Cabugao, Ilocos Sur – Naiparang ken nagsapata dagiti napili a Young Public Servant (YPS) 2018 mangrugi iti Posision ti Mayor, Bise Mayor ken dagiti pakaisaadanda a takem iti Sangguniang Bayan agraman dagiti Ahensia a nakasalinong iti LGU-Cabugao agingga iti Department Heads ti nadumaduma nga Opisina ti LGU-Cabugao.
Nakitaripnong ni Mayor Josh Edward S. Cobangbang kadagiti Young Public Servant iti Cabugao Cultural and Sports Complex, Barangay Rizal, Cabugao, Ilocos Sur idi Agosto 13, 2018.
Sakbayna, naelektaran ni Mark Justin S. Molina iti Lipit National High School, Brgy. Lipit, Cabugao, Ilocos Sur a Young Little Mayor ket ni met Hecchiza Aguilar ti Cabugao South Central School ti napili a Young Vice Mayor.
Kabayatan ti seremonia, naawagan a saggaysa dagiti naelektaran a Young Public Servant iti sango manipud kadagiti nadumaduma a pageskuelaan ti ili ti Cabugao a maisaad iti Opisina ti Mayor, Bise Mayor, Department Heads agingga iti Sangguniang Bayan ken iti nadumaduma pay a Departamento ti LGU-Cabugao.
Pinagsapata ida ni Mayor Josh Edward iti imatang ti Pamilia-LGU a pakairamanan dagiti Department Heads, Municipal Officials ken dagiti pannakabagi dagiti Ahensia.
Kalpasanna, nagturong dagiti Opisiales ti Munisipio kadagiti kapadada ti saad a Young Public Servant ket inyaspilida dagiti pin-da.
Iti Mensahe ni Mayor Josh Edward, kimmablaaw ken nagyaman ta naited ti pribilehio kadagiti ubbing nga agad-adal a mangakem kadagiti responsibilidad dagiti Opisiales Lokal ken dadaulo ti nadumaduma nga Opisina iti LGU-Cabugao.
Innayon ni Mayor Josh Edward a maragsakan kadaytoy a maar-aramid ta mamuli ti potensialda nga agbalin a lider ket matubay iti kabaelanda iti pageskuelaan ken iti komunidad.
Insupusop ti Ama ti Ili nga agyaman unay iti partisipasion dagitoy nga agad-adal kadaytoy a programa ti Munisipio ket kasapulan a maisuroda iti aramidenda kadagiti pakaidesignaranda nga opisina.
Nagsarita met ni Mark Justin S. Molina. Nagyaman ti Young Mayor ken kinablaawanna dagiti Opisiales ti ili nga idauluan ni Mayor Josh Edward S. Cobangbang ken dagiti kaduana a YPS ken dagiti Personnel ti LGU-Cabugao.
Nakinaming met dagiti kameng ti Konseho Munisipal nga isuda SBM Danny Q. Gazmen; SBM Atty. Bryan Jett S. Pano; SBM Josefina S. Vallejo; SB Secretary Maxfel S. Suboc ken ni SK Federated President Marc Russel Morales iti seremonia ti panamagsapata kadagiti Young Public Servant 2018.
Kabayatanna, naipakaammo pay iti eskediul dagiti aktibidades nga aramiden dagiti agtutubo manipud Agosto 12, 2018 agingga iti Agosto 17, 2018 a pangselebrarda ti makalawas a Linggo ng Kabataan kas sagudayen ti linteg. # (Web In-Action)
No comments:
Post a Comment