OISCA KANSAI GROUP, NAGBISITADA DITOY CABUGAO

Cabugao, Ilocos Sur – Simmarungkar ti grupo dagiti Hapones (OISCA Kansai Group) ditoy ili ti Cabugao itay nabiit.

Sinangaili ida ni Mayor Edgardo “Ediboy” S. Cobangbang, Jr. babaen ti papanda panag-courtesy call iti opisinana dagiti Delegado ti Overseas of International Service Cultural Academy  or OISCA ( Japanese institution)  manipud iti OISCA Abra Agro-Forestry and Industrial Training Center.

Itoy a panagtataripnong ket napagsasaritaanda ti pakaseknan dagiti programa ken proyekto ti OISCA a mangtulong a mangpasayaat iti aglawlaw iti lokalidad.

Maipalagip a  naaramid ti panagpipili kadagiti baro nga Opisiales a katinnarabay ti OISCA ditoy Cabugao ket napili a pangulo ni Mayor Edgardo “Ediboy” S. Cobangbang, Jr. ken kakaduana dagiti napili nga Opisiales nga isuda SBM Danny Q. Gazmen; Mr. Dario Roy Siruno; Miss Marietta S. Cruz; Mrs. Estrellita M. Siruno; PB Modesto P. Ronque; PB Inocencio Sadac; MFARMC Chairman Danny Garcia ken ni Mr. Romeo Solar  nga agsaad met iti babaenna.  Naaramid ti panagsapata dagiti Opisiales ti OISCA-Cabugao iti Fiesta Garden Hotel, Bantay, Ilocos Sur idi Agosto 18, 2016. 

Kanaig itoy, malagip nga iti Dekada 2000 idi maiyadu  ti panagmula ti Mangrove wenno bakawan iti aplaya ti Barangay Dardarat, Cabugao, Ilocos Sur babaen ti panangilungalong dagiti pannakabagi ti Organization for Industrial, Spiritual and Cultural Advancement (OISCA) a nag-base ditoy a barangay. Inadaptar met  ti barangay daytoy a panagmula ti masasao pay a “tubokayo” ti barangay babaen ti panangipamaysa idi nagtakem ni Brgy. Captain Alberto Solis ken inallawat ni Brgy. Captain Danny S. Garcia aginggana  ita nga  agdama. 

Ti pateg ken balor daytoy a mula iti kabaybayan ket naitantandudo babaen iti panagkammayyet ti BFAR Region 1, Provincial ENRO  ken ti LGU-Cabugao iti panagtakem ni  Mayor Edgardo “Ediboy” S. Cobangbang, Jr. babaen kadagiti sumaganad a benepisio a natun-oyan  dagiti lumugar iti coastal barangays  ken dagiti sumarsaruno a henerasion ti umili iti masanguanan:

1.Pagaponan ti ikan ken dadduma pay a  marine life iti sirok ti  nagrarabanga a ramutna.

2.Manglapped ti panagyuduyod ti pangpang ti baybay ken agpaay a “sea water breaker” tapno maalay-ayan ti pegges ti ayus- nga agpaigid. 

3.Pagaponan ti billit ken dadduma pay a nabiag iti sangsangana ken food cycle dagiti nabiag iti danum a mangpabun-as pay kadagitoy a nabiag.

4.Mabalin a pagsungrod ti maruting wenno  mapukan a  nagango a linabag ti kayo ti mangrove para iti pagkasapulan ti balay.

5.Napintas ti buya a pataudenna iti takdang  ta parupa iti umas-asul a baybay.

Nupay kasta, nakammayyet latta ti pannakamula ti mangrove kadagiti katangriban ti Brgy. Dardarat, Salomague, Sabang, Salapasap ken Pug-os  babaen ti panangiwardas da MENRO Edgar S. Balangatan ken  ni Municipal Fisheries Coordinator Nereo S. Daproza, agak-akem ita a Municipal Agriculturist ti ili.

Dagitoy nga aksion ken inisiatiba ket gubuay iti nainsiriban a panangisagana ti nakaparsuaan a sarikedked  dagiti lumugar ken dagiti sumarsaruno a henerasion ti umili ditoy Cabugao, Ilocos Sur. # (Web In-Action)