BABAEN ti bileg ti Resolution No. 23, Series of 2010, maipatungpal ti “codification ” ti amin nga ordinansa nga inaprobaran ken naipatungpal ti Konseho Munisipal ti ili a Cabugao. Manamnama a maurnos ti rekord ti pagpandayan ti linteg maibasar iti adda a maagsaw a dokumento iti napalabas nga administrasion manipud idi Enero 1, 1938 agingga iti agdama.
Daytoy ita ti prayoridad a programa ti Sangguniang Bayan babaen ti panangiwardas ni Vice Mayor Danny Q. Gazmen ken pannuporta ni Mayor Ediboy S. Cobangbang, Jr.
Imbatad ni SB Secretary Maxfel S. Suboc a mapadaraston a kitaen babaen iti mailibro a panamagsasaruno dagiti naaramid a linteg.
Nabukel ti Technical Working Committee nga idauluan ti Bise Mayor, Miembros: dagiti Sangguniang Bayan Members, amin a pangulo ti opisina/departamento, information officer, human resource management office, ken municipal licensing office; pangulo ti Secretariat ti SB Secretary ken dua a legislative staff ken agpaay a Consultant ti MLGOO.
Nangrugi ti panagtrabaho ti komite idi Hunio 29, 2011 a pakaipinalan ti Action Plan a giya ti Komite agingga iti pannakairingpas daytoy a gannuat.# (Joed Sajonia)
No comments:
Post a Comment