Tuesday, August 14, 2018

UPDATE TI ANTI-DENGUE CAMPAIGN

Cabugao, Ilocos Sur – Nupay makunkuna a “zero dengue incidence”  ti kaaduan a barangay iti ili ket agtultuloy  latta ti Anti-Dengue Campaign ti  LGU-Cabugao babaen iti panangiwardas dagiti Personnel ti Cabugao Municipal Health Office nga idauluan da  Dr. Mark-Lawrence T. Tirao ken ni Public Sanitary Inspector Jeanette Garcia kadagiti  bulan  a matutudo.

Panagdaldalus iti aglawlaw ken uneg iti pagtaengan  ken madalusan  dagiti nasamek a disso iti arubayan iti posible a pagyanan  ti lamok iti kaskenan pay a maaramid, impalagip dagiti autoridad ti salun-at.

Nadakamat dagiti nasamay nga addang a pinanglappedda iti Dengue Occurence iti kallabes ken uray iti agdama a kas iti sumaganad: 

1. Iraman dagiti RHU Personnel a maibagbaga iti kada pasienteda iti inaldaw iti nasken nga aramidenda tapno maliklikan ti pannakakagat ti agranggas a lamok ken no kasano a paksiaten ida.

2. Paiwayatda  ti nasaknap nga “Oplan Taob” a panangibelleng iti aniaman a nataya a danum ket karaman pay a kinatinnulong ti RHU-LGU, MDRRMC ken  dagiti Opisiales ti Konseho kadagiti  barangay iti ili.
3. Agtultuloy a kooperasion ti tunggal Ahensia a manglapped iti itataud daytoy a sakit. 

Iti bulan ti Agosto idi napan a tawen, nayeskediul ti  information drive-da iti RHU-Cabugao  kadagiti pageskuelaan-sekundaria iti ili a kas iti Lipit National High School; Sisim  National High School;  Pug-os  National High School; ken ti Cabugao National High School (Turod) ket naipaganetget iti panagaramidda kadagiti aktibidad a  mangprebentar iti panagraira daytoy a naranggas a sakit.  

Nagitedda pay idi dagiti adda iti RHU iti  material  a pangkontra iti  dengue  a kas iti O/L  (Obcidal/Larvacidal) Trap.

Buklen pay ti nasao nga estratehia iti pananglaban ti dengue  babaen iti panangadaptarda iti DOH 4s Kontra Dengue: Search and Destroy, Seek early consultation, Self-protective measures and Say no to indiscriminate fogging.

Dagitoy nga aksion ken inisiatiba ket gubuay iti nasamay a programa iti pananglapped ti  nadakamat a sakit  ita a panawen ti panagtutudo babaen iti panangitandudo ti Gobierno Munisipal nga idauluan ni Mayor Josh Edward S. Cobangbang tapno masalbar dagiti umili nangruna kadagiti ubbing iti pannakakagat iti agdangran a lamok. # (Web In-Action)

No comments:

Post a Comment