Cabugao, Ilocos Sur – Napadayawan manen ni Mr. Nereo Somera Daproza, AT, ken Municipal Rice Program Coordinator ti LGU-Cabugao, Ilocos Sur a kas maysa kadagiti Top Performing Agricultural Extension Workers (AEWs) iti Agri-Pinoy Rice Achievers Award ti Department of Agriculture (DA) iti imatang ti Pamilia LGU-Cabugao kalpasan ti Flag Raising Ceremony idi Mayo 2, 2016 iti sango ti Munisipio.
Sakbayna, napan inawat ni Mr. Daproza daytoy a nakapadayawanna iti nadakamat nga Ahensia sadiay Manila.
Inimatangan dagiti Department Heads ti LGU-Cabugao iti pannakapadayawna agraman dagiti kakaduana iti DA-LGU Cabugao nga imatonan ni Acting Municipal Agriculturist Robert S. Savella iti imatang ti Pamilia-LGU nga idauluan ni Mayor Edgardo “Ediboy” S. Cobangbang, Jr.
Daytoy ti maikadua a pannakapadayaw ni Daproza a maysa kadagiti kagagetan ken kalaingan a Rice Technologist iti Region 1 ken iti nasional a benneg.
Immuna idi Tawen 2013 a nangyalatan ti ili ti Cabugao, Ilocos Sur iti intero a Pilipinas iti Pammadayaw iti “Search for the CY 2013 Agri-Pinoy Rice Achiever’s Award” kas maysa kadagiti “Outstanding Municipalities and LGU Agri-Extension Workers” babaen iti National Rice Program ti Department of Agriculture (DA).
Napili ken mapadpadayawan ti LGU-Cabugao maigapu iti positibo ken adu a maitultulongna iti pannakaidur-as ti produksion ti pagay iti Region 1 iti Tawen 2013 ken iti agdama.
Imbagianda idi ken ni Former Municipal Agriculturist Zenaida S. Andrada dagiti napadayawan iti Outstanding Agricultural Extension Workers (AEWs) iti dayta a tawen. # (Web In-Action)
No comments:
Post a Comment