Thursday, July 1, 2010

EDIBOY, NAGSAPATA A BARO A MAYOR; DANNY KAS BISE- MAYOR

Cabugao, Ilocos Sur – Nagsapata ni Edgardo “Ediboy” S. Cobangbang, Jr. a kas baro a Mayor ti Cabugao, Ilocos Sur idi Hunio 30, 2010 iti uneg ti simbaan ti St. Mark the Evangelist Parish Church a sinaksian dagiti umili a pakaibilangan dagiti opisial ti nadumaduma a sektor ken organisasion iti kagimongan. Ni Gobernador Deogracias Victor B. Savellano ti namagsapata kenkuana kalpasan a naidaton ti nasantuan a misa babaen ti panangannong da Revs. Felicisimo Ferrer ken Ronald Dona.

Kadua ni Mayor iti dayta nga okasion a nagsapata ni Bise Mayor Danilo Q. Gazmen ken dagiti kameng ti Sangguniang Bayan a da Vicky S. Serna, Josefina S. Vallejo, Richard T. Alcid, Owen S. Sandi, Crescencio S. Sumagit, Jr. Carlito S. Pano, Jemaima S. Tan-Yee, ken Benedicto M. Savellano.

Kalpasan ti panagsapata, inyebkas ni Mayor Cobangbang ti inaugural address-na a kas kabarbaro a Mayor ti ili a Cabugao.

Naaramid ti turn-over ceremonies iti Cabugao Cultural and Sports Complex. Linuktan ni outgoing Vice Mayor Atty. Rex Augustus Morales ti programa ken simmaruno nga inlawlawag ni Ms. Constancia Quinola, Municipal Local Government Operations Officer (MLGOO) dagiti maaramid iti panaginnallawat ti takem.

Ni SB Secretary Maxfel S. Suboc ti nadutokan a mangiyawat kadagiti papeles dagiti sanikua, ramit, ken makinaria ti Gobierno Munisipal iti baro nga Administrasion. Isuna pay ti nangibasa ti mensahe ni Pasado a Mayor, Dr. Diocaesar S. Suero.

Kalpasan a nagsarita dagiti dadduma a kameng ti SB, inted ni Bise Mayor Gazmen ti panggibus a sarita. Naisaruno ti panangsango ti amin a naitallaong iti naisagana a pangngaldaw.

Nasangaili pay iti nasao nga okasion da Ilocos Sur 1st District Congressman Ronald V. Singson, Bise Gobernador Jeremias C. Singson ken dati a Mayor Andrea Soller-Tan. # (Joed Sajonia)

No comments:

Post a Comment