Cabugao, Ilocos Sur – Kalpasan a naaramid dagiti paay-ayam iti basketball iti Inter-barangay Basketball Tournament ti ili ti Cabugao kabayatan ti Piesta ti ili itay Abril 2019, imbatad ni Mr. Gabriel Guerrero Sunio a nakipaset dagiti napili a Players ti basketball iti ili a Cabugao iti naangay nga Ilocos Sur Basketball League, Governors Cup 2019 nga inesponsoran ti Provincial Government ti Ilocos Sur a nagsasalipan dagiti mangbukbukel ti Team kadagiti nakipartisipar nga ili iti Probinsia itay nabiit.
Innayon ni Mr. Sunio, napusgan a mangtarabay kadagiti Players ti Team Cabugao a babaen iti regtada met a nakipaset kadaytoy a paay-ayam ket nagun-odda ti Magic 8 iti Overall Standing ken naalada iti maikapat a puesto iti amin a Team a nakisalip iti masakupan ti 1st District, Ilocos Sur.
Malaksid iti promosion ti sports a basketball, agtultuloy a mamantener ti salun-at ti pisikal ken mental nga aspeto dagiti agtutubo kasta metten a matubayda iti disiplina, pannakikadua, sportsmanship ken pagliwliwaan iti pannakipasetda. # (Web In-Action)
No comments:
Post a Comment