Cabugao. Ilocos Sur - Naaramid ti pannakapili ti Binibining Cabugao 2019 idi rabii ti Abril 26, 2019 a naangay iti Cabugao Central Park (CCP) Auditorium Multipurpose Pavement, Barangay Bonifacio, Cabugao, Ilocos Sur a no sadino a ditoy ket dandani awan iti itiitan iti kaadu ti umili ken sangaili a nangokupar ken magagaran a nagbuya iti pasalip ti kinnapintasan.
Daytoy a pasalip ti Talento ken kinapintas ket naipangruna a pakontes ti LGU-Cabugao nga idauluan ni Mayor Josh Edward S. Cobangbang a nangpangayed idi rabii ti Abril 26.
Iti panagrugi ti kompetision, naiyam-ammo dagiti nangbukel a Hurado iti pasalip babaen kadagiti natudingan a Hosts kadayta a rabii.
Naipakaammo pay dagiti pagibasaran iti panagpilida kadagiti mangabak a kandidata.
Kalpasan ti panagpabuya dagiti maibaet a grupo, saggaysa a nagpresenta/inyam-ammoda ti bagida dagiti kandidata iti entablado.
Nakikaysa iti nadakamat a taripnong da Mayor Josh Edward S. Cobangbang ken ni SK Federated President Marc Russel Morales.
Daytoy a pasalip ket inangay ti Munisipalidad ti Cabugao iti panangidaulo dagiti Opisiales ti Gobierno Lokal ken inesponsoran dagiti indibidual, grupo ken establisimiento dagiti negosio.
Iti dayta a rabii, naipabuya dagiti nalilibnos a Kandidata ken iti panagpabuya ti Celebrity Guest nga isu ni Actor Carlo Aquino. Ti panagpabuyada ket nangted iti naiduma a ray-aw ken liwliwa kadagiti reprep a nagbuya a naibaet kadagiti presentasion dagiti Kandidata.
Kabayatanna, naurnos ken natalna met dagiti nagbuya agraman iti Trapiko iti Kalsada Nasional babaen iti naannayas a panagipatungpal dagiti Pannakabagi ti Linteg iti ili. # (Web In-Action)
No comments:
Post a Comment