TEACHERS DAY, NAGSELEBRAR TI CABUGAO NORTH CS

Cabugao, Ilocos Sur – Nagselebrar ti Cabugao North Central School iti “Teachers Day”  iti Oktubre 4, 2018 iti Cabugao Cultural and Sports Complex, Brgy. Rizal, Cabugao, Ilocos Sur a pangbigbig iti naindaklan a propesion  dagiti mangisursuro. Daytoy  a Teacher’s Day ket maselselebraran iti intero a Pilipinas iti tinawen.

Nagkaykaysa dagiti mangisursuro ti Cabugao North Central School a nagselebrar babaen iti panangorganisar  ti CNCS PTA Officers iti programa a kas Pammadayawda kadagiti Teachers.

Linukatan ni Mr. Nerio S. Lopez, PTA President iti panagrugi ti  selebrasion. Naipabuya dagiti intermission number dagiti nadumaduma a Grade Levels; Practice Teachers ken dagiti PTA Members  a kas pangparagsakda  iti nasao a programa ken naikkan iti Certificate of Appreciation dagiti napili a  Mangisursuro iti amin a Grade Levels manipud iti Kindergarten agingga iti Grade VI.

Naragsakan   met unay dagiti ubbing, mangisursuro, nagannak  ken sangaili a nagbuya. 

Nasangaili ditoy ni Pasado Mayor Edgardo “Ediboy” S. Cobangbang, Jr., Presidente ti CNCS Alumni Association ket iti inna panagsarita ket  impeksana iti kablaaw ken ti panagyamanna ta napintas iti pakasarsaritaan ti eskuela a nagbasaanna  a ditoy iti paggapgapuan iti nalalaing a mangisursuro a di mauma a manghulhulma kadagiti ubbing iti nasayaat a pagbanaganda ken dagiti naballigi a patanor a nagad-adal ditoy nga eskuela a mangitantandudo iti pagimbagan iti kaaduan nga umili.

Nangipaay met ti Mensaheda da Public Schools District Supervisor Dr. Consesa T. Rumias ken ni SBM Dr. Jemaima S. Tan-Yee, Committee Chairman on Education. Kimmablaaw ken nagyamanda met  ken dinayawda ti napintas a pabuya dagiti mangisursuro ken ub-ubbing iti panagselebrarda iti Teachers Day ket nasayaat unay ta  maikkan iti pateg ken panangpadayaw met kadagiti mangisursuro iti naindaklan nga akemda a mangmulmuli  iti nasayaat a pannakipagili dagiti agad-adal nga ubbing iti bugas dagiti mensaheda.

Kanaig daytoy nga aktibidad iti pannakaselebrar ti National Teachers Month (Setiembre 5-Oktubre 5) ita a Tawen 2018  babaen iti Tema: “Gurong Pilipino:  Turo mo, Kinabukasan Ko”.  # (Web In-Action)