Cabugao, Ilocos Sur – Maibasar iti Certificate of Canvass of Votes manipud iti Municipal Board of Canvassers (MBOC) nga idauluan ni Mr. Elmer C. Labor, Chairman, Acting Election Officer II, Cabugao, Ilocos Sur, naiproklama idi Mayo 10, 2016 a nangatiw iti kaadu ti nabutosna ni Duly Elected Mayor Josh Edward “Ediboy” S. Cobangbang iti naangay a 2016 Automated National and Local Elections idi Mayo 9, 2016 para iti kangatuan a posision ti Opisial Lokal iti ili a Cabugao, Ilocos Sur.
Sakbayna, imbagnos da Mayor Josh Ediboy ti Partido NPC (National People’s Coalition) ken ti kinatiketna ni Vice Mayoralty-Re-electionist Deogracias Jose Victorino “DJ” H. Savellano a nagballigi met iti maikadua a kangatuan a puesto iti ili.
Kadua da Mayor Josh Ediboy ken ni Vice Mayor DJ Savellano a naiproklama a nangabak babaen iti COMELEC Cabugao dagiti walo a nangabak a Kandidato a Sangguniang Bayan a kas kada: 1. Danilo Q. Gazmen; 2. Vicky S. Serna; 3. Jayhan Charisma Alcid Tan; 4. Jemaima S. Tan-Yee; 5. Atty. Bryan Jett S. Pano; 6. Josefina S. Vallejo; 7. Atty. Randy B. Kinaud; 8. Dodjie Santella.
Iti surat nga ipagteng ni Mayor Josh Ediboy kadagiti kailianna iti Cabugao, dinakamatna ken iti pamiliana iti panagyamanda kasta metten dagiti kakaduana a nangipaay ti panawenda iti panagkampaniada iti Partido-da ken iti panangitandudoda ti kaipapanan ti “Dayaw Cabugao, One Cabugao”.
Imbatad pay ni Mayor Josh Ediboy iti suratna iti panagyamanna iti panangbigbig dagiti kailianna ti Cabugao kadagiti gapuanan ti itultuloyna nga administrasion ti Amana, Mayor Edgardo “Ediboy” S. Cobangbang, Jr. ken dagiti gannuatda iti napintas ken husto a panangidaulo ken agtultuloy a napudno a panagserbida kadagiti kakailianda iti Cabugao iti panagtakemda.
Agtugaw ni Mayor Josh Ediboy para iti Umuna a Termino (2016-2019) kas Hepe Ehekutibo iti ili a Cabugao, Ilocos Sur babaen iti mandato dagiti umili iti panangriendana/panangtarawidwidna iti umuna a tallo a tawen. # (Web In-Action)
No comments:
Post a Comment