Cabugao, Ilocos Sur – Nairubuat ti “Brigada Eskwela” 2016 kadagiti pageskuelaan ti ili a Cabugao mangrugi iti Mayo 30, 2016 babaen iti Tema a: “ Tayo Para sa Paaralang Ligtas, Maayos, at Handa Mula Kindergarten Hanggang Senior High School”.
a kas mayalubog iti National Schools Maintenance Week, a masasao a Brigada Eskwela a nayeskediul iti May 30, 2016 agingga iti Hunio 4, 2016 iti intero a pagilian.
Naluktan ti Kick Off Activity ti Brigada Eskwela 2016 ditoy Cabugao babaen iti naaramid a motorcade iti Mayo 30, 2016 kadagiti processional route ti ili ken iti National Highway a nangrugi iti Cabugao North Central School ken nagsubli met laeng ditoy dagiti nagpartisipar. Iti nasao a motorcade, inyuna ti Mobile Patrol Car ti PNP sa sinaruno dagiti motorista iti Cabugao Elite Riders Club, Inc., NGOs, kasta metten dagiti Opisiales ken mangisursuro kadagiti pageskuelaan.
Iti pannaki-amad ti Web In-Action kadagiti agpartisipar iti Brigada Eskwela kadagiti pagadalan iti Poblasion iti Mayo 30, 2016, naibagada a tunggal kuarto ti pageskuelaan ket agdadanggay dagiti mangisursuro ken nagannak nga agurnos ken agdalus agraman iti ruar ti eskuela.
Innayon pay ti dadduma a maar-aramid ita ti pannakapinta dagiti alad, tugaw, ken dadduma pay a pasilidad ti pagadalan partikular iti pannakaital-o ti hygiene and sanitasion dagiti ubbing.
Dagitoy a gannuat ket paset ti pannakaisagana ti pageskuelaan iti panagseserrek ti klase dagiti ubbing inton Hunio 13, 2016.
Kabayatanna, napintek ti panagtitimpuyog dagiti Stakeholders: nagannak, mangisursuro, Barangay Officials ken Gobierno Lokal iti agtultuloy a pannakapasayaat ti pageskuelaanda.
Makipaspaset met ti Konseho ti Barangay agraman dagiti lumugar nga agdalus iti aglawlaw ti pagadalan, agpukan iti sanga ti kayo, agpinta iti classroom ken kanaigna a trabaho iti pannakaisagana ti eskuela.
Segun iti dadaulo ti pageskuelaan nga agyamanda iti agtultuloy a panagkikinnammayet dagiti Stakeholders, dagiti mangisursuro, PTA Officers, dagiti Opisiales ti Barangay ken iti agtultuloy a suporta ti LGU iti pannakapasayaat dagiti pageskuelaan iti Munisipalidad.
Ti Brigada Eskwela ket tinawen a programa ti DepED a pakikammayetan dagiti maseknan a katinnulongda iti Multisektoral a benneg tapno maisagana ti pageskuelaan para iti panagseserrek ti klase dagiti ubbing inton Hunio 13, 2016. # (Web In-Action)
No comments:
Post a Comment