ZONE MEET, NAANGAY ITI UPPAT A VENUE

Cabugao, Ilocos Sur – Naangay ti Zone Meet iti uppat a  Sona ti pageskuelaan  ti Cabugao DepED District idi Agosto 2019.

Dagiti sports events a napartisiparan dagiti nakapilian dagiti atleta nga agsasalipto  para iti District Meet ket iti Baseball/Softball; Volleyball; Badminton; Football; Table Tennis; Chess;  Athletics ken Scrabble.

Nagpaay nga Officiating Officials dagiti mangisursuro/dadaulo  kadagiti pagadalan a masakupan ti tunggal sona.

Naaramid ti ababa a programa sakbay a naigannuat daytoy nga sports activity ti DepED. Kangrunaan a nang-highlights daytoy nga sports event ket iti pannakaiyawat dagiti Sports Gadgets nga inted ti LGU Cabugao babaen iti liderato ni Mayor Edgardo “Ediboy” S. Cobangbang, Jr. kadagiti atleta. Imbagian ni SBM Josh Edward S. Cobangbang, Committee Chair on Education  a nangiyallawat kadagiti sports gadget kadagiti maseknan iti disso ti pagay-ayamanda iti dayta nga aldaw ti Zone Meet.

Pinagyamanan dagiti Opisiales ti Cabugao DepED District iti LGU Cabugao kadagiti naited  nga sports materials kadakuada.

Ti Zone Meet ket naituding a pakaangayan a pangipakitaan  ti kabaelan dagiti ubbing nga adda potensialna iti panagay-ayam iti nadumaduma nga sports events iti las-ud ti napagtitipon a pagadalan. Dagitoy  ti mangibagi iti maangay a District Meet iti Cabugao DepED ken iti nangatngato a tukad wenno agpang ti pagsasalipan dagiti agad-adal iti elementaria.

Kangrunaan a mangtartarawidwid kadagiti mapasamak nga sports activities iti Cabugao DepED ni Mr. Ronel M. Ubaldo, Head Teacher III, Salomague E/S ken agdama a District PESS Coordinator.  # (Web In-Action)