Sunday, June 12, 2011

Opening of Dayo

Gumanat a Dumur-as ti DAYO ti Ili a Cabugao

APAMAN a nagtugaw a mangidaulo ti ili ni Mayor Ediboy S. Cobangbang, Jr., nasirmatanan ti napintas a panagrubuat ken pagbanagan ti pannakaituloy ti simmardeng nga operasion ti “dayo” ti ili a Cabugao. Babaen iti panagam-amirisna, naibaon ti grupo ni Vice Mayor Danny Gazmen idi Hulio 14, 2010 sadiay disso ti “Dayo” ti ili a Badoc, Ilocos Norte tapno takuatenda ti pampamay-anda ta daydaywen ti adu nga aggatang ken aglako ti nuang ken baka nga aggapu iti amianan ken iti umabagatan a paset ti Region 1 ken 2. Kadua idi ti Bise Mayor da Livestock Inspector, Dr. Melvin Castro, Meat Inspector Dante Naval ken Licensing Officer ken GSO Edito de la Cruz ti LGU-Cabugao.

Nagbalikas daytoy a darepdep ni Mayor Ediboy ta idi Hunio 11, 2011, naluktan ti operasion ti Dayo ti ili ket timmalantan dagiti traders, shippers, ken buyers ti animales a naggapu iti nadumaduma a barangay ti ili ti Cabugao, kabangibang nga ili ken probinsia tapno saksianda ti pannakalukat ti Dayo. 

Nagtinnulongan da Bise Mayor Danny Gazmen ken ABC Chairman Teddy Soller a kinasarita dagiti nagatendar idinto ta ti dadduma ket nagbisitada iti kabarbaro a pasdek ti dayo a nakaibaudan dagiti nabubun-as a nuang ken baka a maidayo a naggapu iti BARANG-AY iti Labnig, San Juan, Ilocos Sur ken pribado nga agtagikua ti nuang ken baka a nagitugot ti ayupda iti pagdadayuan.

Dagiti napagnanamingan kalpasan ti miting a naaramid:

1. Maorganisar ti amin a koridor, aggatgatang iti 33 a Barangays ti ili tapno sangsangkamaysada a makikaysa iti Gobierno Lokal iti pannakaited ti papeles kadagiti ayup kadagiti agginnatang ken aglinnako a partido.
2. Mairehistro ti amin a koridor ket maaddaanda ti ID kas iti ID System dagiti mannalon tapno mabigbig ti kinasiasino ti maseknan no adda tumaud a problema.
3. Nagkumit ni ABC Chairman Soller a tumulong dagiti Kapitanes a mangipatungpal kadagitoy a mapagtutulagan.
4. Tunggal aldaw ti Sabado ti panagidayo ti animales ngem no adda emerhensia nga agginnatang iti ruar, kasapulan a maaramid ti transaksionda ditoy opisina ti Dayo tapno maikkanda iti naan-anay a pepeles ken maitedda ti pagrebbenganda a P200: P100 ti Certificate of Ownership ken P100 met ti Certificate of Transfer.
5. No maidayo ti animales iti sabali a lugar, ditoy dayo a mismo ti pagkargaanda ti nuang wenno baka.
6. 24 oras nga adda naka-duty iti Dayo ta pasaray alas Kuatro ti parbangon ti rubuat dagiti agibiahe.
7. Saan a mabalin nga agrehistro a koridor wenno aggatang a taga-sabali nga ili. Saanda a mapalubosan nga aggatang ngem ketdi wayawayada ti umay makidayo iti Cabugao.


Mayor Ediboy with Vice-Gov. DV Savellano



Kalikaguman dagiti agggatang ti maipabulod a puonan ngem imbaga ni Mayor Ediboy nga ipakitada a napadakkelda ti puonan a naipabulod kadakuada iti kallabes a naggapu iti RA 7171 ket akubanna pay daytoy.

Imbatad ni Mayor Ediboy a naggapu iti dakkel a tulong manipud Gobierno Probinsial babaen kada Vice Gov. DV Savellano ken Gov. Luis “Chavit” Singson ti pannakapaadda dagiti kasapulan a psilidad iti Dayo ti ili. Kalikaguman ti Mayor a masupapakan daytoy ti napintas a panangiwardas dagiti opisiales ken miembros ti organisasionda babaen iti koordinasionda iti mangimatmaton iti Dayo ti Dayo kadagiti mabukel a polisada ken probitsarenda dagiti pagsayaatan nga itden ti panaglilinnako ken panaggatang ti animales iti maikanatad a wagas.

Nupay kasta, indagadag ti Mayor nga ipakita ti organisasion ti koridor ken aggatgatang a pumintas ti pannakaipapataray ti organisasionda ta di masasaan ti maitedto met la a pagsayaatanda gapu ta dagiti organisasion ti kangrunaan a mataliaw ita ti Ama ti Ili agsipud ta buklenda kangrunaan dagiti mannalon ken mangngalap ti 83 porsiento a pakabukl;an ti umili. Uray met ti 17 porsiento a sabali a sektor adda met kaibatoganda a pannakataming.

Kangrunaan a nasangaili iti pannakalukat ti Dayo ket ni Vice Gov. DV Savellano. Impanamnamana a 100 % ti suporta ti Gobierno Probinsial iti panagoperar ti Dayo iti panangidaulo ni Gov. Luis “Chavit” Singson.

Inlawlawag pay ti Bise Gob. a kayatna a yapal ken tuladen ti ili a Cabugao iti napnapananda a sabali a lugar nga adda dayona. Imbatadna a no nadur-as ti dayo, agtubo met ti adu a negosio iti aglawlawna a mangnayon ti masapulan ti tao ken iti Gobierno.

Innayon ti Bise Gob. a babaen ti BARANG-AY, programa ti Gobierno Probinsial ket ditoy pay a matulongan dagiti mannalon babaen iti pannakikoordinarda ken ni Farm Manager Dr. Cesar Soller, DVM ta adu ti programa ti Gobierno Probinsial a maited kadagiti mannalon pakaseknan iti pannakaidur-as ti agrikultura ken industria ti animal/dinguen tapno matulongan dagiti umili a dumur-as pay ti panagbiagda.

Inulit ni Mayor Ediboy a probitsaren koma dagiti umili dagiti serbisio nga itden ti Gobierno Probinsial ken Munisipal babaen ti panangipakitada iti napintas a pannakaipataray ti organisasionda ken kabaelanda nga ipatungpal dagiti nabukel a paglinteganda iti mayataday a pamay-an.
Iti dayta met la a panagtataripnong, binilin ti Mayor ni Mr. Dante Naval, Meat Inspector a mapasayaat ti aglawlaw ti opisina ti Dayo ta maaddaan ti pagtutugawan iti linong dagiti narukbos a kayo ken adda maaramid a paglakuan/panganan ken pagkalduan iti asideg ti Dayo. Manamnaama a maaramid dagitoy iti sumaruno a Sabado a pannakaangay ti Dayo.

Innayon pay ti Mayor a mapaaramidan ti pasdek a pagdagusan dagiti umay makidayo a naggapu iti adayo a ta rebbengna laeng a masangaili ti grupo a makinegosio iti ili ti Cabugao kasta met iti pagidiskargaan ken pagkargaan kadagiti biahero ti ayup.

-- Joed Sajonia

No comments:

Post a Comment