Cabugao, Ilocos Sur - Imbatad ni Mayor Edgardo “Ediboy” S. Cobangbang, Jr. kalpasan ti napalabas a Flag Ceremony a pannakisaritana iti Pamilia LGU a kasapulan nga ibagay iti kalidad iti mait-ited ita a serbisio kadagiti umili iti inaldaw iti maipadpadamag a napintas a panagkita ken panangapresiar dagiti kailian ditoy ken ballasiw-taaw iti pannakabangon iti napintas a pasdek ti Balay ti Ili wenno Munisipio.
Innayon ti Ama ti ili nga iti baro a langa iti Munisipio wenno Presidencia ket gutigotenna met iti naregregget koma pay a pannakaited ti napintas a pannakilangen ken pannakaideliber iti nakalkalidad a panagserbi kadagiti umili a nakaigapuan iti kaadda ti Gobierno ken iti Balay ti Ili.
Kanaig daytoy, kankanayon a dakamaten ti Ama ti ili iti naimpapasnekan a panagtrabaho ken nasayaat a pannakilangen kadagiti umay/sumarungkar ditoy Munisipio kasta metten dagiti maidestino nga Opisiales ken Empleado a naggapu iti sabali a lugar tapno awitendanto dagitoy a napintas a damag ti ili a nagserbianda a ditoy ket ammoda ti ar-aramidenda ken maitaltal-o latta iti inaldaw iti nakalidad a serbisio para kadagiti umili ken sapasap.
Maysa pay a punto de bista ti Hepe Ehekutibo a no mapasayaat ti biag ti umili ket maaddaanda iti nabileg a “purchasing power” ket no sumayaat ti panagbiagda ket magatangda iti kayatda nga agresulta iti adu a mapaglakuan ken taripa ket mairanud met ti kaban ti umili a mapadur-as - agsubli met la dagita a maukkon a buis para iti pagsayaatan ti sapasap nga umili ti Cabugao. #
No comments:
Post a Comment