Cabugao, Ilocos Sur – Naangay ti Mass Wedding Program ti LGU-Cabugao iti Cabugao Cultural and Sports Complex, Brgy. Rizal, Cabugao, Ilocos Sur idi Pebrero 14, 2019.
Iti panangrugi ti programa, immuna ti panagmartsa dagiti 32 a paris a nagkasar a sinaksian dagiti ninong ken ninangda iti uneg ti nadakamat a Building. Naaramid ti Prayer babaen ken ni Municipal Treasurer Lourdes A. Azcueta. Naipatayab ti Philippine National Anthem ken ti Cabugao Hymn a kanta.
Nangited ti Welcome Address ni SBM Dr. Jemaima S. Tan-Yee. Kinablaawanna dagiti 32 a paris a nagkallaysa. Nangibinglay ti napapateg a pammagbaga kadagiti nagkasar.
Naaramid ti Wedding March ket naiyam-ammo ti tunggal paris, naretratoda ken nagtugawda iti sango.
Naisaganad ti Seremonia ti Kallaysa ket inannong ni Mayor Josh Edward S. Cobangbang babaen iti Bileg a naikawes iti Chief Executive a mamagkallaysa kadagiti 32 a paris a nangawat ti Matrimonia ti Kasar iti dayta a petsa. Binayabay ni Municipal Civil Registrar Officer Ms. Charity Rosario S. Abara ti Ama ti Ili.
Inabay dagiti ninong ken ninang dagiti nagkasar kabayatan a kaskasaren ni Mayor Josh Edward ida ken napagsaludsodan ti tunggal maysa kadakuada no naan-anay met laeng ti panangawatda iti assawada.
Naisaganad ti seremonia ti panagiyusok ti singsing ket umuna ti nobio a nangiyusok iti ramay sa simmaruno ti nobia; naaramid ti seremonia ti aras a simbolo ti sakripisio ken pagkasapulan para iti bangonenda a pamilia ket kalpasanna indeklara ni Myor Josh Edward iti naan-anay a panagtiponen dagiti agassawa babaen iti bileg ti kasar.
Nangted ti Mensahe ni Former Congressman Ronald V. Singson ket bininsana ti pateg ti napintas ken manayon a kinnaawatan dagiti agassawa a mangpatalinaed iti naurnos ken naragsak a Pamilia kadagiti nagkasar. Kunana a natural ti rumsua a di pagkinnaawatan ngem saan a baybayagenen iti makisarita iti asawa ta dytoy ti tulbek ti panagkaykaysa maigapu iti bangonen a pamilia ken pagsayaatan met laeng dagiti patanoren nga annak.
Nangibinglay met ti pammatigmaan ni SBM Vicky S. Serna. Bininsana ti pateg ti ayat ken panagpinnadayaw dagiti agassawa tapno agnanayon ti panagtipon dagiti agkasimpungalan.
Nangipaay met ti Mensahe ni Former Mayor Andrea Soller-Tan, maysa met a ninang ket kinablaawanna dagiti nagkasar ken agraman dagiti nanganak, sangaili ken kabagian dagiti nagkasar ken iti amin a naitallaong iti nasao a seremonia.
Nagmensahe ni Former Mayor Edgardo “Ediboy” S. Cobangbang, Jr. Kimmablaaw ken nagyaman iti amin a naitallaong.
Imbatad ti Ama ti Ili a saan laeng a dagiti apagkallaysa iti nagasat ita nga aldaw ket uray met isuda a naaddaan ti parte ti biag dagiti agassawa iti panagmaymaysada ta isuda ket nairamanda met kadaytoy a mass wedding ceremony.
Innayonna a dagitoy a nagkasar ket mainayon manen kadagiti naresponsable ken narespetar nga umili. Daytoy a maipakpakita ket adu a blessings iti biagda ti maawat dagitoy ket dagiti maited a pammagbaga ket ibiagda koma iti inaldaw.
Kinablaawan met ni Former Mayor Ediboy dagiti Opisiales ti Barangay a naitaripnong; dagiti Opisiales ti PSA Vigan nga idauluan Mr. Reynor Fernando ken iti LGU-Cabugao a nangigannuat kadaytoy napateg a seremonia iti Kaaldawan ti Puso.
Innayon ti dati nga Alkalde Munisipal a di magatadan daytoy a pormal a panaglantip ken panagmaymaysa ti puso dagiti agassawa ket umanay a pagrubuatan dagitoy a mainayon a nakataltalna a pamilia kadagiti nakaresresponsable a pamilia a mangbukel ti ili.
Nangipaay ti Mensahe ni Mr. Reynor Fernando, Provincial Statistics Officer ket inapresiarna daytoy a proyekto ti LGU-Cabugao babaen iti liderato ni Mayor Josh Edward kasta metten iti episiente a panagtrabaho ti Municipal Civil Registrar Office nga idauluan ni Mrs. Rosario Charity S. Abara ditoy nga ili.
Innayon ti Opisial ti Philippine Statistics Authority iti ipapan dagiti 32 a paris a nagkasar iti Municipal Civil Registrar’s Office tapno surotenda dagiti pagannurotan iti “pannaka-legitimize” ti apeliedo dagiti nayanaken nga annakda.
Nagsarita met ni Engr. Joh R. Pilot, Presidente ti Muncipal Civil Registrars ti Ilocos Sur.
Indauluan ni Mayor Josh Edward dagiti kameng ti Sangguniang Bayan a naitaripnong agraman ken ni Former Congressman Ronald V. Singson iti pannakaiyawat ti Certificate of Recognition kada Mr. Fernando ken ni Engr. Pilot.
Naisaganad ti Wedding Dance dagiti nagkasar ket napan nagibitor ken nangted ti sagut dagiti ninong ken ninangda. Simmaruno ti panagsinnubo dagiti pareha iti “Cake” ken naaramid ti ritual ti kallaysa a “Champagne Toast”.
Naaramid ti Closing ceremony ket indauluan ni Miss Aida S. Cueto ti ababa a kararag sakbay a napagsasanguan ti naisagana a pagtaraon para kadagiti kakalkallaysa a 32 a paris.
Nakitaripnong met kas ninong da ABC President Thaddeus U. Soller; Mr. Jeremy A. Seguban, Jr.; Former SB Member Jessie Pat Serna; SBM Danny Q. Gazmen; SBM Atty. Randy B. Kinaud; SBM Josefina S. Vallejo; Former Barangay Captain Modesto P. Ronque; pannakabagi ti Media; dagiti Department Heads ken LGU-Personnel ti LGU-Cabugao.
Kabayatanna, naited pay dagiti sagut kadagiti nagkakasar a mainayon a pangrugianda.
Nagpaay nga Emcee ni Miss Teresita “Mimie” S. Sison, HRM Officer ti LGU-Cabugao. # (Web In-Action)
No comments:
Post a Comment