ZONE MEET, NAANGAY ITI DUA NGA ALDAW

Cabugao, Ilocos Sur – Naangay ti Zone Meet Competition iti uppat a  Sona ti pageskuelaan  ti Cabugao DepED District  iti Agosto 23-24, 2018.
Naaramid ti  programa iti Cabugao Evacuation Center, Barangay Bonifacio, Cabugao, Ilocos Sur sakbay a maaramid ti Game Proper iti kada aldaw.

Iti umuna nga aldaw ti kompetision (Agosto 23, 2018), naggiddan a naaramid ti paay-ayam iti Zone 1 ken Zone 3 idinto ta iti maikadua nga aldaw (Agosto 24, 2018) ket aggiddan met ti Zone 2 ken Zone 4.

Panglukat a sarita ti impaay ni Mrs. Estrellita M. Siruno, Principal III, Cabugao South Central School. Nagyaman iti LGU-Cabugao iti tarabayda ken  pannakausar  dagiti pasilidades ken iti pasdek a pakaangayan ti opening program ken game proper  iti Zone Meet.

Nasangaili ditoy da Mayor Josh Edward S. Cobangbang ken ni Cabugao SK Federated President Marc Russel Morales ken  nakitaripnong kadagiti Atleta nga ubbing, Mangisursuro, Officiating Officials, Coaches ken nagannak a nangtarabay kadagiti atleta.

Iti Mensahe ni Mayor Josh Edward, kimmablaaw ken nagyaman. Bininsana ti pateg iti sportsmanship, panangpasayaat iti sport a nakaikabilan ken pananggun-od iti balligi. Innayon ti Alkalde Munisipal iti agtultuloy a suporta ti LGU iti pannakaidur-as ti sports partikular kadagiti pagadalan a pakatubayan a nasayaat dagiti umaayam nga ubbing iti kabaelanda.

Nangted met ti Mensahe ni SK Federated President Marc Russel Morales. Kunana a maaramid ti napintas a panaglalangen; mainayon a maadal ken pannakisalip iti nakaibaonan dagiti ubbing ket taginayonenda koma ti sportsmanship ken lumalaingda koma  tapno makagtengda iti nangatngato a benneg ti  pakisalipanda.

Naibasa  ti Athletic Oath sakbay a naaramid ti Proclamation of the Formal Opening of the Meet nga inakem  ni  Mr. Ronel M. Ubaldo, Head Teacher III, Salomague E/S ken District Sports  Coordinator.  

Ti Zone Meet ket naituding a pakaangayan a pangipakitaan  ti kabaelan dagiti ubbing nga adda potensialna iti panagay-ayam iti nadumaduma nga sports events iti las-ud ti napagtitipon a pagadalan. Dagiti mapili ket isudanto  ti mangibagi iti maangay a District Meet Competition  iti Cabugao DepED ken uray pay iti nangatngato a tukad wenno agpang iti pagsasalipan dagiti agad-adal.  # (Web In-Action)