NAPATEG DAGITI PAMMATIGMAAN TI AMA TI ILI KALPASAN TI FLAG CEREMONY

Cabugao, Ilocos Sur – Kalpasan ti Flag Raising Ceremony iti Agosto 5, 2019, kinablaawan ni Mayor Edgardo “Ediboy” S. Cobangbang, Jr.  dagiti katinnarabayna nga Opisiales-Lokal ti Ili nga isuda Vice Mayor Jemaima S. Tan-Yee; SBM Josh Edward S. Cobangbang; SBM Danny Q. Gazmen; SBM Mariedes D. Soller; SBM Amelia Abarquez-Sunio ken ni SK Federated President Marc Russel Morales;  Department/Section  Heads dagiti Opisina ti LGU; dagiti kameng ti PNP ken BFP-Cabugao   ken dagiti amin a Personnel a mangbukbukel ti Pamilia-LGU Cabugao iti panagrugi ti panagtrabahoda ita a lawas.

Inwaragawag ni Miss Mimie S. Sison, HRM Officer dagiti nagan dagiti opisiales ken empleado nga agkasangay ita a bulan ti Agosto nga idauluan ni Mayor Ediboy. Impeksa ni Mrs. Lydia S. Gazmen, napusgan kadagiti agkasangay iti nasged a panagyamanda iti sapasap iti pannakakablaawda nga agkasangay.

Inyam-ammo ni Mayor Ediboy dagiti baro  a dadaulo ti Departamento nga adda iti salinong ti LGU-Cabugao:   ti baro a  Doktor ti RHU ken Munisipalidad ti Cabugao nga isu ni Dr. Vanessa A. Sablay; Ms. Eloisa Regucera, baro nga MLG Officer ken ni Senior Inspector Eddie Tabuno iti BFP-Cabugao, baro a hepe ti nadakamat nga Opisina.

Imbatad ni Mayor Ediboy a dagitoy nga Opisiales nga umay agserbisio ditoy nga ili ket kalikagumanna latta iti napintas a pannakilangen ken pannakipagtrabaho ti amin ken dagiti masakupanda nga empleado tapno agtultuloy latta a kas kadagiti padada nga immay nagtrabaho ditoy nga inawitda nga inyawid iti lugarda iti nasayaat a damag a pakasarsaritaan iti napintas a pannakilangen dagiti umili, opisiales ken empleado ti ili a Cabugao kadakuada.

Inikkan pay ni Mayor Ediboy iti importansia iti napasnek a pannakipagtaming ti Munisipio iti pannakatiped ti sakit a dengue babaen iti naiwayat nga intensive drive iti Oplan Taob kadagiti pageskuelaan ken barangay ti ili. Innayon ti Ama ti Ili nga uray laeng iti aramid a pannakaipalagip kadagiti bumarangay iti panangliklik iti daytoy a sakit ket dakkel a banag dagitoy ket impaganetgetna nga akem iti tumunggal maysa iti itutulongda a mangikkat iti rekord ti estatistika a saan a makaapektar iti kaaduan daytoy nga agraraira a napeggad a sakit iti lokalidad.

Impalagip manen ni Mayor Ediboy iti nakaysa a panagtrabaho ti amin a public servant ket kayatna a maitandudo iti nakalidad a serbisio a maipaay kadagiti umili ket natalek a masustener daytoy a banag nupay ti kaaduan a dadaulo ti departamento ket agatendarda iti tallo nga aldaw iti maangay a seminar iti  Executive Legislative Agenda (ELA) a maaramid sadiay Probinsia ti  Bataan.

Kabayatanna, impaganetget ti Ama ti Ili  kadagiti padana a Public Servant iti agtultuloy latta a panangipaayda iti napintas  a serbisio kadagiti umili ken iti agtultuloy a panangtamingda kadagiti masanguanan nga aktibidad ken programa  a maigannuat. # (Web In-Action)