Cabugao, Ilocos Sur – Naangay ti Medical Mission ti ROPHEH (Reaching out to Peoples Health Through Entrusted Hands) Medical Mission Group babaen iti panangesponsor ti Pamilia daydi nag-SBM Dr. Carlito S. Pano ken iti pannakikammayetna iti Local Government Unit (LGU)-Cabugao nga idaluan ni Mayor Edgardo “Ediboy” S. Cobangbang, Jr.
Idi Abril 30, 2016, nasapa a nagturong dagiti nagpaagas iti Cabugao Cultural and Sports Complex, Brgy. Rizal, Cabugao, Ilocos Sur ket nadagdagus met nga inrehistro dagiti RHU Personnel a timmulong a nagserbisio kadagiti naituding a lamisaan. Nakikammayet pay dagiti Medical Personnel ti World Citi College ken iti University of Northern Philippines (UNP), Vigan City iti nasao a medical mission.
Ti ROPHEH (Reaching out to Peoples Health Through Entrusted Hands) Medical Mission ket sigsigud a
mangipapaay ti Medical Mission ditoy ili ti Cabugao, Ilocos Sur.
Iti pannaki-amad ti Web In-Action kadagiti Medical Staff and Personnel a nangtarawidwid iti panagagas, nairehistro dagiti nagpaagas iti benneg ti Medical, Dental ken kaaduan iti bilang ti ubbing a nagpa-Circumcision.
Ti pannakaitandudo ti sapasap a salun-at kadagiti umili ket prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken pakaseknan dagiti naayat a gunglo-sibiko a mangipapaay ti libre a serbisio iti salinong ti LGU tapno agtultuloy a naragsak dagiti umili a mangsagrap iti gin-awa nga itden ti agtultuloy a panagdur-as ti ili. # (Web In-Action)
No comments:
Post a Comment