Cabugao, Ilocos Sur – Nakasagana latta nga agtignay ti puersa ti Municipal Disaster Risk Reduction Management Council (MDRRMC)-LGU Cabugao, Ilocos Sur iti panangidaulo ni Mayor Edgardo “Ediboy” S. Cobangbang, Jr., MDRRMC Chairperson ken iti panangimaton ni LDRM Officer Engr. Nestor B. Somera.
Iti sabali a bangir, nakarikna met iti nam-ay dagiti mannalon ta dagitoy ti nangipagteng iti nabuslon a tudo a nausarda a nagtalon nangruna iti napalabas a Hanging Habagat. Nasuspender laeng dagiti klase ti dadduma pay nga inwayat ti MDRRMC/LGU kabayatan iti ilalabas ti habagat ken bagyo.
Kabayatanna, ti Pilipinas ket basnotan ti umabot iti 20 a bagyo iti tinawen segun iti PAG-ASA ngem gapu ta timmaud ita a 2019 ti El Nino ket manamnama a 14 agingga iti 18 a bagyo laengen ti bumisita ditoy pagilian.
Imbatad pay ti PAG-ASA a nangrugi laeng ti tudtudo a tiempona idi Hunio 14, 2019.
Malaksid iti panagmonitor ti MDRRMC Members iti National Highway, mapanda kadagiti calamity prone area (inland ken coastal area) tapno makitada dagiti arayatenda gapu iti epekto ti angin ken kabulonna a tudo no adda didigra.
Daytoy a panagsagana ket maibasar iti nangato a level ti koordinasion iti MDRRMC kadagiti kabinnuligna nga Opisina ken Ahensia ti Gobierno a kas iti PDRRMC ken iti NDRRMC iti idadaliasat ti didigra a mapasamak iti las-ud ti AOR (Area of Responsibilities-da).
Pagrebbengan ti MDRRMC nga alertuen dagiti maapektaran a pamilia kadagiti Coastal Barangay ti ili ket no addada man ket maipanda iti pasdek ti Cabugao Evacuation Center sadiay Barangay Bonifacio, Cabugao, Ilocos Sur ta ditoy a maasikasoda ken palabsenda ti dawel ti didigra.
Determinado dagiti mangbukel ti Cabugao Rescue a pannakaramay ti MDRRMC iti Munisipio nga ag-monitor, ag-rescue ken ag-clearing kadagiti maapektaran iti didigra a disso sakbay, agdama ken iti kalpasanna.
Kabayatanna, maaramid no kua ti dialogue iti opisina
ti Mayor maipapan iti bagyo karaman dagiti Opisiales ti Ili, Department Heads/Employees ken pannakabagi ti linteg.
Matratar pay iti maisayangkat a Preemptive Evacuation kadagiti maapektaran babaen iti MDRRMC-Cabugao ket makikoordinar kadagiti kameng ti Cabugao Rescuers ken ti PNP Maritime a nakabase idiay Barangay Salapasap.
Aramidenda ti agtultuloy a pannaki-koordinar ken pannakitinnulongda kadagiti tumarabay nga Opisiales ti Ili kabayatan ti ilalasat ti bagyo ken iti pannakikaysada kadagiti dadduma a Departamento ti LGU a kas iti MSWDO ken ti MHO-RHU ken kasta metten iti PNP ken BFP a kaduada a maseknan no dumteng ti kalamidad tapno napigpigsa ti grupoda a mangaksion kadagiti pakaseknan dagiti umili nagruna kadagiti barbarangay.
Dagitoy nga aksion ken inisiatiba ket maigapu latta iti napartak a panangipatungpal ti pagrebbenganda iti MDRRMC-Cabugao nga idauluan ni Mayor Edgardo “Ediboy” S. Cobangbang, Jr., MDRRMC Chairperson nga agibagnos iti maaramid nga aksion iti panawen a dumteng ti didigra tapno maprotektaran wenno maalay-ayan a dagus dagiti umili iti epekto ti kalamidad. # (Web Situational Report)
No comments:
Post a Comment