Cabugao, Ilocos Sur – Nupay nawanasen dagiti empleado ti Munisipio iti amin a pageskuelaan agraman dagiti barangay a pakasarakan kadagitoy iti panangirubuatda iti Oplan Taob ken panagdalus ket agtultuloy latta nga ipalpalagip ti DOH; RHU kasta metten ken ni Mayor Edgardo “Ediboy” S. Cobangbang, Jr. iti panangaramid kadagiti wagas a mangtiped iti daytoy agraraira a napeggad a sakit a maala iti Anopheles Mosquito.
Maibasar iti rekord ti HRM Office- LGU-Cabugao, umabot iti 26 a pageskuelaan-elementaria ken uppat a sekundaria a pagadalan iti nakaiwayatan daytoy a trabaho nga inggannuat ti LGU-cabugao.
Kangrunaan a timmarabay ditoy dagiti Personnel iti RHU nga inyuna ni Ms. Jeanette Garcia, Public Sanitary Inspector a nang-validate ti kasasaad dagiti manamnama a pakasarakan iti itlog ti napeggad a lamok tapno maaplikaran iti pestisidio.
Kabayatanna, inulit a dinakamat a kangrunaan a pakaseknan ti sapasap ni Mayor Edgardo “Ediboy” S. Cobangbang, Jr. iti pannakisaritana iti Pamilia-LGU kalpasan ti Flag Ceremony iti panagraira ita ti sakit a dengue iti lokalidad kas pakdaar iti Department of Health (DOH).
Iti panangigigir ti Ama ti Ili iti salun-at ti sapasap, nairubuat iti intensive drive ken Oplan Taob kadagiti pageskuelaan a pagtitiponan dagiti ubbing babaen iti ipapan dagiti Empleado ti Munisipio a panagpidut ti non-biodegradable materials kas iti nagsupotan a selopin ken plastic ken kangrunaan iti panangipakboda kadagiti nataya a danum kadagiti amin a paset ti arubayan ti pageskuelaan kas koma dagiti nakatiwangwang a lata; tumbler a pagikkan ti basura; aniaman a goma ken kanaigna a banag a makataya iti tudo wenno adda makargana a danum.
Ti Oplan Taob a programa ti LGU-Cabugao ket nairugi iti pageskuelaan ti Cabugao South Central School sa naisaruno dagiti dadduma a pageskuelaan (by cluster) apaman a naileppas ti Cabugao North Central School. # (Web In-Action)
No comments:
Post a Comment