Cabugao, Ilocos Sur – Iti pannaki-amad ti Web In-Action ken ni SK Federated President (Ex-Officio Member ti SB) Marc Russel Morales ti ili a Cabugao itay nabiit, imbatadna a maysa a kapatgan nga aktibidadesda ket iti pannakaipasagepsep kadakuada nga agtutubo iti linaon ti Republic Act NO. 10742 “AN ACT ESTABLISHING REFORMS IN THE SANGGUNIANG KABATAAN CREATING ENABLING MECHANISMS FOR MEANINGFUL YOUTH PARTICIPATION IN NATION-BUILDING, AND FOR OTHER PURPOSES” tapno maikkanda iti idea iti direksion a turongenda iti pannakaipatungpal kadagiti programa ken proyekto para iti pagdur-asan dagiti agtutubo iti ili ti Cabugao.
Innayon ni SK Federated President Marc Russel a malaksid kadagiti narugianda nga aktibidades a kas iti pannakakikaysada iti Brigada Eskwela 2018; Clean-up Drive iti kabaybayan, makipaspasetda met kadagiti Session ti Kongseho ti Barangay nga ayanda tapno mapamiliarisada iti kasasaad ti panagserbisioda iti barangayda nangruna iti benneg dagiti agtutubo ken iti komunidad.
Innayonna pay a padpadaananda dagiti atendaranda a maangay a seminar nga angayen ti LGU ken ti DILG tapno manayonan ti kaammuanda iti panagidaulo ken kanaigna a pagrebbengan.
Nupay kasla mangrugrugida manen nga ipundar iti natibker a Sangguniang Kabataan, napintas a pangrugian ken pagpangalan iti nairugidan ken iti agtultuloy a kinatunosda nga agtataripnong a mangpatibker iti hanayda iti kagimongan. # (Web In-Action)
No comments:
Post a Comment