Cabugao, Ilocos Sur – Segun ken ni Mr. Nathaniel S. Galamgam, AT, Municipal Rice Program Coordinator adda umdas a kalawa ti pagtatalonan kadagiti barangay ti ili iti nakaimulaan ti 2nd Crop Riceplants (Nobiembre 2018 - Pebrero 2019).
Iti pannaki-amad ti Web In-Action, imbatad ti Municipal Rice Program Coordinator a manmano nga agmintis ti 2nd Crop ta managsapsapa dagiti agtalon ket manmano ti magam-odan iti tikag iti pagpadanumanda.
Innayon ni Mr. Galamgam nga 98 % ti pakabuklan iti naapitan kadagiti natalon ket mapatta-patta nga 10 porsiento ti nainayon iti metrika-tonelada a produksion iti naapit itay kallabes a Wet Season 2018 (Hunio-Nobiembre).
Impasingked ni Mr. Galamgam a mamantener iti rice self-sufficiency status ti Munisipalidad iti benneg ti pagtaraon.
Kabayatanna, nabayadan ti kaaduan a nagrehistro iti PCIC kadagiti mannalon iti kallabes a panagtalon a naapektaran iti kalamidad iti mulada a pagay. Adda sumagmamano a mangur-uray ti bayad iti imdemnity damages dagiti mulada ket manamnama a maawatda iti kabiitan babaen iti panangruk-at ti PCIC Region ti maibayad kadagitoy a mannalon ditoy nga ili, segun ken ni Mr. Galamgam. # (Web In-Action)
No comments:
Post a Comment