Tuesday, July 27, 2010

SEMINAR TI PANANGSANGO TI KALAMIDAD, INYUSUAT TI LGU-MDCC CABUGAO

Cabugao, Ilocos Sur (Hulio 27, 2010)-Naangay ti maysa nga aldaw nga Orientation Seminar  no kasano a sanguen, ipatungpal dagiti nadumaduma nga akem ti panagsagana no dumteng ti kalamidad kas iti bagyo, ginggined, uram, layus ken kaarngina a didigra.

Mayataday daytoy nga aktibidad ti Disaster Awareness Month ti bulan ti Hulio ken iti Nailian a Tema: “Pag Alerto, Malayo sa Peligro”. Kangrunaan a nagpartisipar ket dagiti opisiales ti 33 a barangays agraman dagiti napili a kamengna kasta met iti pannakabagi ti nadumaduma nga opisina ken Ahensia a kas iti MLGOO, PNP, BFP, Red Cross, ken NGO’s a  masakupan ti LGU-Cabugao  babaen ti panangtarabay ti Municipal Disaster Coordinating Council (MDCC) a mangiwardas ti panagtignay no dumteng ti kalamidad.
Iti mensahe ni Mayor Ediboy S. Cobangbang, Jr., dinakamatna ti pateg ti panagtitinnulong ken panangwatwat ti espiritu ti volunteerism no adda mapasamak a kalamidad. Bininsana pay ti napateg nga akem dagiti kameng ti MDCC ken Barangay Disaster Coordinating Councils (BDCC’s) ti 33 a barangays ti ili iti pannakamobilisar ti grupo a mangpadaan ken mangaktuar ti pasamak iti panawen ti didigra.

Naglektiur da Ms. Constancia Quinola, MLGO Officer, Richard Bilgera, OIC, Red Cross, Vigan City , BFO3 Darwin Cabacungan ti Bureau of Fire Protection (BFP).

Tunggal banag a maiseminar ket adda kaibatoganna a workshop ken drill tapno masigurado a maipasagepsep kadagiti nagatendar dagiti nayadal.

Naaramid ti Orientation Seminar iti St. Mark the Evangelist Parish Hall idi Hulio 27, 2010. # (Source, Anara-ar 2010)

No comments:

Post a Comment