on Sports.
Naisaruno a naaramid ti Presentation of Athletic Delegation iti uppat a sona babaen kadagiti Presidente-da ken dagiti pageskuelaan-sekundaria a mairaman iti Kompetision.
Kalpasan a naaramid ti Intermission Number ti Sisim-Alina-ay Marching Band, indauluan ni Jayvee L. Tagayuna, 2017 Palarong Pambansa Athlete Leader a binalikas ti Athlete’s Oath.
Naisaganad iti pannakaisa ti District Athletic Flag babaen ken ni Mr. Ferdinand Asistin, Sports Manager ken iti Raising of the Zone Delegation Flags babaen kadagiti Zone Presidents.
Inakem ni Public Schools District Supervisor Dr. Consesa T. Rumias, Ed. D iti nangideklarar ti pormal a panaglukat ken panagrugi ti paay-ayam.
Nakipaset dagiti kameng ti Cabugao Rescue itoy umuna iti tallo nga aldaw a paay-ayam ti Cabugao DepED District. # (Web In-Action)
No comments:
Post a Comment