PANAGBUELO TI TASK FORCE NISTC

Cabugao, Ilocos Sur - Nalatak  ti pagilasinan a dimmur-as ti kasasaad ti  Merkado Publiko (NISTC) iti “impact” ti  panagserbisio ti Task Force NISTC a binuangay ni Mayor Edgardo “Ediboy” S. Cobangbang, Jr.  idi Agosto 15, 2011 babaen iti bileg ti maysa nga Executive Order.

Ti Task Force NISTC ket nabuangay idi Agosto 15, 2011 ket dagiti sumaganad ti kangrunaan nga akemenna:
Mangpasayaat ti serbisio ken iti koleksion iti tiendaan.
Makipagpanunot/makipagtakuat/agirekomenda kadagiti nasamay a wagas a mangpasayaat iti dadduma pay nga  aspeto ti operasion ken mentenansia ti tiendaan. 
Ti Task Force Chairman ket agituyang ti eskediul ti agob-obra iti tiendaan ken pannakamonitor dagitoy.
Maysa nga indikasion ti report manipud iti Tesoreria-Munisipal ket iti napintas a "collection efficiency"   iti business tax: pagbasaran,    iti P2,694,247.63 idi  Disiembre 20, 2010 iti P3,062,262.52 iti Disiembre 20, 2011 (latest update).

Ti nasao a Task Force ket buklen dagiti dati nga empleado ti tiendaan ken baro nga agtrabaho ti LGU Cabugao. Kangrunaan nga akemda ti mangtingiting  ti kasasaad ti tiendaan ket babaen ti aktual a panagamirisda/panagpanunotda  ket   agirekomendada iti opisina ti Mayor kadagiti takuatda  ken epektibo ken  mainugot a rekomendasion iti pannakapasayaat pay ti serbisio kadagiti aggatang ken aglaklako ken iti aglawlaw ti tiendaan.

Segun iti kaaduan nga agpalpaliiw a mannakitienda ken intelektual a grupo ti “consumers”, dagiti sumaganad ti dinur-asan ti tiendaan ti ili a Cabugao:
Ngimmato ti naurnong a  nasapulan ti tiendaan no maikompara iti naglabas a bulan ken tawen. 
Namantener ti kinadalus ti aglawlaw/uneg ti tiendaan  ken pimmintas ti suplay ti pagdanuman.
Naurnos ti parkingan ken sistematiko ti pannakaiwardas ti trapiko iti sumrekan ken rummuaran iti tiendaan babaen kadagiti  nagaget/naalibtak  a Traffic Enforcers/Officers (Blue Boys), Security Personnel   ken Kapolisan.
Napintas ti pannaka-sona dagiti pagtagilakuan a pakanam-ayan dagiti aggatang.
“Napasnek ken agpampanunotda kabayatan ti panagtrabahoda iti mabalin pay a mangpasayaat ti kasasaad ti amin a makitientienda ken aglaklako,” kuna ti maysa a Retirado a pannakaeskuelana ti tiendaan nga aggatang.

“Kasla limmawa ti aangsanen no sumrekka iti tiendaan ta nagdalusen ken nadaras ti mangala ti pagluganan ta naurnos ti pagparkingan ti lugan,” imbatad met ti taga-away a kanayon a makitienda nangruna ti aldaw ti Domingo.

“Pinaikkanmi ti ruangan ti laud nga abagatan ti pasdek ti dati nga Ice Plant tapno agderetso dagiti tao nga aggapu iti simbaan iti aldaw ti Domingo ken panglintegan dagiti  makitienda.” Kuna ni     Engr. Nestor Somera a pangulo ti Task Force NISTC. 

Napasemento payen ti nayon ti  pagparkingan ti lugan ken traysikelan iti abagatan ti opisina ti Postal Office.

Innayon ni Engr. Somera a mapasayaat/mapabaro   pay  ti koriente a silaw ti tiendaan, maikkan ti linong ti parkingan ti traysikelan tunggal barangay, ken naalerto dagiti security guards nangruna iti rabii. Dagitoy ket plano ti Task Force NISTC a naipatungpalen  ken maipatpatungpal pay laeng ti dadduma  babaen ti panangaprobar ni Mayor Edgardo “Ediboy” S. Cobangbang, Jr. 

Nupay kasta, ti NISTC ti maysa a kadakkelan ti mayalokaran  ti  pundona iti Municipal Budget ngem maisubli met daytoy ti dakdakkel   a pataudenna a masapulan a pundo ti Gobierno Munisipal iti tinawen. # (Web In-Action)

TASK FORCE NISTC
Engr. Nestor Somera
Manuel Gorospe
Eustaquio Donnel Peralta
Jeff Bryan Sonido
Darwin P. Sumibcay
Joe Ernest Gazmen

Ladawan ti naluktan a dalan/serkan  iti laud-nga-abagatan ti pasdek ti dati nga Ice Plant iti tiendaan

Nainayon a nasemento iti laud  ti parking area ti lugan ken traysikelan
Posted by Bayan ng Cabugao, Ilocos Sur at 9:36 AM 0 comments 
NISTC PUBLIC MARKET UPDATE 2019

Cabugao, Ilocos Sur –Segun iti Management ti NISTC Public Market ket itultuloyda nga ited ti napintas a pannakaipaay ti serbisio kadagiti aggatang/aglaklako  babaen kadagiti sumaganad:

1. Agtultuloy a pannakalinis a nasayaat ti las-ud ti Tiendaan (NISTC Public Market)  ken iti  itutulongda a mangbunag kadagiti dadduma pay a wara nangruna kadagiti selopin (non-biodegradable materials) ket agtultuloy nga isayangkat dagiti Personnel ti NISTC Public Market a tumulong nga agikkat kadagiti rugit.

2. Maar-aramid iti pannaka- “Flushing” ti basar ken stalls iti paglakuan ti ikan ken karne (mamindua ti makalawas) ken naasikaso pay ti septic tank.

3. Maar-aramid  ti inspeksion kadagiti ambulant vendors babaen iti panangpalagip ti Public Sanitary Inspector ti LGU-Cabugao kadagiti Food Handlers nga aglaklako iti ikub ti Tiendaan.

4. Agtultuloy met ti koordinasion ti Opisina ti MENRO-LGU Cabugao ken Management iti patinayon a pannakadalus ti agsumbangir ti Kalsada Nasional a batog ti Tiendaan agraman kadagiti drainages tapno agtultuloy a nasigo ti sanitasion ken nasalun-at nga aglawlaw ti NISTC Public Market a para met laeng iti sapasap.

Malaksid iti pannakamonitor iti presio, mairaman met a makita dagiti maiserrek a lako  a karne ken  ikan ken maamiris dagiti  pagkiluan; maipampamaysa iti pannakamantener ti kinadalus  ti uneg ken aglikmut ti tiendaan nangruna kadagiti Comfort Rooms (CRs).  
Kabayatanna,  agtultuloy latta a manayonan ken mapasayaat iti pakabuklan ti NISTC Public Market kasta metten a natarimaan dagiti pasetna a kasapulan a ma-repair. 

Nupay kasta, agtultuloy  ti umay makitienda uray pay kadagiti agindeg iti kabangibang nga ili nangruna a mangpaadu ti malakuan dagiti adda iti puestona iti Tiendaan.

Dagitoy nga agtultuloy a panangpasayaat ti Tiendaan  ket resulta iti nasamay a Direktiba ti Munisipalidad nga idauluan ni Mayor Edgardo “Ediboy” S. Cobangbang ken ipatungpal  ti Management Staff  iti NISTC Public Market. # (Web In-Action)