Cabugao, Ilocos Sur – Pormal a nairubuat ti “Brigada Eskwela” 2018 kadagiti pageskuelaan ti ili a Cabugao, Ilocos Sur a maiyalubog iti National Schools Maintenance Week a masasao a Brigada Eskwela a nayeskediul iti May 28, 2017 agingga iti Hunio 2, 2018 iti intero a pagilian babaen iti Tema a: “Pagkakaisa Para sa Handa, Ligtas at Matatag na Paaralan Tungo sa Magandang Kinabukasan.”
Naaramid ti Motorcade idi Mayo 28, 2018 nga indauluan ti Cabugao South Central School ken ti Cabugao North Central School a kadadakkelan a pageskuelaan iti Poblasion. School-based met a nagrugi dagiti dadduma pay a pageskuelaan iti barangay.
Iti pannaki-amad ti Web In-Action kadagiti nagpartisipar iti Brigada Eskwela iti Mayo 28, 2018, naibagada a tunggal kuarto ti pageskuelaan ket agdadanggay dagiti mangisursuro ken nagannak nga agurnos ken agdalus agraman iti ruar ti eskuela.
Innayon pay ti dadduma a maar-aramid ita ti pannakapinta dagiti alad, tugaw, ken dadduma pay a pasilidad ti pagadalan partikular iti pannakaital-o ti hygiene and sanitasion dagiti ubbing.
Dagitoy a gannuat ket paset ti pannakaisagana ti pageskuelaan iti panagseserrek ti klase dagiti ubbing inton Hunio 4, 2018.
Kabayatanna, napintek ti panagtitimpuyog dagiti Stakeholders: nagannak, mangisursuro, Barangay Officials ken Gobierno Lokal iti agtultuloy a pannakapasayaat ti pageskuelaanda.
Makipaspaset met ti Konseho ti Barangay agraman dagiti lumugar nga agdalus iti aglawlaw ti pagadalan, agpukan iti sanga ti kayo, agpinta iti classroom ken kanaigna a trabaho iti pannakaisagana ti eskuela.
Segun iti dadaulo ti pageskuelaan nga agyamanda iti agtultuloy a panagkikinnammayet dagiti Stakeholders, dagiti mangisursuro, PTA Officers, dagiti Opisiales ti Barangay ken iti agtultuloy a suporta ti LGU-Cabugao iti pannakapasayaat dagiti pageskuelaan iti Munisipalidad.
Ti Brigada Eskwela ket tinawen a programa ti DepED a pakikammayetan dagiti maseknan a katinnulongda iti Multi-sektoral a benneg tapno maisagana ti pageskuelaan para iti panagseserrek ti klase dagiti ubbing inton Hunio 4, 2018.
Bimmisita met ni Mayor Josh Edward S. Cobangbang kadagiti pageskuelaan iti pormal a pannakairubuat ti Brigada Eskwela 2018 iti ili ti Cabugao, Ilocos Sur. # (Web In-Action)
No comments:
Post a Comment