Cabugao, Ilocos Sur – Nupay assideg ti saan a pannakatapog dagiti agkalkalap kadagiti pito a coastal barangay ti ili maigapu iti dawel ti panawen, nagduduma met ti wagas a pamataudanda latta iti inaldaw a pagbiaganda malaksid iti regular a panagkalapda iti dadduma a barangay.
Iti napintas a pannakikammayet dagiti coastal barangay; asosasion ti mangngalap ken dadduma a sektor kas iti RIC; Farmers; 4 Ps iti Gobierno Munisipal ket ditoy a maikkanda iti naan-anay a pannakaasikaso babaen kadagiti programa a pakibinnuligan ti Gobierno Munisipal kas iti Bureau of Fisheries and Aquatic Resources (BFAR); Gobierno Probinsial; DSWD-Region babaen iti Sustainable Livelihood Program (SLP) ti 4 Ps.
Malaksid laeng iti panagkalap ket adu metten ti nakasursuro a mangged iti mainayon a gastosenda; mangged iti benneg ti agrikultura ken naruay a nadayaw a panglakagan iti panagbiag.
Kadagiti napalpalabas a tawen ket naipakpakatdan iti baybay dagiti naited kadakuada a Payao ket nagnumnumaranen dagiti Benepisiario a mangngalap ti kita wenno produksion ti Payao Project-da a dagitoy a proyekto ket napaadda babaen iti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti panagtakemna.
Imbatad ti maysa nga Opisial ti asosasion ti mangngalap a no kadawel ti baybay ket maakas dagiti Payao ket tingitingenda ti panawen no agipakatda manen iti sumaruno tapno saan a maiyanud ti ramitda. Mabalin met a sumuporta dagiti tradisional a pagkalapda iti ababaw a paset ti baybay ta epektibo dagitoy a mangnayon iti masapulan ken mangnayon iti inaldaw a pagbiagda.
Imbatad ni Magno Carbonel, dadaulo ti pederasion dagiti mangngalap ti ili a malaksid kadagiti ramit a nasagrap dagiti nakaisangratanna nga asosasion manipud iti BFAR iti kallabes ket timmulong pay ti LGU kadakuada babaen iti pannakaruk-at ti 20 % Municipal Development Fund ti ili.
Dagitoy a pagimbagan ket nagubuay babaen iti agtultuloy a pannakitunosda ken maitultuloy latta ti pannakaited ti serbisio kadaytoy a sektor iti panangikalikagum ti Gobierno Munisipal nga itultuloy latta ni Mayor Edgardo “Ediboy” S. Cobangbang, Jr. a mangtulong kadagiti mangngalap babaen iti pannakailungalong dagiti proyekto a maited kadakuada ken agtultuloy a pagsayaatan dagiti sapasap a mangngalap iti ili ti Cabugao, Ilocos Sur. # (Web In-Action)
No comments:
Post a Comment