Cabugao, Ilocos Sur – Maisagsagana iti naregget a mentenansia ti uneg ken aglawlaw ti NISTC Public Market iti ili a Cabugao, Ilocos Sur nangruna iti nagadu a marketgoers a naggatang ita a Bakasion ti eskuela; napalabas a selebrasion ti Semana Santa; Panagpiesta ti Ili ken ita manen a panagseserrek ti klase dagiti ubbing.
Malaksid iti regular a pannakadalus ti tiendaan ti ili (mamindua a flushing ti makalawas) ken inaldaw a trabaho dagiti market-cleaners, maipakpakat iti panagurnos ti pagtagilakuan kas iti pannakaipan ti “Perimeter Lane” iti paglakuan ti nateng ken Dry Goods tapno napinpintas a buyaen kabayatan iti panaggatangda.
Kanaig daytoy, maipakpakat met ti agtultuloy a pannakamantener ti sanitasion, pannakaamiris dagiti mailako nga ikan ken karne babaen iti Meat Inspector ken pannakamonitor kadagiti ambulant vendor.
Kabayatanna, adda latta met a mainayon a pagdur-asan iti imahen ti Tiendaan babaen iti pannakanayon iti pasdek-paglinongan dagiti Marketgoers iti laud nga abagatan a pagnaan iti NISTC Public Market.
Dagitoy nga aksion ken inisiatiba ket resulta iti napintas a panaglangen dagiti mangtarawidwid iti tiendaan ken iti LGU-Cabugao nga idauluan ni Mayor Josh Edward S. Cobangbang agraman kadagiti marketgoers tapno agtultuloy a maited ti napintas a serbisio kadagiti aggatang ken aglako iti pagkasapulan ti sapasap. # (Web In-Action)
No comments:
Post a Comment